HEBREOS 9

1Oyitɨm olak. Uje Porrosht chɨbɨte lahwoso wapkite ich chɨbɨte ɨr ley uje tyenɨj oshiyokõr par uje oteeychãha ɨre hn shuu oshiyokõr ɨr tabernakulo toy par uje oteeychãha ɨre. 2Ese tabernakulo oshiyokõr ochĩ̵ra karpɨt oshuu aho osiyer. Ese ehet webich osht kuchɨt de shɨ par uje ochɨbɨte nampyon eeych hn nemest dechɨ toy uje ochɨbɨte pan uje oshɨmɨhɨ Porrosht. Ese owich iich otsɨɨ Santo. 3Bortɨsht de ese ehet uje shuu aho osiyer hn ese bortɨsht pɨt iich otsɨɨ Santísimo. 4Kejunt uje ich berzak dechɨ uje iich otsɨɨ altar. Ese altar ochɨbɨte oro eeyo shɨ ɨtso uje ochũshur. Wɨchɨ par uje otserũhu kuche uje aat ehmuuj. Kejunt yet dechɨ toy uje iich otsɨɨ owich par Porrosht ahwoso. Wɨchɨ kejunt oro de eeyo ɨtso uje ochũshur, hn jarta dechɨ ese kejunt ehet uje oshiyokõr ochĩ̵ra oro. Maná de asa jarta ehet. Aarón ɨr ɨtɨlta uje pohnakite hn eesh dechɨ ese kejunt ehet toy. Erze kojano po uje ɨtso tabla dechɨ ehet toy. Porrosht chichew chɨbɨte ɨr ley erze kojano po eeyokite. 5Ese kejunt ɨr uhurrza shɨ oro hn oshiyokõr kuchẽrk uje iich otsɨɨ kerubines ochĩ̵ra oro uje iyehetɨhɨ asa uhurrza eeych. Õr ĩhyo terɨhɨye. Wɨr Porrosht ɨr kerubines, hn asa uhurrza wɨchɨ owich uje sosɨr oso ɨshɨ õr hnɨtewɨhɨ Porrosht ahɨr. Ele ahle ich ye õryok pwelpe par oyiita ma erze kuche. 6Uje erze israel oso ochɨmɨt ese tabernakulo uje oshiyokõr ich aho osiyer de ehet. Erze saserdote shish omasaha ese ehet webich osht par oshiyokõr debiyo, 7per shɨ erze saserdote õr bahlut pisht pwele masaha ese ehet yet uje dechɨ pɨt. Shɨ deeych nohmɨra kal ãyt ich masaha wahacha hn shɨ uje tõhwa kuche armɨsta par ɨshɨ erze ɨr kuche mɨhnũwo ɨr bahat uje shiyokõr hn par ɨshɨ erze israel oso õr bahat uje ye odɨrehepe kɨmɨjɨ mĩ̵hnɨk per oshiyokõr. 8Heke Porrosht Ɨchɨbich shuu ɨmeheeych uje nĩhyok ye oso õr pwele otaachĩ̵hɨ Porrosht ahɨr pork bortɨsht shuu ese tabernakulo aho osiyer hn sontew õr. 9Nos wɨr erze uje titɨm olakɨke wɨr shɨ tɨteẽta ele ahle uje Porrosht chɨbɨte lahwoso ahlo. Antni erze kuche uje oshɨmɨhɨ Porrosht par oteeychãha ɨre hn erze loshɨpo uje oshuu par õr kuche mɨhnũwo bahat uje oshiyokõr wɨr ye pwele churhũ õr ahope pork shish ochuuna uje oshiyokõr uje ich mɨhnũwo. 10Wɨr shɨ ley uje tata erze poso uje oso õr pwele otew hn erze uje õr pwele oho hn tatɨm õr par uje otɨsoho awɨt. Wɨr shɨ ley uje Porrosht shuu oso oshiyokõr nehech terɨhɨ ɨshɨrĩt uje chɨbɨte lahwoso ahlo. 11Cristo tɨrẽtkite heke ele ahle wɨchɨ saserdote uje ich dichpa wahacha poõrc par ɨshɨm Porrosht aabo erze uje ich om. Wɨchɨ chish obiyoho ese tabernakulo uje de poõrc uje ich ma om uje ye oso oniyokõrpe. Ese tabernakulo ye ĩ̵rmo ospe. 12Cristo masaha ese tabernakulo ehet per ye dosɨm Porrosht kabɨrt armɨsta hn ye dosɨm wõjɨt armɨstape. Shɨ ɨshɨm narmɨsta hn yelɨj deeshpo masaha par shiyokõrpo. Wɨchɨ ɨshɨ eyok hnɨtewɨhɨ Porrosht ahɨrkite heke eyok ɨkɨrĩt de uje yelɨj nɨhna ɨre. 13Erze wõjo itokohlo ɨr armɨtsɨ hn erze kabɨr ɨr armɨtsɨ uje saserdote otsɨta oso ochĩ̵ra, hn asa wõjɨta uje otsẽru uu ɨr piitsɨt ochɨmchaha awɨt hn otsɨta oso ich shuu õr owich om par uje õr pwele omasaha templo patikɨt ehet. 14Mahn Cristo yelɨj niyokõr uje mĩ̵hnɨk. Porrosht Ɨchɨbich de ɨre ehet hn shuu ɨshɨmɨhɨ ɨre par uje oshuu oshuu toy par ɨshɨ õr hnɨtewɨhɨ Porrosht ahɨr. Ɨr armɨsta ich ma ukurbosh je nos wɨr loshɨpo ɨr armɨtsɨ par uje ɨshɨ erze kuche mɨhnũwo ɨr bahat uje yiyokõrlo par uje yiyokõr uje Porrosht sahmũr. Porrosht wɨchɨ shish ɨka. 15Heke Jesús shuu Porrosht ehet kɨɨsɨhɨ eyok pork shuu yakaha erze ɨr ahwoso ahlo uje Porrosht chɨbɨtkite. Heke erze oso uje Porrosht chiihla õrkite ich õr ɨkɨrĩt de uje yelɨj nɨhna ɨre pork uje Jesús toy ich ɨshɨ õr hnɨtewɨhɨ Porrosht ahɨr. Wɨr oshiyokõrni uje ich mɨhnũwo pork ye oniyokõrpe erze ley uje Moisés chichewkite. 16Uje yeẽk shiyokõr ɨr hutɨta chɨbɨte lahwoso uje tata uje toy nehe hn ese yet hnoy ɨr kushjãro per ye pwele doype erze kushjãro nehech nos ochɨraha uje wɨchɨ toy. 17Asa hutɨta uje chichew par uje ɨshɨm yet ɨr kushjãro ich ye jukur uje ehn ɨr ɨka, per uje toy ich wɨchɨ pwele hnoy ɨr kushjãro uje ɨshɨmni. 18Heke erze ahwoso uje Porrosht chɨbɨte wapkite shɨ uje oshuu loshɨpo oshuu toy hn ɨr armɨtsɨ noshɨ ich ɨr ahwoso ukurbosh. 19Uje Moisés nos tatɨm erze israel oso erze ley ich shuu wõjo hn kabɨr hn shuu ɨr armɨtsɨ ĩya yẽr hn shuu awɨt ĩya hn chɨpeẽsa obeje wesho ese phich uje iich otsɨɨ hisopo hn sakehe asa armɨsta ehet hn sɨta pɨkaap asa hutɨta waa je ley de hn nos sɨta wɨr oso shuu pɨkaap. 20Moisés tatɨm erze israel oso ɨm: —Ana armɨsta shuu olak owich om par ahakõrlo uje Porrosht tatɨm olak.— 21Moisés sɨta pɨkaap ese tabernakulo chĩ̵ra armɨsta toy hn nos sɨta erze kuche uje ochĩ̵ra par oteeychãha Porrosht. 22Erze ley uje Moisés chichewkite tata uje nos wɨr kuche uje ochĩ̵ra hn oteeychãha Porrosht wɨr uje sɨta chĩ̵ra armɨsta, shɨ sohmɨramo de uje ye dɨtape. Kɨmɨjɨ nĩhyok kuche uje oshuu oshuu toy hn ɨr armɨsta noshɨ par ɨshɨ bahat ich ye perdontɨkɨsh par erze kuche mɨhnũwo uje oshiyokõr. 23Titɨm olak. Ese tabernakulo hn erze kuche uje de ehet wɨr shɨ ɨtso uje de poõrc heke tyenɨj sɨta chĩ̵ra armɨsta par uje oteeychãha Porrosht. Per ese tabernakulo pisht hn erze kuche uje de ehet de wahacha poõrc heke nesita kuchɨt armɨsta uje ich ma om je loshɨpo armɨsta. 24Cristo ye masahape ese tabernakulo uje oso oshiyokõr. Wɨchɨ shɨ ɨtso ese tabernakulo pisht uje de wahacha poõrc. Cristo masaha poõrc hn tĩ̵r Porrosht ahɨr par uje takashɨm eyok. 25Uje kal terɨhɨ ãyt ich ese saserdote õr bahlut pisht uje de lɨka ĩ̵rmo hnoy armɨsta seya tabernakulo ehet. Asa armɨsta ye saserdote ɨr armɨtsape, per Cristo hnoy narmɨsta seya tabernakulo pisht ehet shɨ shuu owich nohmɨra. Ye doype kal ãyt duhu ɨre ɨlo ese saserdote õr bahlut pisht. 26Kɨmɨjɨ kal ãyt Cristo doy narmɨsta deya tabernakulo ehet ɨtso õr uje oshiyokõr ich shish Cristo tyenɨj toy kal ãyt shiyehe uje shiyokõr ɨrmõkite nehech ele ahle per ɨre ye niyokõr duhu ɨlorzpe. Per uje terɨhɨ ɨshɨrĩtkite ich Cristo tɨrẽt shɨ shuu owich nohmɨra hn ɨshɨmɨhɨ ɨre par uje oshuu oshuu toy hn ɨshɨ õr hnɨtewɨhɨ Porrosht ahɨr. 27Porrosht chɨbɨte uje nos wɨr oso shɨ owich nohmɨra uje otoy hn otĩ̵r Porrosht ɨle ɨkɨch nehe hn wɨchɨ teychɨm õr kɨmɨjɨ oniyokõr uje mɨhnũwo o kɨmɨjɨ ye oniyokõrpe. 28Heke Cristo ɨshɨm ɨre par uje oshuu oshuu toykite shɨ owich nohmɨra par uje ɨshɨ oso õr hnɨtewɨhɨ Porrosht ahɨr ich okɨhniya. Wɨchɨ tyenɨj cheeshpo nehe per ye par uje ɨshɨ õr hnɨtewpe. Shɨ tyenɨj cheeshpo nehe par uje hnoy erze uje oyem ɨre.

will be added

X\