HEBREOS 7

1Ese Melquisedec wɨchɨ reyɨhɨchɨs dɨt Salem. Wɨchɨ saserdote uje teeychãha Porrosht uje ich ma dich. Abraham hõr ohno otatskĩ̵rkite erze reye uje ich okɨhniya hõr ohyerptoso hn otserz õr. Uje Abraham cheeshpo hn chishɨhɨ Melquisedec dehet pehet hn Melquisedec chiyuhu lahwoso omoho ɨre. 2Abraham nos sehek erze kushjãro uje serz shuu po dye hn ɨshɨm Melquisedec nohmet. Ese pɨt nohmet uje ɨshɨm ɨre iich otsɨɨ dyesmo. Ese Melquisedec ɨr iich tata uje ɨre rey uje shish shiyokõr uje ich om. Wɨchɨ reyɨhɨchɨs dɨt Salem hn Salem tata uje õr aho kɨɨs heke wɨchɨ rey uje shuu õr aho kɨɨs. 3Wɨchɨ nĩhyok ɨr deych hn nĩhyok ɨr data hn ye ɨr poruwĩ̵rsh. Shish ɨr ɨkɨrĩt de. Nĩhyok webich osht hn nĩhyok uhurzosht per wɨchɨ shɨ ɨtso Porrosht Ijɨt. Wɨchɨ shish saserdote. Yelɨj nɨhna ɨre. 4Uhu olak eyuwo tɨsĩ̵r uje ese Melquisedec wɨchɨ dichpa. Eyok porokkite Abraham sehek erze kuche uje serzkite shuu po dye hn chishew ese nohmet uje iich otsɨɨ dyesmo hn ɨshɨm Melquisedec. 5Shɨ israel oso uje otãra Leví wɨr uje omasaha par Porrosht ɨbiyo uje iich otsɨɨ saserdote. Erze ley uje Moisés chichewkite tata uje oso tyenɨj otsehek erze uje otserz hn oshɨm nohmet erze Porrosht ɨbiyo uje õr iich otsɨɨ saserdote hn wɨr õr ɨhnapsoye. Nos otãra Abraham 6per Melquisedec ye tãra Levipe per Abraham sehek erze uje serz hn ɨshɨm ɨre nohmet uje iich otsɨɨ dyesmo. Porrosht chɨbɨte lahwoskite uje tyenɨj ɨshɨm Abraham kuchẽrk per Melquisedec ma dich je Abraham hn Melquisedec chiyuhu lawhoso omoho Abraham. 7Ich ɨmeheeych uje shɨ ese uje ich ma dich pwele chiyuhu lahwoso omoho ese yet. 8Erze oso uje otserz kuche oshɨm dyesmo erze uje otãra Leví, hn erze uje otãra Leví shish otoy ɨtso eyok. Per Abraham ɨshɨm dyesmo ese Melquisedec. Otata uje Melquisedec shish ɨka. 9Erze israel oso oshɨm ɨr dyesmo erze uje otãra Leví. Uje Abraham ɨshɨm Melquisedec dyesmo ich eyok pwele yẽrza uje Leví ɨshɨm toy 10pork uje Abraham chishɨhɨ Melquisedec dehet pehet ich ehn yahpaa Leví tãra Abraham petɨkkite. 11Porrosht shuu oshiyokõr debiyo erze uje otãra Leví. Erze ɨbiyo iich otsɨɨ saserdote heke nos ɨshɨm israel oso erze ley uje Moisés chichewkite. Kɨmɨjɨ erze saserdote hn erze ley doshɨ eyok hnɨtewɨhɨ Porrosht ahɨr ¿ich ɨnaapo heke Porrosht shuu Cristo tɨrẽtkite par masaha saserdote ɨtso Melquisedec? Ese Melquisedec ye tãra Leví hn Aaronpe. 12Kɨmɨjɨ Porrosht nos nontew erze saserdote õr ɨbiyo hn dɨbɨte saserdote yet uje ɨr ɨbiyo kɨnãho ich Porrosht tyenɨj shuu erze ɨr ley kɨnehe toy. 13Nos wɨr saserdote otãra Leví per Cristo ye tãra ɨrpe. Asa weeta uje Cristo tãra ye saserdõtɨrsh uje ochish obiyoho altar. 14Ich ɨmeheeych uje eyok Ɨrhĩch tãra Judá. Moisés ye tatɨm erze israel oso uje erze saserdote otãra Judá. 15Ich ɨmeheeych uje erze saserdote õr kɨnãho pork saserdote ahlt de uje ich shɨ ɨtso Melquisedec. 16Cristo masaha par saserdote per ye ley dɨbɨte ɨrpe. Wɨchɨ masaha par saserdote pork yelɨj nɨhna ɨre heke ɨr ukurbo de. 17Porrosht ahwoso tata uje Porrosht tatɨm Cristo ɨm: —Tuu amsaha par saserdote uje yelɨj nɨhna ɨre. Owa saserdote shɨ ɨtso Melquisedec.— 18Uje Porrosht tata shuu ɨtsorz ich iim erze ley uje ɨler pork ye ɨr ukũrbɨrsh hn ye jukur 19pork erze ley uje Moisés chichewkite ye doshɨ eyok hnɨtewɨhɨ Porrosht ahɨrpe. Per Porrosht shuu Cristo ɨshɨ eyok hnɨtewɨhɨ dahɨr hn shuu eyok owich de. Heke eyok pwele yɨtĩ̵r Porrosht ahɨr. 20Porrosht tata shuu ũrpa uje chɨbɨte Cristo par saserdote. 21Nos wɨr oso uje omasaha par saserdote shɨ ley wate uje chɨbɨte õr, per Cristo masaha par saserdote pork Porrosht tata shuu ũrpa uje chɨbɨte lahwoso tatɨm Cristo ɨm: —Yok Porrosht. Tɨbɨte pahwoso hn ye tuu peyuwo tɨsĩ̵r kɨnaha nehe. Owa saserdote uje yelɨj ehna owa.— 22Heke Jesús shuu yakaha erze uje Porrosht tata uje eyok owich de ɨre ahɨr per erze saserdote yewo ye õr pwele oniyokõr oduhu ɨlorzpe. 23Nos wɨr saserdote uje otãra Leví tyenɨj okɨhniya pork wɨr shɨ hnakɨrbo heke shɨ otoy hn yet tyenɨj masaha owich. 24Per Jesús yelɨj toy heke ye nesitpe uje saserdote yet masaha owich. 25Heke Cristo pwele tɨbey erze uje ye olotiis ɨrpe par uje shuu õr owich shish de Porrosht ahɨr pork ɨre shish ɨkɨrĩt de par sapur Porrosht par õr ɨre. 26Ich om uje Jesús wɨchɨ eyok saserdote uje ich dichpa. Ɨre yelɨj niyokõr uje mɨhnũwo, hn yelɨj duhu yeẽk niyokõr uje mɨhnũwo, hn ye kuche mɨhnũwo chɨhɨ ɨre ehetpe. Wɨchɨ de Porrosht ahɨr dukuhlehe erze uje oshiyokõr uje ich mɨhnũwo. Wɨchɨ ma dich je nos wɨr kuche uje de Porrosht ahɨr wahacha poõrc. 27Antni erze saserdote õr bahluwo shish oshuu loshɨpo par õr ɨre wap pork oshiyokõr uje ich mɨhnũwo hn oshuu loshɨpo toy par erze oso uje oshiyokõr uje ich mɨhnũwo. Per Cristo yelɨj duhu loshɨpo par ɨre pork yelɨj niyokõr uje mɨhnũwo. Wɨchɨ ɨshɨmɨhɨ ɨre par ɨshɨ oso õr hnɨtewɨhɨ Porrosht ahɨr hn ich ye niyokõrpo petɨk nehe. 28Erze oso uje omasaha par saserdote õr bahluwo shɨ omasaha pork ley tata. Wɨr oshiyokõr uje mɨhnũwo ɨtso erze oso yewo. Ich osdeyo uje asa ley de hn Porrosht chɨbɨte lahwoso shuu ũrpa uje ɨr Ijɨt masaha par saserdote. Wɨchɨ yelɨj niyokõr kuche mɨhnũwo hn yelɨj nɨhna ɨre.

will be added

X\