HEBREOS 6

1Titɨm olak. Oyiyokorãha olak Cristo oyuhu erahalo pɨkaapni per ele ahle sehe oyuhu erahalo ma nehech olak eyuwo ɨtso hnakɨrbo. Ye nesita oyiyokorãha olakpo erze uje oyiyokorãha olakni par uje moymlo kuche mɨhnũwo hn ye otiislo Porrosht. 2Oyiyokorãha olakni uje otohɨrm oso, hn ochɨbɨte nahme olak hu eeyo. Oyiyokorãha olak toy uje topo tyenɨj õr ɨkpo nehe, hn oyiyokorãha olak uje Porrosht tyenɨj chɨbɨte wɨr õr urhuta bahluta ehet nehe erze uje otsotiis ɨre hn shish odechɨ. 3Kɨmɨjɨ Porrosht nahmũr ich oyiyokorãha olak kuche ahlo 4pork ye eyok pwele yuhu yewo ocheeshɨ oteeychãha Porrosht erze uje ochuntni uje Jesús ɨshɨ õr hnɨtewɨhɨ Porrosht ahɨrkite, hn otsahmũr erze uje Porrosht shiyokõr par daabo, hn ochɨraha erze uje Porrosht Ɨchɨbich ɨshɨm daabo. 5Wɨr ochɨraha uje Porrosht ahwoso ich om hn ochɨraha uje Porrosht tyenɨj shiyokõr nehe chĩ̵ra lakɨrbo, 6per kɨmɨjɨ wɨr onoympa Porrosht hn otatɨm oso ɨtsorz ich ye pwelpe uje shuu ocheeshpo pork wɨr oshiyokõr shɨ ɨtso uje ochowɨshɨhɨ Porrosht Ijɨt krus eeychpo hn oshuu oso ochish majamichɨhɨ Cristo. 7Nos wɨr Porrosht aabo shɨ õr ɨtso ese hnɨmich uje iin yuwebo ɨlote hn shuu jõro tokole par erze uje ochukwẽr, hn erze jõro ee de. Nos wɨr erze uje om tãra Porrosht. 8Per kɨmɨjɨ ese hnɨmich shɨ wontɨ tokolɨhɨ hn shɨ pohɨr wontɨ tokolɨhɨ ich ye jukur. Ich yarhak uje hnɨmich yɨnsɨrc sajĩ̵r ese hnɨmich ɨkiyo hn sẽru. Ese hnɨmich ich shɨ ɨtso erze oso uje oym Porrosht. 9Pɨshɨbo watsaklo, oyitɨm olak oyuhu ɨtsorzɨke per oyotiis uje olak ɨtso ese hnɨmich uje shɨ wontɨ tokolɨhɨ per erze om uje tãra Porrosht tyenɨj tĩ̵r olak pork ye otiislo ɨrpe. 10Porrosht shish shiyokõr uje ich om heke ye dɨkeype ɨr ɨbiyo uje ahakõrloni hn ye dɨkeype uje ahmũrlo Porrosht aabo yewo hn akashɨmlo õr, hn shish ahakõrlo. 11Oyahmũr uje kal olak nohmɨr nohmɨr shish shiyokõr uje Porrosht sahmũr nehech terɨhɨ uhurc nehe hn Porrosht ɨshɨm olak ese uje chɨbɨtkite. 12Heke ye oyahmũrpe uje olak yeẽk shuu ɨre tok per sehe oyuhu eẽtlo erze uje ye olotiis Porroshtpe hn ye atarãhalo nehech Porrosht ɨshɨm olak erze uje chɨbɨtkite. 13Uje Porrosht chɨbɨte lahwoskite tatɨm Abraham ich nĩhyok uje yeẽk ma dich je Porrosht par shuu ɨmeheeych uje ɨr ahwoso ich ũru heke Porrosht shɨ eyucha ɨre uje tatɨm Abraham 14ɨm: —Ich yok uje titɨm owa uje tiyuhu pahwoso omoho owa hn tuu oso okɨhniya uje otãra owa nehe.— 15Heke Abraham ye tarãhape ese uje Porrosht chɨbɨte lahwoskite par ɨshɨm ɨre nehe nehech terɨhɨ ɨshɨrĩt hn ɨshɨm ɨre. 16Uje oso ochɨbɨte lahwoso par uje sehe oniyokõr kuchɨt ich ochiyuhu yet ɨr iich uje ich ma dich je õr par uje oshuu ɨmeheeych uje õr ahwoso ich ũru. Uje ochiyuhu yet ɨr iich oshuu ɨtsorz ich oym uje oshiyokosye. 17Porrosht sehe duhu ma ɨmeheeych uje ich ũru erze uje chɨbɨte lahwoskite par ɨshɨm õr heke Porrosht eyucha ɨre uje tatɨm õr. 18Erze kuche osiyer uje ye duhu kɨnãhape wɨchɨ ɨre hn ɨr ahwoso heke ich ɨmeheeych uje ye Porrosht nehnyẽr õrpe. Eyok uje ye yotiis Porrosht ich yɨrahalo uje eyok owich de ɨre ahɨr. Eyok aho kɨɨs pork tatɨm eyok erze kuche uje osiyer par shuu yɨrahalo uje eyok owich de ɨre ahɨr. 19Yɨrahalo erze uje Porrosht tata ich ũru. Eyok ye yotiispe erze ahwoso uje Porrosht tata heke ye eyok koswãhape per eyok ɨtso pohorrza uje ankla sontew par uje ye tĩ̵r lekɨtiyope. Ese uje ɨtso eyok ankla tẽhi wahacha poõrc templo ehet bortɨsht pɨt uje iich otsɨɨ kortina uje Porrosht de. 20Wapkite Jesús iyebe tĩ̵r wahacha par sɨtsẽr ese dehet uje tĩ̵r Porrosht par uje shuu eyok owich de Porrosht ahɨr pork wɨchɨ masaha par saserdote uje ich dichpa hn yelɨj nɨhna ɨre. Wɨchɨ saserdote shɨ ɨtso Melquisedec.

will be added

X\