HEBREOS 5

1Porrosht chiihla erze israel oso nohmɨr nohmɨr uje õr hnakɨrbo par omasaha par ɨr ɨbiyo uje iich otsɨɨ saserdote bahlut pisht. Wɨchɨ uje hnoy erze kuche uje oso oshɨmɨhɨ Porrosht, hn ɨshɨm Porrosht erze loshɨpo uje oshuu par erze kuche mɨhnũwo uje õr ɨre oshiyokõr par uje Porrosht perdonar õr. 2Ye ɨr ukũrbɨrsh pork shɨ hnakɨrap ɨtso erze oso yewo hn shiyokõr mɨhnũwo ɨtso õr heke pwele hneta erze uje ye odɨraha uje mĩ̵hnɨk hn shɨ oshiyokõr hn erze uje onãha. 3Ese uje ɨr ɨbiyo iich otsɨɨ saserdote shɨ hnakɨrap heke tyenɨj shuu loshɨpɨt toy par ɨshɨm Porrosht par erze kuche mɨhnũwo uje shiyokõr par Porrosht perdonar ɨre shɨ ɨtso uje ɨshɨm Porrosht par erze oso yewo toy. 4Ye latɨk dɨbɨte ɨre par masaha hn shiyokõr erze obiyo uje iich otsɨɨ saserdote. Shɨ Porrosht wɨchɨ uje pwele chiihla yeẽk par saserdote shɨ ɨtso uje chiihla Aaronkite. 5Cristo ɨtspo, ye dɨbɨte ɨrpe par saserdote uje ich dichpa. Shɨ Porrosht wɨchɨ uje chiihla ɨre hn tatɨm ɨm: —Owa uu yok Pijɨt. Ele ahle tuu amsaha par ahakõr pɨbiyo heke tuu owa shũrha.— 6Porrosht ahwoso tatehe owich yetpo shuu ɨtsorz: —Porrosht ɨm: “Owa saserdote uje yelɨj ehna owa. Shɨ owa saserdote ɨtso Melquisedec.”— 7Uje ehn Cristo de nãhu ɨrmõkite ich orar sapur Porrosht ich sɨhnew. Ich yerh uje sapur Porrosht pork chɨraha uje wɨchɨ ukurbo de par takashɨm ɨre kɨmɨjɨ nahmũr par uje ye tope. Wɨchɨ tola Porrosht heke Porrosht tẽr ɨre. 8Jesús wɨchɨ Porrosht Ijɨt pisht per uje oshiyokõr mɨhnɨkĩ̵hɨ ɨre ich ewenta hn shish shiyokõr uje Porrosht sahmũr 9hn yelɨj niyokõr uje mĩ̵hnɨk heke shɨ ɨre nohmɨra uje ɨshɨm ɨkɨrĩt uje yelɨj nɨhna ɨre erze uje oshiyokõr uje ɨre tata. 10Porrosht chiihla wɨchɨ par saserdote uje ich dichpa shɨ ɨtso Melquisedec. 11Kuche de ich kɨhniya uje sehe oyitɨm olak uje Cristo wɨchɨ saserdote shɨ ɨtso Melquisedec per olak shɨ olak ɨtso armo heke ye õryok pwele oyuhu erahalope. 12Ich osdeyo uje olak Porrosht aabo heke tyenɨj ahakorãhalo yewo per olak nesita uje yeẽk shiyokorãha olakpo erze uje oyiyokorãha olak wapni. Shɨ olak ɨtso pɨkɨhnino ijaabo uje yesh ochuku pork yahpaa õr pwele uje otaakpe. 13Erze uje shɨ õr ɨtso pɨkɨhnino ijaabo uje yesh ochuku wɨr uje yẽrɨj odɨraha Porrosht ahwoso. 14Per erze uje ich õr deyo otew erze oposo pisho. Erze uje oyɨteẽtaka shuu ɨmeheeych uje erze uje sehe oyitɨm olak wɨr shɨ par erze uje õr eyuwosh pork shish õr prowa nehech ochɨraha uje ich om hn ye onahmũr uje ich mɨhnũwo.

will be added

X\