HEBREOS 4

1Heke titɨm olak erze Porrosht ahwoso uje chɨbɨtkite par uje otsakaha ɨtso uje ɨre sakaha pork yahpaa dihyerupe. Abeylshɨp olak. Heke uje terɨhɨ ese uhurc nehe ich nĩhyok ye olak yeẽk nihyokĩ̵hɨ ese owichpe. 2Otatɨm eyok erze ahwoso uje ich om shɨ ɨtso uje otatɨm eyok poruwo wɨshkite per par õr ɨre ich ye jukur pork otsotiis. 3Per eyok uje ye yotiispe uje otatɨm eyok ich eyok owich de Porrosht ahɨr uje ɨre sakaha. Porrosht ahwoso tata uje ɨre chɨbɨte lahwoso ɨm: —Towãha õr heke tɨbɨte pahwoso par uje ye tuu omasahape ese owich uje yok tiyakaha.— Uje Porrosht chɨmɨt uje shiyokõr ɨrmõkite ich chɨmɨt toy ese owich par uje otsakaha. 4Porrosht ahwoso tata ɨm: —Uje terɨhɨ deeych syetekite ich Porrosht sakɨr pork nos chɨmɨt debiyo.— Heke ich ɨmeheeych uje owich de par uje otsakɨr. 5Hn Porrosht ahwoso tata toy ɨm: —Ye tuu wɨr omasahape ese owich uje yok tiyakaha.— 6Erze oso webich oso uje ochunt erze ahwoso uje ich om ich ye omasahape pork ye oniyokõrpe uje Porrosht sahmũr heke shish owich dechɨ par yewo omasaha. 7Porrosht chɨbɨte uje deeych yet nehe hn yewo omasaha ese owich pork osdeyo uje ye omasaha petɨkkite heke shuu David chichew lahwoso ɨm: —Ele ahle uje ẽntlo uje Porrosht tata ich ye uhu olak hu kata.— Ese deeych yet nehe uje tatni wɨchɨ ele ahle. 8Josué hnoy erze israel oso seya õr Canaankite. Canaan ye wɨchɨ owichpe uje Porrosht sakaha heke tatɨm David uje deeych yet nehe hn omasaha ese owich uje ɨre sakaha. 9Heke shish owich de par erze uje ye olotiis Porroshtpe par uje otsakaha 10pork uje yeẽk masaha ese owich uje Porrosht sakaha ich iim debiyo shɨ ɨtso Porrosht uje iim debiyo. 11Heke tyenɨj yiyuhulo eyok par uje yomsahalo ese owich hn yiyakahalo par uje nĩhyok eyok yeẽk ɨlo erze uje ye oniyokõrpe uje Porrosht tata heke ye omasahape. 12Porrosht ahwoso ɨkɨrĩt de hn chish obiyoho õr aho. Wɨchɨ shɨ ɨtso kɨskɨrehet uje ich watakpa. Ma watak je espada uje otsata pɨt hn pɨt yet heke wɨchɨ nos chɨbɨte õr ɨluu orhõta hn chɨbɨte orhõta toy erze uje de õr eyuwo shɨ ɨtso uje sehek yeẽk ehet hn shuu ɨr ɨkɨrĩt tĩ̵r pɨt hn ɨr ɨchɨbich tĩ̵r pɨt yet, hn sehek lebiyo par uje ye duhu lakaha lalerzpe, hn sehekpo ese uje de lebiyo ehet. Heke chɨbɨte eyok eyuwo hn ɨluu orhõta. 13Porrosht nos shiyokõr wɨr kuche heke ich nĩhyok ye latɨk pwele uje sakɨs ɨre. Nos ɨmeheeychɨhɨ Porrosht ɨle ɨkɨch. Deeych yet nehe hn nos tyenɨj yɨtĩ̵r Porrosht ɨle ɨkɨch hn yitɨm ɨre uje yiyokõrlo. 14Titɨm olak uje eyok saserdote de uje ich dichpa. Hno tĩ̵r poõrzkite. Wɨchɨ Jesús uu Porrosht Ijɨt pisht. Heke shish tyenɨj ye yotiislo ɨre hn yitɨmlo oso yewo toy. 15Eyok saserdote chuuna uje ye eyok ukũrbɨrsh hn takashɨm eyok pork uje ehn wɨchɨ de ɨrmõkite ich sehe oduhu niyokõr uje mɨhnũwo shɨ ɨtso uje sehe oduhu yiyokõrlo uje mɨhnũwo toy per wɨchɨ yelɨj niyokõr uje mĩ̵hnɨk. 16Heke ye yɨtɨla uje yapur Porrosht erze kuche uje eyok nesita. Tyenɨj yiyokõr yuhu ɨtso uje yɨtĩ̵r Porrosht ɨle ɨkɨch uje sakaha debɨta eeych. Wɨchɨ chuuna uje eyok losuhlaabo heke uje eyok nesita kuche ich takashɨm eyok.

will be added

X\