HEBREOS 3

1Pɨshɨbo watsaklo, olak uje olak Porrosht aabo, wɨchɨ chiihla olak par ahakõrlo uje ɨre sahmũr. Sehe tuu olak eyucha Jesús. Porrosht shuu tɨrẽtkite hn shuu wɨchɨ saserdote par uje shish takashɨm eyok uje ye yotiislo ɨrpe. 2Porrosht chiihla Moiseskite hn wɨchɨ nos shiyokõr erze obiyo uje ɨshɨm ɨre uje de erze israel oso õr ahɨr. Erze israel oso wɨr shɨ ɨtso Porrosht ihyuch. Porrosht chiihla Jesús toy hn wɨchɨ nos shiyokõr ɨr ɨbiyo shɨ ɨtso Moisés. 3Per Jesús wɨchɨ ma dich je Moisés shɨ ɨtso ese hnakɨrbich uje shiyokõr pwertɨt wɨchɨ ma bale je ese pwertɨt. 4Nos wɨr pwerto uje de shish yeẽk de uje shiyokõr, per Porrosht wɨchɨ uje nos shiyokõr erze kuche. 5Moisés shish shiyokõr uje Porrosht tatɨm ɨre. Shiyokorãha erze israel oso uje õr ɨtso Porrosht ihyuch. Moisés wɨchɨ Porrosht ɨbɨk uje tatɨm oso erze kuche uje Porrosht tatɨm ɨre uje tyenɨj shuu tokole nehe. 6Cristo shish shiyokõr uje Porrosht tatɨm ɨre toy. Shiyokorãha erze oso toy uje õr ɨtso Porrosht ihyuch, per wɨchɨ uu Porrosht Ijɨt pisht, ye ɨlo Moisespe uje shɨ Porrosht ɨbɨk. Eyok Porrosht ɨr ihyuch uje ye yotiislo Cristo hn yitɨm oso uje eyok owich de Porrosht ahɨr. 7Titɨm olak uje Porrosht ahwoso tata uje ɨr Ɨchɨbich tatɨm oso ɨm: —Ele ahle uje ẽntlo uje Porrosht tata 8ye uhu olak hu kata ɨlo erze israel oso uje ye onahmũr otẽr uje Porrosht tatɨm õrkite. Wɨr otsepɨ Porrosht uje odechɨ ese hnɨmich uje ɨsa.— 9Hn Porrosht tata ɨm: —Olak poruwo wɨshɨ omo erze kuche uje tiyokõr nehech kwarenta ãyo uje ode wahacha ese hnɨmich uje ɨsakite per shish otsepɨ yok. 10Heke erze israel oso oshuu tiispulo. Tiita uje erze oso ich shish õr hu kata. Shɨ sehe oniyokõr uje õr ɨre otsahmũr. Ye odɨraha pɨluupe. 11Heke towãha õr par uje ye tokosɨm õr ese hnɨmich par otsakaha uje tɨbɨte pahwoskite par tokosɨm erze uje otãra Abraham.— 12Pɨshɨbo watsaklo, abeylshɨp olak par uje ye olak yeẽk duhu deyuwo mɨhnũwo hn lotiis uje Porrosht tata hn iim Porrosht uje ɨka. 13Per kal deeych shish tyenɨj akɨtloye nehech terɨhɨ uhurc par uje nĩhyok olak yeẽk shuu erze kuche mɨhnũwo yakaha ɨre. 14Kɨmɨjɨ ye yotiislo Cristo nehech terɨhɨ uhurc ich eyok owich de Porrosht ahɨr. 15Porrosht ahwoso tata shuu ɨtsorz: —Ele ahle uje ẽrlo uje Porrosht tata ye uhu olak hu kata ɨlo erze israel oso uje oshuu dehe katakite.— 16Olak eyucha erze uje ochunt Porrosht ahwoskite hn oshuu dehe kata. Nos wɨr israel oso uje Moisés chiyuhu orĩ̵hɨ erze egipto oso õr hnɨmichkite wɨr uje oshuu dehe kata. 17Olak eyucha erze uje Porrosht sowãha õrkite nehech terɨhɨ kwarenta ãyo. Wɨr shɨ erze israel oso uje oshiyokõr uje ich mɨhnũwo. Wɨr otooho ese hnɨmichkite uje ɨsa. 18Olak eyucha erze uje Porrosht chɨbɨte lahwoso par uje ye dosɨm õrpe ese hnɨmich par olebuhu. Wɨr shɨ erze uje ye oniyokõrpe uje ɨre sahmũr. 19Ich ɨmeheeych uje ye õr pwele omasaha ese hnɨmichpe pork otsotiis Porroshtkite.

will be added

X\