HEBREOS 2

1Heke titɨm olak. Tyenɨj yẽrlopa hn yiyokõrlo uje Cristo tata par uje ye yukwimlo erze ahwoso uje ich ũru. 2Porrosht tatɨm ɨr anjele par shuu otaiɨm Moisés lahwoskite par tatɨm oso. Erze ahwoso ich ũru heke erze oso uje ye onahmũr oniyokõr erze Porrosht ahwoso uje anjele otatɨm õr ich oshɨ labahat pork oshiyokõr uje ich mɨhnũwo. 3Kɨmɨjɨ yotiis uje Jesús tata uje ɨshɨ eyok hnɨtewɨhɨ Porrosht ahɨrkite ¿yuhu ɨnaapo par uje eyok yuhwoho Porrosht ɨr hme par ye depyẽr eyok? Wap eyok Ɨrhĩch tatɨm oso shuu ɨtsorz hn erze uje otẽr ɨre otatɨm õryok. 4Porrosht shuu oshiyokõr kuche uje ye latɨk pwele shiyokõr uje shuu oso ochishlabe par shuu ochɨraha uje õr ahwoso ich ũru. Ich shuu ɨmeheeych toy uje õr ahwoso ich ũru pork Porrosht Ɨchɨbich ɨshɨm Porrosht aabo õr eyuwo kɨnãho kɨnãho par uje sehe duhu oniyokõr ɨr ɨbiyo kɨnãho kɨnãho. 5Porrosht ye dɨbɨte erze anjele õr hmepe ese ĩ̵rmo uje tyenɨj shiyokõr nehe uje oyitɨm olakɨke hn nos wɨr kushjãro par uje otɨbey. 6Porrosht ahwoso tata uje yeẽk tatɨm Porrosht ɨm: —¿Ɨnaapo heke shish uhu eyuwo tɨsĩ̵r oso? ¿Ɨnaapo heke sehe akashɨm õr? 7Owa uhu erze anjele ma õr ukurbosh je ese hnakɨrbich uje iich otsɨɨ Adán per uhu ɨre dich 8pork nos ebɨte erze kuche Adán ɨr hme.— Uje Porrosht nos chɨbɨte erze kuche ɨr hme shuu ɨtsorz ich chɨbɨte ɨre par nos tɨbey erze kuche, per ele ahle ich ɨmeheeych uje ye oso otɨbey erze kuchepe. 9Per eyok eyucha Jesús. Porrosht nos sahmũr oso heke shuu Jesús ɨr ukurbo ɨtso oso õr ukurbo, ye ɨlo erze anjele õr ukurbope. Uje oso oshuu ɨre oshuu toy ich shuu Jesús dichpa pork wɨchɨ tooho osokite. 10Nos wɨr kuche uje Porrosht shiyokõrkite wɨr par ɨre. Ich om uje shuu Cristo ewenta erze uje oso oshiyokorĩ̵hɨ ɨre nehech oshuu oshuu toy par ɨshɨ oso õr hnɨtewɨhɨ Porrosht ahɨr. Heke ich ompa uje Cristo shuu okɨhniya omasaha par Porrosht aabo. 11Cristo wɨchɨ uje shuu eyok Porrosht aabo. Cristo ɨr Deych wɨchɨ Porrosht hn wɨchɨ eyok Deych toy, heke Cristo ye poym eyok uje chii eyok leshɨboho. 12Porrosht ahwoso tata uje Cristo tatɨm Deych ɨm: —Titɨm pɨshɨbo owa eluu. Uje otakɨsho lawich par oteychãha owa ich yok de õr ahɨr toy hn tɨkeeychɨ teẽt imno tɨkeeychãha owa.— 13Porrosht ahwoso tatpo ɨm: —Cristo tatɨm Deych ɨm: “Ye tokotiis owape.”— Hn Porrosht ahwoso tata ɨm: —Cristo tatɨm Deych ɨm: “Yok de lɨka hõr wɨr aabo uje asɨm yokni.”— 14Eyok ẽro de hn eyok armɨsta de heke Cristo ɨr ẽro de hn ɨr armɨsta de toy par uje pwele tooho krus eeych. Uje tokite ich sɨhna ese dyablo ɨr ukurbo uje shuu oso otoy. 15Nos wɨr oso shish otola uje otoy per Cristo tooho õrkite par uje ye juhu otolape uje otoy. 16Ich ũru uje ye tɨrẽt petɨkni par sosɨr erze anjele. Shɨ tɨrẽt par uje sosɨr erze uje otãra Abraham, hn erze uje ye olotiis Porrosht shɨ õr ɨtso Abraham uje ye lotiispe 17heke shuu Cristo hnakɨrappa ɨtso erze uje otãra Abraham par uje chuuna uje oso õr losuhlaabo. Heke ɨre masaha par Porrosht ɨbɨk uje iich otsɨɨ saserdote uje sosɨr oso hn shish shiyokõr Porrosht ɨbiyo par uje ɨshɨ oso õr hnɨtewɨhɨ Porrosht ahɨr. 18Cristo ewenta uje oso sehe oduhu niyokõr uje mɨhnũwo heke ele ahle pwele takashɨm erze uje yewo sehe oduhu oniyokõr uje mɨhnũwo.

will be added

X\