HEBREOS 13

1Shish tyenɨj ahmũrloye pork nos olak leshɨbye pork ye otiislo Cristope. 2Ye ekeylo uje akashɨmlo Porrosht aabo yewo uje ye erahalo õrpe uhulo otsakaha olak ihyuwo. Porrosht aabo ode uje oshiyokõr oshuu ɨtsorz ich otakashɨm anjele per ye odɨraha uje wɨr anjelepe. 3Olak eyucha erze Porrosht aabo yewo uje ode karsel ehet hn eenɨlo shɨ ɨtso uje meylo orĩ̵hɨ karsel ehet. Olak eyucha erze Porrosht aabo uje yewo oloter õr hn eenɨlo shɨ ɨtso uje oloter olak toy. 4Porrosht wɨchɨ uje shuu oso õyhiye ahɨr heke ye ompe uje uhulo ye jukur. Porrosht tyenɨj sepyẽr erze hnakɨrbo hn tɨmcher uje ye onõyhi pɨshye ahɨrpe, shɨ omuhuye ahɨr. Tyenɨj sepyẽr erze uje otorãhaye hn erze tɨmcher uje õyhi yẽr ahɨr, hn erze uje hnakɨrbo uje õyhiye ahɨr hn erze uje otsahat loshɨpo, hn erze uje oshuu loshɨpo sahat ɨre. 5Ye ompe uje ahmũrlo hnote. Uhu olak aho kɨɨs erze kuche uje de olak ahɨr pork eyok Ɨrhĩch tata ɨm: —Shish takashɨm olak. Ye tokoym olakpe.— 6Heke ye eyok koswãhape uje yiita ɨtso uje profet yet tata shuu ɨtsorz ɨm: —Pɨnsɨrc takashɨm yok heke ye tɨkɨtɨla latɨk uje oso õr pwele oshiyokorĩ̵hɨ yok.— 7Titɨm olak par uje olak eyucha erze olak bahluwo uje otsanɨmɨrãha Porrosht ahwoso otatɨm olak hn olak eyucha uje oshiyokõr pork wɨr ye olotiis Porroshtpe. Tyenɨj eẽtlo õr. 8Jesucristo ɨr ɨluu shish ɨtsye uje wapni nehech ele ahle hn shish ɨtsye nehe. 9Ye uhulo yeẽk nehnyẽr olak hn niyokorãha olak ahwoso kɨnãho. Erze uje elɨlo ye duhu olak ɨluu ompe. Shɨ uje ye otiislo Porroshtpe. Wɨchɨ uje shuu olak ɨluu ma om. Erze uje ochɨbɨte uje ye otew erze kuche ẽrope oshuu deyuwo tɨsĩ̵r uje wɨr takashɨm õr per ye duhu õr ɨluu ompe. 10Erze uje oshuu loshɨpo hn ochɨbɨte altar eeych par uje sehe oduhu doshɨ ɨr hnɨtewɨhɨ Porrosht ahɨr wɨr otsotiis Cristo heke ye doshɨ õr hnɨtewɨhɨ Porrosht ahɨrpe per ɨshɨ eyok hnɨtew pork ye yotiislo ɨrpe. 11Erze israel oso õr saserdote bahlut pisht shuu loshɨpo hn hnoy armɨsta seya ese tabernakulo ehet par uje ɨshɨ õr hnɨtewɨhɨ Porrosht ahɨr. Hnakɨrbo ohnoy erze loshɨpo otseya dɨt nẽr hn otserũhuchɨs. 12Jesús ɨtspo, ochiyuhu ɨre ese dɨt ehetkite hn oshuuhu wahacha oshuu toy dɨt nẽr. Ɨr armɨsta noshɨ par ɨshɨ oso õr hnɨtewɨhɨ Porrosht ahɨr. 13Heke tyenɨj yiyokõrlo shɨ ɨtso uje yukwim ese dɨt uje ɨluu ɨler de hn yiyakahalo Cristo ahɨr wahacha ejwert. Uje oso oshiyokorĩ̵hɨ eyok uje mɨhnũwo ich shish tyenɨj eyok ewenta shɨ ɨtso uje Cristo ewentkite. 14Ye shish eyok owich chɨhɨpe ahnũwo duwo uje de ĩ̵rmo. Shɨ yiyem ese dɨt uje tãra poõrc nehe, 15heke shish tyenɨj eyok narim Porrosht pork shish yiita uje ye yotiislo Cristope. 16Ye ekeylo ahakõrlo uje om hn akashɨmlo yewo uje kuche nihyokĩ̵hɨ õr ahɨr pork Porrosht sahmũr uje ahakõrlo uhulo ɨtsorz pork ich shɨ ɨtso uje asɨmɨhɨlo Porrosht. 17Ahakõrlo uje olak bahluwo uje ode iglesya ehet otatɨm olak pork õr ɨre shish otɨbey olak. Deeych yet nehe hn olak bahluwo tyenɨj otatɨm Porrosht debiyo uje oshiyokõr. Uhulo õr ayla uje oshiyokõr erze obiyo, ye uhulo õr dosdarak. Uje uhulo õr dosdarak ich ye ompe par olak. 18Sehe tuu olak orar par õryok pork oyɨraha uje ye oyiyokõr uje ich mɨhnũwope. Sehe shish oyiyokõr uje ich om. 19Sehe tuu enaha olak uje olak orar apurlo Porrosht par yok toy par uje yok pwele takaashpo shɨchish tekɨrɨhɨ olak nehe. 20Porrosht wɨchɨ uje shuu oso õr aho kɨɨs. Wɨchɨ uje shuu eyok Ɨrhĩch Jesús ɨkpokite. Jesús wɨchɨ eyok bahlut pisht. Wɨchɨ ɨtso pastor uje tɨbey ɨr obeje hn eyok uje eyok Porrosht aabo shɨ eyok ɨtso obeje. Wɨchɨ tɨbey eyok pork sõrhɨr narmɨstakite hn ɨshɨ eyok hnɨtewɨhɨ Porrosht ahɨr shuu ɨtso uje Porrosht chɨbɨte lahwoso par uje Cristo shiyokõr hn yelɨj duhu kɨnaha. 21Sehe tuu Porrosht dosɨm olak nos wɨr kuche uje olak nesita uje om par uje olak pwele ahakõrlo uje ɨre sahmũr. Jesucristo ɨshɨ olak hnɨtewkite heke Porrosht takashɨm olak shuu ahakõrlo uje ɨre sahmũr. Tyenɨj shish olak narim Cristo. Ich ɨhĩ̵rtpa kɨmɨjɨ ahakõrlo uhulo ɨlorz. 22Pɨshɨbo watsaklo, sehe tuu ahakõrlo ahnũwo pahwoso uje tichew tɨbɨte ana hutɨta. Ye pahwoso berzope. 23Sehe tuu erahalo uje eyok leshɨbich Timoteo ochiyuhu karsel ehetni. Kɨmɨjɨ taachĩ̵hɨ pahɨr shɨchish nehe hn oyuko oyukwĩyaye oyekɨrɨhɨ olak. 24Tokosɨm saludo nos wɨr Porrosht aabo õr bahluwo hn nos wɨr Porrosht aabo toy. Nos wɨr Porrosht aabo uje odebuhu hnɨmich Italia oshɨm olak saludo toy. 25Sehe tuu Porrosht dosɨr olak. Shɨ erze uje tichew tɨbɨte ana hutɨta.

will be added

X\