HEBREOS 11

1Uje ye yotiislo Porroshtpe ich yɨrahalo uje ich ũru erze uje chɨbɨte lahwoskite par ɨshɨm eyok nehe. Wɨr yelɨj yomo per yɨrahalo uje deeych yet nehe hn ɨshɨm eyok. 2Eyok poruwo wɨshɨ ye olotiispe uje Porrosht tatɨm õrkite heke Porrosht tata uje oshiyokõr uje ich om. 3Ye yotiis Porroshtpe heke yɨrahalo uje shiyokõr nãhu ɨrmõkite shɨ chĩ̵ra lahwoso. Erze kuche uje yesh yeychɨmlo wɨchɨ shiyokõr chĩ̵ra kuche uje ye eyok pwele yomope. 4Abel ye lotiis Porrosht petɨkkite heke ɨshɨm Porrosht kuche uje ich ma om je uje Caín ɨshɨm Porrosht heke Porrosht tata uje Abel shiyokõr uje ich om hn ɨm: —Ɨr owich de pahɨr.— Heke ich ɨmeheeych uje Porrosht sahmũr ese uje Abel ɨshɨm ɨre. Abel tokite per shish oso ochunt uje ye lotiis Porroshtpe. 5Enoc ye lotiis Porrosht petɨkkite hn Porrosht hnoy ɨre seya poõrc par uje ye tope. Ochukwi per ye latɨk dish ɨre pork Porrosht hnoy. Uje ehn yahpaa Porrosht doy Enockite ich otata uje Enoc shiyokõr uje Porrosht sahmũr. 6Kɨmɨjɨ yeẽk dotiis Porrosht ich yelɨj duhu Porrosht aylɨhɨ ɨre. Uje sehe yeẽk dɨtĩ̵r ɨre Porrosht ich tyenɨj ye lotiis uje ɨre de hn tyenɨj ye lotiis uje Porrosht ɨshɨm premyo erze uje ochukwi ɨre. 7Uje Porrosht tatɨm Noé uje tyenɨj kɨrsyent bahlut tɨrẽt ich wɨchɨ ye lotiis ɨrpe. Yelɨj oso onomo erze uje tyenɨj tɨrẽt tĩ̵r õr. Noé shiyokõr asa pohorrza par uje õr ɨre ye otope. Shɨ uje Noé ye lotiis Porroshtpe ich chɨbɨte orhõta uje erze oso uje ode nãhu ĩ̵rmo õr ɨluu mɨhnũ hn tyenɨj otoy. Ɨr owich de Porrosht ahɨr shɨ pork ye lotiis ɨrpe. 8Titɨm olak uje Porrosht tatɨm Abraham par shuu iim ese dawich uje ɨre de par ɨshɨm ese owich yet nehe ich ye lotiis Porrosht petɨkkite. Uje tokolɨhɨchɨs ich ye dɨraha uje hno tĩ̵r. 9Ye lotiis Porroshtpe heke debuhu wahacha ese hnɨmich uje Porrosht chɨbɨte lahwoskite par ɨshɨm ɨre. Abraham wɨchɨ dihip kɨnaha wahacha hn shɨ debuhu karpɨt uut. Ɨr ijɨt Isaac hn ɨr ahnɨmich Jacob odebuhu karpa uulo toy. Porrosht tatɨm õr toy uje tyenɨj ɨshɨm õr ese hnɨmich nehe. 10Abraham shish iyem ese dɨt uje Porrosht shiyokõr. Porrosht shuu ese dɨt sakaha kojano eeyo ye ɨlo karpɨt uje shɨ ohnoy. 11Sara ɨtspo ye lotiis Porrosht petɨkkite heke Porrosht ɨshɨm ɨr ukurbo par ɨr ijɨtɨsh. Uje ɨr ijɨt shũrha ich wate ɨlarpa. Iyuwe erze ɨshĩ̵ryo uje tɨmcher õr aabosh per wate ye lotiis uje Porrosht shuu lahwoso yakaha uje tatɨm ɨre. 12Abraham ich ɨlarpa per aabosh hn oso otãra ɨre ich okɨhniya. Ye latɨk pwele tɨskẽr õr. Wɨr shɨ õr ɨtso porrzeebe uje de poõrc hn shɨ õr ɨtso hnɨmich ukult uje de onoot bahlut wɨrc. 13Abraham hõr otokite per shish ye olotiispe uje Porrosht tyenɨj ɨshɨm õr ese hnɨmich uje chɨbɨte lahwoso par ɨshɨm õr nehe. Nos wɨr õr ɨre ye olotiispe shɨ ɨtso uje omo uje Porrosht ɨshɨm õr hn õr ayla. Õr ɨre otata uje õr dihipo kɨnãho uje ode nãhu ĩ̵rmo pork õr owich de poõrc. 14Uje otata oshuu ɨtsorz ich ochɨbɨte orhõta uje õr eyuwo tɨsɨrĩ̵hɨ õr owich pisht uje odebuhu nehe. 15Kɨmɨjɨ oduhu deyuwo tɨsɨrĩ̵hɨ ese hnɨmich uje otokolɨhɨni ich õr pwele ocheeshpo. 16Per wɨr oyeem ese owich uje ich ma om je ese owich yet uje otãrni. Wɨr oyeem ese õr owich uje de poõrc heke Porrosht ye pookpe uje wɨr otata uje ɨre uu õr Porrosht. Wɨchɨ shiyokõr dɨtni par õr ɨre. 17Porrosht sehe duhu Abraham duhu ɨmeheeych uje ye lotiis ɨrpe heke tatɨm Abraham par ɨshɨmɨhɨ Isaac ɨre shɨ ɨtso uje oshuu loshɨpɨt hn otsẽru. Abraham de par shuu ese deyjɨt nohmɨramɨt uje Porrosht chɨbɨte lahwosni 18tatɨm ɨre uje oso okɨhniya tyenɨj otãra Isaac. 19Abraham chɨraha uje Porrosht ukurbo deyo de hn pwele shuu topo õr ɨkpo heke shɨ ɨtso uje shuu Abraham ijɨt Isaac ɨkponi. 20Isaac ye lotiis Porrosht petɨkkite heke chiyuhu lahwoso omoho deyjo Jacob hn Esaú. 21Jacob ye lotiis Porrosht petɨkkite, heke uje terɨhɨ par uje toy hn chiyuhu lahwoso omoho José aabo. Jacob tɨtɨla detɨlta hn teeychãha Porrosht. 22José ye lotiis Porrosht petɨkkite, heke uje ich terɨhɨ par toy hn tatɨm erze deeyso israel oso par uje ohnoy erze ɨr debiyo nehe uje otokolɨhɨ erze egipto oso õr hnɨmich par ochihitsɨmɨhɨ wahacha hnɨmich uje otĩ̵r par odebuhu. 23Moisés ɨr deych hn ɨr data ye olotiis Porroshtpe, heke uje Moisés shurhãkite ich otsakɨs nehech shekurko tre pork õr ɨre oteychɨm ese pɨkɨhnint ich ɨhĩ̵rtpa hn ye otola ese reype uje chɨbɨte ley par uje shuu oshuu pɨkɨhnino. 24Moisés ye lotiis Porroshtpe heke uje ich terɨhɨ leherzkite ich ye nahmũrpe uje otata otsɨɨ rey faraón ijɨta ɨr ijo. 25Ma sahmũr uje ĩya erze oso uje Porrosht chiihla õr uje oso yewo oloter õr hn ye nahmũr nõyape erze uje ich õr ayla uje oshiyokõr uje ich mɨhnũwo. Wɨr shɨ õr ayla par daalo arhaabo ich õr dosdarakpo. 26Moisés chibɨte uje ich ma om ĩya erze uje ye olotiis Cristo hn ewenta erze kuche mɨhnũwo uje yewo oshiyokorĩ̵hɨ õr. Wɨchɨ shuu deyuwo tɨsĩ̵r kɨmɨjɨ ɨre ewenta erze mɨhnũwo uje tĩ̵r ɨre ich ma om je erze hnote uje de egipto oso õr hnɨmich pork wɨchɨ eyuwo tɨsĩ̵r erze premyo uje Porrosht tyenɨj ɨshɨm erze uje ye olotiis ɨre nehe. 27Moisés ye lotiis Porroshtpe heke tokolɨhɨ ese egipto oso õr hnɨmichkite. Ese rey ich sɨtak ɨre per Moisés ye tola ɨrpe. Wɨchɨ shɨ ewenta erze uje tĩ̵r ɨre pork ye lotiis Porroshtpe shɨ ɨtso uje umo Porrosht per ye latɨk pwele nomo ɨre. 28Ye lotiis Porroshtpe heke shiyokõr ese õr ahamich webich osht uje iich otsɨɨ Pascua. Shuu oshuu obeje hn otormĩ̵hɨ armɨsta pwert uhur ujuwo uje otsɨɨ marko par uje ese anjel uje shuu õr aabo webich oso ye duhu wɨr õr aabope. 29Erze israel oso ye olotiis Porrosht petɨkkite heke uje ochɨkãha asa onoota bahluta waa je iich otsɨɨ Mar Rojo ich ochɨkãha hnɨmich uje kako. Per erze egipto oso õr ohyerptoso õr prowa ochɨkãha õr ɨjɨch toy hn nos õr hmarta. 30Erze israel oso ye olotiis Porroshtpe heke shish ochɨpeẽsa ese dɨt Jericó daalo syete hn ese moraylt kay uje chɨpeẽsa ese dɨt. 31Rahab wate tɨmcharrza yɨtoro. Ye lotiis Porroshtpe hn takashɨm erze israel oso õr pahnekite heke ye wate toy petɨkni nõya erze nanapso uje ye oniyokõrpe uje Porrosht sahmũr. 32Ye tahmũrpe uje titɨm olak ma pork ye yok tyempɨrsh uje titɨm olak uje Gedeón shiyokõr, hnii uje Barac shiyokõr, hnii uje Sansón shiyokõr, hnii uje Jefté shiyokõr, hnii uje David shiyokõr, hnii uje Samuel shiyokõr, hnii uje erze profeta oshiyokõr toy. 33Shɨ pork wɨr ye olotiis Porroshtpe heke oteye hõr wɨr dihipo kɨnãho hn otserz õr. Ode uje ye olotiis Porroshtpe hn shuu omasaha par õr jwe uje oshiyokõr uje ich om. Ye olotiis Porroshtpe heke ɨshɨm õr erze uje chɨbɨte lahwosni par ɨshɨm õr. Ye olotiis Porroshtpe heke sontew erze ɨlpiyo par uje ye tew õrpe. 34Ode uje ye olotiis Porroshtpe hn otsẽhi jwekɨta waa je ich data, hn erze uje oyuhwo par uje ye ohyerptoso oduhu õrpe onĩ̵ra õr espada, hn erze uje ye õr ukũrbɨrsh ich Porrosht shuu õr ukurbo deyo de par uje oteye ochĩ̵ra namãho. Porrosht ɨshɨm erze uje ye olotiis ɨre õr ukurbo par oshuu erze dihipo kɨnãho õr ohyerptoso otola õr hn oyuhwo. 35Profet yewo odekite uje oshuu topo õr ɨkpo hn oshɨm õr datɨ. Yewo ode uje oso oloter õr. Sehe oduhu onoym Porrosht par uje oym uje oloter õr per ye onoym Porroshtpe heke oloter õr nehech oshuu õr oshuu otoy pork sehe õr ɨkpo nehe hn otĩ̵r Porrosht ahɨr. 36Ode uje ye olotiis Porroshtpe heke yewo ochiyuhu lahwoso mɨhnuwõho õr hn otsepyẽr nohmɨramo hn oshiyeru nohmɨramo ochĩ̵ra õr kenena hn ochɨmchaha nohmɨramo õr karsel ehet. 37Hn ode uje oshuu õr ochɨ̃ra õr kojano po nehech otoy, hn ode uje ochekshehe õr ochɨ̃ra õr serusho nehech otoy, hn ode uje oshuu ochɨ̃ra õr espada oshuu otoy, hn ode uje oshuu otokolɨhɨ dɨt heke ochũr lekɨtiyo. Shɨ oshiyokõr lasuwo ochɨ̃ra obeje yũhur hn kabɨr yũhur. Wɨr ich õr losuhlaabo. Kuche mɨhnũwo tɨ̃r õr hn oso oshiyokõr mɨhnuwõho õr. 38Erze oso uje ode nãhu ĩ̵rmo opoym õr ɨluu uje om heke oshuu otokolɨhɨ lahɨr. Shɨ ochinshẽhe ɨre hnɨmoho lekɨtiyo uje ɨsa hn ese hnɨmich uje shɨ kojano deyo. Odebuhu kojano ɨle. 39Erze kuche mɨhnũwo uje tĩ̵r õr chɨbɨte orhõta uje nos wɨr õr ɨre ye olotiis Porroshtpe per Porrosht ye dosɨm õr shɨchishpe erze uje chɨbɨte lahwoskite par ɨshɨm õr 40pork Porrosht sehe duhu nos yukwiĩyaloye par uje nos ɨshɨm eyok nehe erze uje tatkite. Tyenɨj shuu eyok ɨluu ɨtso Cristo ɨr ɨluu wap.

will be added

X\