HEBREOS 10

1Erze uje asa ley tata waa je Moisés chichewkite wɨr shɨ sɨteẽta per erze uje ich ũru iyehe erze ley nẽr. Erze uje iyehe nẽr wɨr uje ich ɨhĩ̵rts pisho uje Cristo shiyokõr. Kal ãyt ich erze ley shuu oshuu loshɨpo par uje ɨshɨ õr hnɨtewɨhɨ Porrosht ahɨr per yelɨj doshɨ õr hnɨtew erze uje sehe odɨtĩ̵r ɨre Porrosht. 2Kɨmɨjɨ loshɨpo armɨtsɨ doshɨ õr hnɨtewɨhɨ Porrosht ahɨr ich ye nesitpe uje erze israel oso õr saserdote shish oshuu loshɨpo kal ãyt par õr. Kɨmɨjɨ erze loshɨpo ɨr armɨtsɨ doshɨ õr hnɨtew ich ye onuunape uje oshiyokõr uje ich mɨhnũwo, 3per kal ãyt shish shuu loshɨpo heke shɨ shuu õr eyucha erze mɨhnũwo uje oshiyokõrni 4pork erze wõjo itokohlo ɨr armɨtsɨ hn kabɨr ɨr armɨtsɨ wɨr ye pwele doshɨ õr hnɨtewɨhɨ Porrosht ahɨrpe. 5Heke uje Cristo tĩ̵r ɨrmõkite hn tatɨm Porrosht ɨm: —Ye ahmũrpe uje oshuu loshɨpo par oteeychãha owa hnii uje oshɨmɨhɨ owa kuche, per asɨm yok piyũhurrzani uhu ɨtso oso par uje tokoshɨ õr hnɨtewɨhɨ ahɨr. 6Ye ahmũrpe erze loshɨpo uje otsẽru par oteeychãha owa, hnii erze loshɨpo uje oshuu par oshɨ õr hnɨtewɨhɨ ahɨr.— 7Heke Cristo tatɨm Porrosht ɨm: —Dii Porrosht hmeychɨm, tɨkɨrẽt tɨtĩ̵r ĩ̵rmo par tiyokõr uje ahmũr. Uhu ochichew ahwosni hn tata uje tyenɨj tiyokõr tuu ɨtsorz.— 8Uje Porrosht ahwoso tata uje ye Porrosht nahmũrpe erze loshɨpo uje oshuu par oteeychãha ɨre hnii erze kuche yewo uje oshɨmɨhɨ ɨre hnii erze loshɨpo uje otsẽru par oteeychãha ɨre hnii erze loshɨpo uje oshuu par oshɨ õr hnɨtewɨhɨ ɨre ahɨr, per wɨr shɨ oshiyokõr pork ley tata, 9heke Cristo tata ɨm: —Hmeychɨm, tɨkɨrẽtni par tiyokõr uje ahmũr.— Uje tata shuu ɨtsorz ich shuu ye jukur erze ɨluu ɨler par uje ɨluu ahle masaha owich. 10Jesucristo shiyokõr uje Porrosht sahmũr heke shuu eyok yomsaha par Porrosht aabo pork wɨchɨ ɨshɨmɨhɨ ɨre oso par uje oshuu oshuu toy hn ɨshɨ eyok hnɨtewɨhɨ Porrosht ahɨrkite shɨ owich nohmɨra. 11Nos wɨr israel oso õr saserdote shish oyehetɨhɨ wahacha templo patikɨt ehet par oshuu loshɨpo par uje ɨshɨ oso õr hnɨtewɨhɨ Porrosht ahɨr per erze loshɨpo uje oshuu ye doshɨ õr hnɨtewɨhɨ Porrosht ahɨrpe. 12Per shɨ owich nohmɨrshɨp Cristo ɨshɨmɨhɨ ɨre erze oso par uje oshuu oshuu toy hn ɨshɨ eyok hnɨtewɨhɨ Porrosht ahɨr. Uje ɨshɨkite ich sɨhna debiyo hn hno sakaha Porrosht waãchta pork wɨchɨ ich dich toy. 13Ele ahle Cristo shɨ iyem uje Porrosht chɨbɨte erze ɨr ɨmãho ɨr hme nehe shɨ ɨtso uje shuu Cristo chɨbɨte der õr eeyo. 14Shɨ owich nohmɨrshɨp uje ɨshɨmɨhɨ ɨre oso par uje oshuu oshuu toy hn ɨshɨ eyok hnɨtewɨhɨ Porrosht ahɨr. Uje yomsaha par eyok Porrosht aabo ɨchii wɨchɨ nɨshii eyok ɨluu saraãshi nehech uhurc ich eyok ɨluu shɨ ɨtso ɨr ɨluu. 15Porrosht Ɨchɨbich shuu yɨraha toy uje eyok Porrosht aabo pork wɨchɨ shuu profet yet tata ɨm: 16—Eyok Ɨrhĩch sole: “Deeych yet nehe hn tɨbɨte pahwoso tuu ɨtsorz. Tɨbɨte yok ley õr aho hn tuu ochɨraha yok ley shɨ ɨtso uje tichew tɨbɨte õr eyuwo.” 17Hn Ɨrhĩch tata ɨm: “Ich ye peyuchpe erze kuche mɨhnũwo uje oshiyokõrni.”— 18Uje Porrosht perdonar olak uje ahakõrlo erze kuche mɨhnũwo ich ye nesitpe uje yeẽk ɨshɨpo. 19Pɨshɨbo watsaklo, titɨm olak. Porrosht perdonar olak heke ele ahle ich ye yɨtɨlape uje yɨtĩ̵r wahacha tabernakulo pisht ehet uje Porrosht de pork Jesús tooho krus eeychkite hn ɨr armɨsta noshɨ par ɨshɨ eyok hnɨtewɨhɨ Porrosht ahɨr. 20Jesús wɨchɨ ɨtso dehet ahlt uje tĩ̵r Porrosht. Ese uje ɨtso dehet ɨlarc wɨchɨ erze ley uje Moisés chichewkite. Ese dehet ahlt shuu eyok ɨkɨrĩt de uje yelɨj nɨhna ɨre. Ese bortɨsht uje dechɨ Porrosht ihyuch ehetkite sentii uu pɨt yet par uje ye oso õr pwele otĩ̵r Porroshtpe, per ese bortɨsht shɨ ɨtso Cristo ɨr yũhurrza. Uje wɨchɨ tokite ich shɨ ɨtso uje chiyuhu ese bortɨsht par uje oso õr pwele otĩ̵r Porrosht. 21Jesús wɨchɨ eyok saserdote pisht uje tɨbey Porrosht ihyuch 22heke yuko yɨtĩ̵r Porrosht pork ye eyok aho yuhurĩ̵shpe, hn ye yotiis Cristope pork wɨchɨ uje churhũ eyok aho hn yapur perdon par erze kuche mɨhnũwo uje yiyokõrlo shɨ ɨtso uje yɨsoho awɨt uje ich ɨhĩ̵rt. 23Yiitani uje eyok owich de Porrosht ahɨr. Ye yukwim hn ye yuhu eyok koswãha Cristo pork Porrosht shish shuu lahwoso yakaha uje chɨbɨtkite par uje ɨshɨm eyok. 24Tyenɨj yuhu eyok eyuwo tɨsĩ̵r yiyokõr latɨkpo par uje ma yahmũrloye hn par uje ma yiyokõrlo uje ich om. 25Ye yukwimlo uje yakɨshlo eyok owich par yeeychãhalo Porrosht. Ode uje oshuu yakaha ɨre uje ye otakɨsho lawich nehech oym. Ye ahakõrlo uhulo ɨlorz. Ich ma om uje akashɨmloye par uje olak duurapo pork ich ɨmeheeych uje yej terɨhɨ ese deeych uje eyok Ɨrhĩch cheeshpo nehe heke ich tyenɨj ma uhu olak duurapo. 26Per kɨmɨjɨ eyok yeẽk dɨraha erze uje ich ũru per shish shuu erze kuche mɨhnũwo yakaha ɨre ich nĩhyok yet par ɨshɨ ɨr hnɨtewɨhɨ Porrosht ahɨr. 27Shɨ tyenɨj iyem par uje tĩ̵r Porrosht ɨle ɨkɨch nehe hn sepyẽr ɨre. Wɨchɨ ich yarhakpa. Tyenɨj tĩ̵r asa urhuta bahluta ehet nehe uje Porrosht chɨmchaha namãho. 28Kɨmɨjɨ hnakɨrbich sowe asa ley waa je Moisés chichewkite hn kɨmɨjɨ õr osiyer o õr tre uje otata uje wɨchɨ iyuwe asa ley ich tyenɨj oshuu oshuu toy, hn ye latɨk nuuna uje wɨchɨ losuhlaap. 29Per kɨmɨjɨ hnakɨrbich dɨtak Porrosht Ijɨt Jesús ich ma mĩ̵hnɨk uje tyenɨj tĩ̵r ɨre pork wɨchɨ chɨbɨte uje ye jukur uje Cristo tooho krus eeychkite hn ɨr armɨsta noshɨ par ɨshɨ ɨr hnɨtewɨhɨ Porrosht ahɨr. Wɨchɨ chiyuhu lahwoso mɨhnuwõho Porrosht Ɨchɨbich uje takashɨm oso par oshiyokõr uje Porrosht sahmũr. 30Yɨrahalo uje eyok Ɨrhĩch shish shiyokõr uje tata. Wɨchɨ tata ɨm: —Uje yeẽk niyokõr mɨhnɨkĩ̵hɨ olak ich ye eẽtlo ɨre. Yok tyenɨj tiyuhu olak bahat.— Hn Porrosht ahwoso tata toy ɨm: —Eyok Ɨrhĩch teychɨm laabo kɨmɨjɨ oniyokõr mɨhnũwo o kɨmɨjɨ ye oniyokõrpe hn sepyẽr yeẽk uje shiyokõr uje ich mɨhnũwo.— 31Ich yarhakpa par erze uje oshiyokõr uje ich mɨhnũwo uje otĩ̵r Porrosht ɨle ɨkɨch nehe pork wɨchɨ ɨka hn tyenɨj sepyẽr õr. 32Olak eyucha uje wapni hn ẽntlo Porrosht ahwoso hn amsahalo par olak ɨr aabo. Kuche mɨhnũwo ich kɨhniya tĩ̵r olak per shish olak ewenta. 33Deeych yetni hn ode uje oshuu dɨt oso otakɨsho lawich par uje oshuu wɨr oloter olak nohmɨramo. Deeych yetni hn olak de wɨr õr ahɨr erze Porrosht aabo yewo uje wɨr oloter õr. 34Olak ich eenɨloni uje wɨr õr losuhlaabo erze uje ode karsel ehet, hn uje oso ohnoy olak kushjãro ich shish olak ayla pork erahalo uje olak kushjãro de wahacha poõrc uje ich ma ɨhĩ̵rts pisho hn ye taatpe. Wɨr ye latɨk pwele uje diyuhu olak ahɨr. 35Heke ye otiislo uje Porrosht tyenɨj ɨshɨm olak erze premyo uje ich deyo nehe. Kɨmɨjɨ otiislo ich moymlo erze olak premyo hn pyerte. 36Olak tyenɨj nos olak ewenta erze kuche mɨhnũwo uje tĩ̵r olak par uje olak pwele ahakõrlo uje Porrosht sahmũr hn Porrosht tyenɨj ɨshɨm olak nehe erze uje chɨbɨte lahwosni par ɨshɨm olak. 37Porrosht ahwoso tata shuu ɨtsorz: —Ich yej terɨhɨ uje Cristo tyenɨj cheeshpo nehe hn ye duhu yɨlkamɨhɨ ɨrpe 38per ese uje ɨr owich de pahɨr, ɨr ɨkɨrĩt de pork ye lotiis yokpe. Kɨmɨjɨ deeshpo dotiis yok ich ye yok aylɨhɨ ɨrpe.— 39Per eyok ye eyok ɨlo erze uje ochunt per ocheeshpo otsotiis Porrosht. Wɨr tyenɨj otĩ̵r urhuta bahluta ehet nehe. Eyok ich eyok ɨtso erze uje ye olotiis Porroshtpe heke eyok ɨkɨrĩt de uje yelɨj nɨhna ɨre.

will be added

X\