HEBREOS 1

1Antkite hn Porrosht tatɨm lahwoso erze profeta poruwo wɨshɨ par uje shuu otatɨm eyok poruwo wɨshɨ. Wɨchɨ shish tatɨm erze profeta poruwo wɨshɨ hn shuu oshiyokõr kuche ich kɨhniya par uje sɨteẽta kuche par uje sehe duhu eyok poruwo wɨshɨ odɨraha. 2Per ele ahle Porrosht shuu Deyjɨt tatɨm eyok lahwoso par uje shuu yɨraha. Porrosht wɨchɨ uje shuu Deyjɨt shiyokõr ɨrmõkite, hn chiihla ɨre hn nos ɨshɨm ɨre wɨr kuche. 3Uje oso oteychɨm Cristo ich ochɨraha Porrosht ɨr ɨluu pork ɨr ɨluu shɨ ɨtso Cristo ɨr ɨluu. Cristo ɨtsshɨp ɨr Deych. Cristo wɨchɨ uje nos tɨbey kuche chĩ̵ra lahwoso hn chĩ̵ra lakɨrbo. Uje Cristo ɨshɨ eyok hnɨtewkite ich sakaha Porrosht waãchta wahacha poõrc pork wɨchɨ ich dich. 4Porrosht Ijɨt ma ukurbo deyo de je erze ɨr anjele hn ɨr ɨbiyo ich ma deyo je erze ɨr anjele õr ɨbiyo. 5Porrosht yelɨj tatɨm erze anjele yeẽk ɨl: —Owa yok pijo. Ele ahle tuu owa shũrha.— Hn yelɨj tatɨm erze anjele yeẽk duhu ɨlorz: —Yok uu eych hn owa uu pijɨt.— 6Uje shuu Deyjɨt webich osht shurẽhe nãhu ɨrmõkite hn Porrosht tata ɨm: —Sehe tuu nos wɨr yok anjele oteeychãha ese Pijɨt.— 7Porrosht tata uje shuu erze ɨr anjele ochisãha ɨre myentɨta. Erze Porrosht anjele wɨr ɨr ɨbiyo. Shuu ochisãha ɨre jwekɨta. 8Per Porrosht tatɨm Deyjɨt ɨm: —Owa Porrosht hn owa rey uje shish de. Owa uje abey paabo hn shish ahakõr uje ich om. 9Ahmũr uje oso oshiyokõr uje ich om, per etak erze uje oshiyokõr uje ich mɨhnũwo. Yok uu owa Porrosht. Ahmũr uje ich om heke tuu owa ma ayla je owa ahĩ̵ro.— 10Hn tatɨm Deyjɨt ɨm: —Owa uu nos oso hn nos wɨr kuche ɨr yɨnsɨrc. Tenitkite hn ahakõr ĩ̵rmo hn ahakõr nos wɨr kuche uje de poõrc ẽra ahme. 11Deeych yet nehe hn nos sɨhna ɨre per owa shish owa de. Ese hnɨmich hn poõrc wɨr shɨ ɨtso õr ɨshuwo uje saraãshi ɨre ɨlaro nehech sɨhna ɨre nehe. 12Wɨr shɨ ɨtso uje yeẽk iim lasuwo ɨlaro hn iyãha lasuwo ahlo per owa ye kɨnãhape, shish ɨtsye. Yelɨj ehna owa.— 13Porrosht yelɨj tatɨm erze ɨr anjele yeẽk ɨl: —Akaha paãchta nehech nos terz owa amãho hn tɨbɨte õr ahme— per tatɨm Cristo shuu ɨtsorz. 14Nos wɨr Porrosht ɨr anjele wɨr shɨ õr ɨchɨbiyo. Porrosht shuu oshiyokõr debiyo otakashɨm erze uje otĩ̵r poõrc nehe.

will be added

X\