GÁLATAS 6

1Pɨshɨbo watsaklo, uje eyok leshtɨk yeẽk ye ewenta erze kuche mɨhnũwo hn shiyokõr, ich olak uje ahakõrlo uje Porrosht Ɨchɨbich sahmũr tyenɨj akɨtlo ɨre per ye atsɨrãhalo olak ahwoso uje akɨtlo ɨre hn uhulo niyokõr uje Porrosht sahmũr. Kal olak nohmɨr tyenɨj tɨbey ɨre par uje ye niyokõr uje mɨhnĩ̵k toy. 2Akashɨmloye. Uje ahakõrlo uhulo ɨtsorz ich ahakõrlo erze ley uje Cristo chɨbɨtkite. 3Kɨmɨjɨ yeẽk narim ɨre chɨbɨte ɨre uje ich dich per wɨchɨ ye dichpe ich shɨ sehnyẽr ɨre. 4Kal olak nohmɨr tyenɨj teychɨm debiyo kɨmɨjɨ tokole om o kɨmɨjɨ ye tokolpe, heke ich olak aho kɨɨsɨhɨ olak ɨbiyo hn ye atha uje ebiyo ma tokole om je ese yet. 5Kal olak nohmɨr tyenɨj tɨbey uje shiyokõr par uje tokole om. 6Nos wɨr erze uje ochunt Porrosht ahwoso tyenɨj otakashɨm ese uje shiyokorãha õr oshɨm ɨre uje ich om. 7Ye ehnyẽrlo olak. Nĩhyok uje yeẽk pwele sehnyẽr Porrosht. Erze uje ochukwẽr tyenɨj ochekushu nehe. 8Heke uje yeẽk shiyokõr uje mɨhnũwo ich shɨ ɨtso uje chukwẽr jõro uje mɨhnũwo. Uje terɨhɨ ɨshɨrĩt nehe par uje chekushu ich shɨ chekushu ɨr jõro ee uje ich mɨhnũwo. Shiyokõr uje mĩ̵hnɨk heke erze mɨhnũwo tyenɨj seya ɨre waa urhuta bahluta ehet nehe. Uje yeẽk shiyokõr uje Porrosht Ɨchɨbich sahmũr ich shɨ ɨtso uje chukwẽr ɨr jõro uje ich om heke tyenɨj chekushu ɨr ee uje ich om. Wɨchɨ ese ɨr ɨkɨrĩt uje yelɨj nɨhna ɨre. 9Ye yuhu patɨm eyok uje yiyokõrlo uje ich om pork uje terɨhɨ ɨshɨrĩt nehe ich eyok premyo de kɨmɨjɨ ye yukwimpe. 10Par uje eyok premyo de, uje eyok pwele ich shish nos tyenɨj yakashɨmlo oso, per ma tyenɨj yiyokõrlo om par erze Porrosht aabo yewo. 11Ich hutɨta uhurc heke tichew tĩ̵ra pɨhmta. Eychɨmlo ehni piche ich deyo heke erahalo uje ana hutɨta tãra yok. 12Wɨr erze uje onarim ɨre sehe oduhu oniyokõr olak yarta waa je iich otsɨɨ sirkunsisyon. Sehe oniyokõr oduhu ɨlorz shɨ par uje erze oso ye oniyokõr mɨhnɨkĩ̵hɨ õrpe uje otsanɨmɨrãha otatɨm oso uje Jesús tooho krus eeych par uje ɨshɨ õr hnɨtewɨhɨ Porrosht ahɨr. 13Erze uje sehe oniyokõr õr yar hn erze uje õr yarta de tyenɨj oshiyokõr asa ley waa je Moisés chichewkite, per ye oniyokõrpe. Shɨ sehe odɨbɨte olak yarta par uje õr pwele otata uje ochɨbɨte olak yar hn onarim ɨre oshuu ɨtsorz. 14Par yok ich ye tahmũrpe uje yok narim yok. Shɨ tahmũr uje yok narim eyok Ɨrhĩch Jesucristo uje tooho krus eeychkite. Ich shɨ ɨtso uje erze kuche mɨhnũwo uje de nãhu ĩ̵rmo tooho ese krus eeych toy heke ich shɨ ɨtso uje tɨkɨtɨ tokõya Cristo krus eeych pork tokoym erze kuche mɨhnũwo uje de nãhu ĩ̵rmo. 15Ich ye latɨkɨsh kɨmɨjɨ asa yarta de waa je iich otsɨɨ sirkunsisyon o kɨmɨjɨ nĩhyok. Ese uje nos oso õr nesita wɨchɨ uje Porrosht shuu õr ɨluu kɨnẽhe ich shuu õr ahlo. 16Sehe tuu Porrosht duhu nos wɨr õr aho kɨɨs erze uje shɨ ye olotiis Cristope hn ye odɨbɨte õr yarta ɨtso uje tichew tɨbɨte ana hutɨta. Sehe tuu Porrosht nuuna uje õr losuhlaabo hn dosɨr õr toy. Erze Porrosht ɨr aabo wɨr uje Porrosht chiihla õr. 17Ich ye tahmũrpe uje oshiyokos yokpo nehe shɨ pork sehe odɨbɨte erze Porrosht aabo õr yar. Ahnũwo pobɨlo de piyũhurrza pork oso otsepyẽr yok. Erze pobɨlo shuu ɨmeheeych uje tanɨmɨrãha titɨm oso Jesús per ye titɨm oso uje tyenɨj ochɨbɨte asa yartape waa je iich otsɨɨ sirkunsisyon heke ich otsɨtak yok hn otsepyẽr yok oshuu ɨtsorz. 18Pɨshɨbo watsaklo, sehe tuu eyok Ɨrhĩch Jesucristo dosɨr olak. Shɨ ahnũwo uje titɨm olak.

will be added

X\