GÁLATAS 3

1Olak uje ebuhulo ese hnɨmich Gálatas ¿je olak totihlo? ¿Yeẽkpo sehnyẽr olak hn shuu otiislo uje ich ũru? Uje oyanɨmɨrãha Porrosht ahwosni ich oyuhu ɨmeheeych uje Jesucristo tooho krus eeych par ɨshɨ eyok hnɨtewɨhɨ Porrosht ahɨr. 2Sehe tuu atɨmlo yok ahnũwo uje tyenɨj titɨm olake. Porrosht ɨshɨm olak Dechɨbichni. ¿Je dosɨm olak Dechɨbichni shɨ pork ahakõrlo erze ley uje Moisés chichewkite, o dosɨm olak shɨ pork ye otiislo Jesucristope? 3¿Je olak totihlo? Uje amsahalo par olak Porrosht aabo hn ɨshɨm olak Dechɨbich uje takashɨm olak, per ele ahle ich olak koswãha. Sehe uhu olak ɨluu om ẽra olak ukurbo, ye ẽrlo Porrosht Ɨchɨbichpe. 4¿Kɨmɨjɨ moymlo Porrosht nehe ich tokole uje ye jukur erze uje olak ewentni. Nos olak ewentni erze kuche mɨhnũwo uje tĩ̵r olak pork olak Porrosht aabo. Tokotiis uje moymlo uhulo ɨtsorz. 5Porrosht ɨshɨm olak Dechɨbich uje shiyokõr kuche olak ahɨr uje nĩhyok ye latɨk pwele niyokõr. ¿Duhu ɨnaapo uje shiyokõr shuu ɨtsorz? Ye niyokõrpe duhu ɨlorz shɨ pork ahakõrlo asa ley waa je Moisés chichewkite per shɨ shiyokõr pork ye otiislo Jesucristope. 6Tɨteẽta Abraham. Shɨ pork ye lotiis Porroshtpe heke Porrosht ɨshɨ ɨr hnɨtew hn shuu ɨre owich de ahɨr. 7Ich ɨmeheeych par eyok uje nos wɨr erze uje ye olotiis Porroshtpe wɨr shɨ õr ɨtso Abraham aabo. 8Porrosht ahwoso shuu ɨmeheeych uje deeych yet nehe hn ɨshɨ õr hnɨtew erze oso uje ye õr israel yewope per shɨ kɨmɨjɨ ye olotiis ɨrpe heke Porrosht tatɨm Abrahamkite uje Cristo tyenɨj shiyokõr uje tatɨm ɨre ɨm: —Shɨ pork ye otiis yokpe heke nos tokosɨr wɨr dihip kɨnãho.— 9Heke ɨmeheeych uje nos wɨr erze uje ye olotiis Porrosht ich Porrosht sosɨr õr shɨ ɨtso uje sosɨr Abrahamkite pork wɨchɨ ye lotiis ɨrpe. 10Nos wɨr erze uje ochɨbɨte uje shɨ tyenɨj oshiyokõr asa ley waa je Moisés chichewkite par uje shuu õr owich de Porrosht ahɨr, wɨr uje Porrosht sajɨr õr ɨkiyo pork ɨr ahwoso tata shuu ɨtsorz ɨm: —Nos sajĩ̵r wɨr õr ɨkiyo erze uje oyuwe hn ye nos oniyokõrpe erze ley uje Moisés chichewkite.— 11Ich ɨmeheeych uje nĩhyok ye latɨk pwele ɨshɨ ɨr hnɨtewɨhɨ Porrosht ahɨr shɨ pork shiyokõr erze ley uje Moisés chichewkite pork Porrosht ahwoso tata shuu ɨtsorz ɨm: —Shɨ erze uje ye olotiis ɨrpe ich nĩhyok õr hnɨtew uje de Porrosht ahɨr heke õr owich de ɨre ahɨr.— 12Kɨmɨjɨ olotiis o kɨmɨjɨ ye olotiispe ich shɨ ɨtsye par erze ley uje Moisés chichewkite, pork Porrosht ahwoso tata shuu ɨtsorz ɨm: —Kɨmɨjɨ yeẽk nos niyokõr erze ley uje Moisés chichewkite hn ye sowe ich ɨr ɨkɨrĩt de Porrosht ahɨr.— 13Nĩhyok yeẽk pwele shiyokõr shuu ɨtsorz heke Cristo chiyuhu eyok par uje ye lajɨr eyok ɨkiyope shuu ɨtsorz. Porrosht ahwoso tata toy uje tyenɨj sajĩ̵r yeẽk ɨkiyo uje oso ochowɨsh ochɨbɨte pohorrza eeych heke õr ahwoso uje otsajĩ̵r eyok ɨkiyo ich nos noshãha Cristo. 14Heke Jesucristo shiyokõr shuu ɨtsorz par uje erze ahwoso omo uje Porrosht chɨbɨte tatɨm Abraham masaha dihipo kɨnãho toy shɨ pork ye yotiis ɨrpe heke Porrosht ɨshɨm eyok ese Dechɨbich toy uje tatɨm Abraham par uje ɨshɨm ɨre. 15Pɨshɨbo watsaklo, sehe tɨteẽta titɨm olak kuche. Uje oso ochɨbɨte lahwoso par uje sehe oniyokõr kuche hn ochichew ochɨbɨte hutɨta hn ochɨbɨte deeych uut par uje shuu ũru ich ye pwelpe uje shuu erze ɨr hute tokole uje ye jukur hn ye pwelpe uje chɨbɨte ma pork ochichew ochɨbɨte deeych uut. 16Erze uje tɨteẽta tata shuu ɨtsorz. Porrosht chɨbɨte lahwoskite uje tatɨm Abraham hn ese uje tãra ɨre. Porrosht ahwoso ye tatpe ɨm: —erze,— duhu kɨhniya. Shɨ tata ɨm: —ese— uje sohmɨra. Wɨchɨ Cristo. 17Porrosht chɨbɨte lahwoskite uje tatɨm Abraham shuu ɨtsorz. Uje terɨhɨ kwatro syento treynta ãyokite hn ɨshɨm Moisés erze ley par uje sanɨmɨrãha tatɨm erze israel oso. Erze ley ye pwelpe uje duhu erze Porrosht ahwoso ye jukur uje tatɨm Abrahamkite. 18Ye eyok owich chɨhɨ Porrosht ahɨrpe shɨ pork yiyokõr erze ley uje Moisés chichewkite. Kɨmɨjɨ yomsaha yuhu ɨtsorz ich erze ahwoso uje Porrosht chɨbɨte tatɨm Abraham ich ye jukur, per Porrosht chɨbɨte lahwoskite uje shɨ ɨshɨmɨhɨ Abraham ɨr owich uje de ɨre ahɨr. 19¿Ɨnaapo heke Porrosht shuu Moisés chichew asa leykite? Shɨ shuu shiyokõr par uje oso ochɨraha uje nos oyuwe asa ley hn oshiyokõr uje ich mɨhnũwo. Asa ley ɨchii dekite nehech Cristo taãcha, pork Porrosht tatɨm Abrahamkite uje tyenɨj Cristo tãra ɨre. Porrosht tatɨm anjele par uje otatɨm Moisés erze ley par uje sanɨmɨrãha tatɨm erze israel oso. 20Shɨ Porrosht sohmɨra uje chɨbɨte lahwoskite tatɨm Abraham, per par uje Porrosht ɨshɨm erze oso asa ley wɨchɨ ye shɨ tatɨm õrpe. Tatɨm anjele par uje otatɨm Moisés par uje sanɨmɨrãha tatɨm oso, heke erze ahwoso uje chɨbɨte par Abraham ich ma dich pork Porrosht uje keytkẽr. 21¿Je asa ley pwele sontew erze Porrosht ahwoso uje chɨbɨte tatɨm Abrahamkite? Ye pwele nontpe. Kɨmɨjɨ asa ley pwele shuu oso õr ɨkɨrĩt de Porrosht ahɨr uje yelɨj nɨhna ɨre ich õr pwele oshiyokõr asa ley par uje shuu õr ɨkɨrĩt de Porrosht ahɨr, per ye õr pwelpe oshiyokõr oshuu ɨtsorz. 22Per Porrosht ahwoso tata uje nos oso oshiyokõr uje mɨhnũwo, heke shɨ erze uje ye olotiis Jesucristo ich Porrosht chɨbɨte lahwoso par shuu õr owich de dahɨr. 23Uje ehn yahpaa Cristo taãcha petɨkni ɨchii ley sontew eyok uje yiyokõr erze mɨhnũwo hn tɨbey eyok par uje terɨhɨ ɨshɨrĩt uje Cristo taãcha hn ye yotiislo ɨre. 24Uje ehn yahpaa Cristo taãcha hn asa ley tɨbey eyok par uje shuu ye yotiislo Cristope par uje wɨchɨ ɨshɨ eyok hnɨtewɨhɨ Porrosht ahɨr. 25Cristo taãchni heke ye yotiislo ɨrpe hn asa ley ye tɨbey eyokpe. 26Jesucristo nos shuu olak Porrosht aabo pork ye otiislo ɨrpe. 27Nos wɨr olak uje otohɨrm olakni uje ye otiislo Cristope ich uhulo olak ɨluu shɨ ɨtso Jesucristo ɨr ɨluu. 28Ye latɨkɨsh kɨmɨjɨ owa israelya, o kɨmɨjɨ owa dihip kɨnaha, hn ye latɨkɨsh kɨmɨjɨ owa õr yɨlak o kɨmɨjɨ ye õr yɨlakpe. Kɨmɨjɨ owa hnakɨrap o kɨmɨjɨ owa tɨmchar ye latɨkɨsh pork nos olak ɨtsye uje akashɨlo Jesucristo. 29Uje Cristo wɨchɨ olak yɨnsɨrc ich tokole shɨ ɨtso uje olak ãrlo Abraham, heke ahnũwo ahwoso uje Porrosht chɨbɨte tatɨm Abrahamkite ich nos wɨr par

will be added

X\