GÁLATAS 1

1Yok Pablo. Yok apóstol. Ye oso odɨbɨte yok petɨkni par apóstol hn nĩhyok ye yeẽk tĩ̵r yok par uje tatɨm yok par uje yok apóstol. Shɨ Jesucristo hn ɨr Deych Porrosht wɨr uje ochɨbɨte yok par apóstol. Ɨr Deych Porrosht wɨchɨ uje shuu Jesús ɨkponi. 2Yok hn nos wɨr Porrosht aabo uje ode lɨka pahɨr oyichew ana hutɨta oyosɨm nos wɨr olak uje olak dechɨ erze iglesya kɨhniya uje de wahacha ese hnɨmich Galacia. 3Sehe tuu eyok Deych Porrosht hn eyok Ɨrhĩch Jesucristo odosɨr olak hn oduhu olak aho kɨɨs. 4Jesucristo ɨshɨm ɨre osokite par uje oshuu oshuu toy par uje ɨshɨ eyok hnɨtewɨhɨ Porrosht ahɨr, par uje ye yukwiĩya erze oso uje Porrosht sepyẽr õr nehe pork nos oso õr ɨluu mɨhnũ. Eyok Deych Porrosht sahmũr uje Jesús shiyokõr par eyokkite shuu ɨtsorz. 5Sehe shish tuu oso oteeychãha Porrosht. Uje oniyokõr oduhu ɨlorz ich ɨhĩ̵rtpa. 6Ich uhulo tish pɨbe uje sehe moymlo Porrosht shɨchish. Wɨchɨ uje chiihla olakni par uje ye otiislo Cristo hn shuu amsahalo par olak ɨr aabo. Ele ahle sehe moymlo Porrosht ahwoso hn ɨchii ye otiislo erze oso õr ahwoso kɨnãho hn olak ebɨtɨlo uje amsahalo par olak Porrosht aabo uhulo ɨtsorz. 7Nĩhyok ahwoso kɨnãho uje shuu omasaha par Porrosht aabo, shɨ Jesucristo nohmɨra. Per ode uje oshiyokos olak, sehe oduhu Jesucristo ɨr ahwoso poshɨk. 8Titɨm olakni uje shɨ tyenɨj ye otiislo Jesucristo par uje amsahalo par olak Porrosht aabo. Kɨmɨjɨ õryok oyitɨm olak ahwoso uje kɨnãho, o kɨmɨjɨ anjel uje tãra poõrc tatɨm olak ahwoso uje kɨnãho, ich sehe tuu Porrosht lajɨr õr ɨkiyo. 9Titɨm olakɨke ich titɨm olakpo. Kɨmɨjɨ yeẽk nanɨmɨrãha ahwoso kɨnãho tatɨm olak dehet yet par uje amsahalo par olak Porrosht aabo ye ɨlo uje titɨm olakni ich sehe tuu Porrosht lajɨr ɨr ɨkiyo. 10Ye titɨm osope tuu ɨtsorz shɨ par uje tuu otsahmũr yok. Shɨ titɨm õr uje ɨtsorz pork Porrosht sahmũr uje ɨtsorz. Ye titɨm osope par uje tuu õr aho kɨɨsɨhɨ yok. Kɨmɨjɨ titɨm õr shɨ par uje tuu õr aho kɨɨsɨhɨ yok ich ye yok Cristo ɨr ɨbɨkpe. 11Pɨshɨbo watsaklo, sehe tuu erahalo uje ahnũwo ahwoso uje titɨm olakni uje Jesús ɨshɨ oso õr hnɨtewɨhɨ Porrosht ahɨr, ahnũwo ahwoso ye tãra oso õr eyuwope. 12Ye oniyokorãha yokpe hn ye otatɨm yokpe uje Jesús ɨshɨ oso õr hnɨtewɨhɨ Porrosht ahɨr. Shɨ Jesucristo wɨchɨ uje tatɨm yok par uje titɨm erze oso. 13Olak ich entloni uje wapkite tɨkeeychãha Porrosht tuu yok ɨtso pɨhnapso israel oso uje oteeychãha Porrosht. Porrosht aabo õr eyuwo kɨnãho, ye ɨlo oryõkpe, heke tɨnaha yok uje tiyokõr mɨhnuwõho õr pork sehe tɨhna õr. 14Yok ich ma tɨkeeychãha Porrosht je erze pɨhnapso uje õr ãyo ɨtso yok. Ich tahmũrpa uu õryok poruwo wɨshɨ õr ahwoso. 15Uje ehn yahpaa yok shurhãpe ich Porrosht chiihla yok shɨ pork sahmũr yok 16par uje shuu tɨkɨraha Deyjɨt heke tokoym yok poruwo wɨshɨ õr ɨluu hn tomsaha par yok Porrosht aap hn shuu tanɨmɨrãha lahwoso titɨm erze dihipo kɨnãho uje Jesús ɨshɨ õr hnɨtewɨhɨ Porrosht ahɨrkite. Ich ye tapur yeẽk par uje tuu shiyokorãha yok. 17Ye tɨtĩ̵r dɨt Jerusalén petɨkni par tekɨrɨhɨ erze uje wap ɨchii õr apóstole par uje tuu oshiyokorãha yok. Shɨ tɨtĩ̵r wahacha hnɨmich Arabia, hn uje tɨkitokolɨhɨchɨs Arabia ich takaashpo tɨtĩ̵r dɨt Damasco. 18Uje ich terɨhɨ tre ãyo hn tɨkitolɨhɨ dɨt Damasco hn tɨtĩ̵r dɨt Jerusalén par uje tekɨrɨhɨ Pedro. Tiyakaha wɨchɨ ahɨr nehech daalo kinse 19per ye tokomo apóstole yewope. Shɨ tokomo Santiago uu eyok Ɨrhĩch Jesucristo leshɨbich. 20Ahnũwo ahwoso uje tichew tɨbɨte ana hutɨta tokosɨm olak ich ũru. Titɨm olakɨhɨ Porrosht ɨle ɨkɨch uje ye titɨm olak pukushiĩpe. 21Uje tɨkitokolɨhɨ ese dɨt Jerusalén ich tɨtĩ̵r hnɨmich Siria hn hnɨmich Cilicia. 22Porrosht aabo uje ode lekɨtiyo ese hnɨmich Judea ye onomo yokpe. 23Shɨ ochunt uje antni tiyokõr mɨhnɨkĩ̵hɨ Porrosht aabo. Sehe tɨhna erze uje ye olotiis Jesucristope, per ochunt uje ele ahle ich tanɨmɨrãha Porrosht ahwoso titɨm õr par uje ye olotiis Jesucristo. 24Heke onɨna Porrosht uje ochunt uje yesh tanɨmɨrãha ɨr ahwoso.

will be added

X\