EFESIOS 6

1Titɨm olak uje olak pɨkɨhnino hn pɨkɨhnine. Tyenɨj ahakõrlo uje olak deych hn olak lata otatɨm olak pork ahmũrlo eyok Ɨrhĩch. Uje ahakõrlo uhulo ɨtsorz ich om. 2Atɨlɨlo olak deyo hn olak latɨ. Wate Porrosht ɨr ley webich otɨta uje ahwoso oomo ĩya par takashɨm erze uje ye otsowepe 3pork Porrosht ɨm: --par uje õr aho kɨɨs hn õr ɨkɨrĩt berzakɨhɨ nãhu ĩ̵rmo.-- 4Hn titɨm olak hnakɨrbo hn tɨmcher uje olak aabo ode. Uje oniyokõr uje mĩ̵hnɨk ich hnii epiyerlo õr per ye uhulo sowe hn uhulo ochesdelpa. Ahakorãhalo õr eyok Ɨrhĩch ɨr ahwoso. 5Titɨm olak uje olak õr yɨlo uje olak yɨnsɨro ode nãhu ĩ̵rmo ich tyenɨj atɨlɨlo õr hn ahakõrlo uje otatɨm olak, hn ye uhu olak aho yũhɨrsh. Uje ahakõrlo õr ɨbiyo ich ahakõrlo uhulo ɨtso uje ahakõrlo Cristo ɨr ɨbiyo. 6Ye ahakõrlo shɨ uje olak yɨnsɨrc teychɨm olak ich hnii eyuhu olak. Tyenɨj ahakõrlo ɨr ɨbiyo shɨ ɨtso uje ahakõrlo Cristo ɨr ɨbiyo. Tyenɨj ahmũrlo ahakõrlo ɨr ɨbiyo shɨ ɨtso uje ahmũrlo ahakõrlo uje Porrosht sahmũr. 7Hn enaha olak uje ahakõrlo ɨr ɨbiyo shɨ ɨtso uje ahakõrlo Cristo ɨr ɨbiyo, ye shɨ hnakɨrbo õr ɨbiyope. 8Kɨmɨjɨ olak õr yɨlo o kɨmɨjɨ ye olak õr yɨlope, shish ahakõrlo uje ich om pork erahalo uje eyok Ɨrhĩch tyenɨj shuu cheeshpo erze uje ich om ɨshɨm olak shuu ɨtsorz. 9Titɨm olak uje olak yɨlo ode, ahakõrlo oomɨhɨ õr shɨ ɨtso uje wɨr tyenɨj oshiyokõr oomɨhɨ olak. Ye ey olak apha õr. Erahalo uje wɨr õr yɨnsɨrc de poõrc hn olak ɨtspo, hn wɨchɨ ye duhu yet kɨnãhape hn duhu yet kɨnaha. Shuu nos õr ɨtsye. 10Ich terɨhɨ uhurc ahnũwo ahwoso uje tyenɨj titɨm olak. Uhu olak ukurbosh ẽrlo erze ukurbo uje tãra eyok Ɨrhĩch pork wɨchɨ ich ɨr ukurbo deyo de. 11Porrosht ɨshɨm olak kuche ich kɨhniya par uje tɨbey olak. Tyenɨj nos anãhalo uhulo ɨtso uje ohyerptosht iyãha fyerɨt shuu sentii derjorrza par uje abeylo olak par uje ye dyablo nehnyẽr olak, 12pork ye yatsɨrlo osope. Shɨ yatsĩ̵r erze demonyo uje õr ukurbo deyo de, hn erze demonyo uje õr ukurbo arhaabo, hn erze demonyo uje otɨbey erze oso uje ye odɨraha Porroshtpe. Wɨr shɨ õr ɨtso uje ode dɨhlelta ehet. Erze demonyo ich okɨhniya uje ode poõrc pehet, 13heke tyenɨj nos anãhalo erze uje Porrosht ɨshɨm olak par uje tɨbey olak shɨ ɨtso ohyerptosht uje iyãha fyerɨt shuu sentii derjorrza par uje tɨbey ɨre. Ahakõrlo uhulo ɨtsorz hn ese deeych uje kuche mɨhnũwo uje tãra demonyo tĩ̵r olak ich olak pwele ewenta. Uje anãhalo uje Porrosht ɨshɨm olak par uje tɨbey olak ich ye õr pwele oderz olak hn oshuu olak koswãha Porrosht. 14Olak pwele ewenta pork ese uje ɨtso ohyerptosht ɨr ɨhɨrosht uje Porrosht ɨshɨm olak par uje tɨbey olak wɨr Porrosht ahwoso uje ich ũru. Hn uhu olak ɨlo ohyerptosht uje iyãha fyerɨt shuu sentii derjorrza par uje tɨbey ɨre. Wɨchɨ fyerɨt uje Porrosht sɨteẽta uje olak ɨluu ich om. 15Ahakõrlo uhu olak ɨlo ohyerptosht uje terɨhɨ deriho. Erze uje ɨtso ɨr erihyo uje Porrosht sɨteẽta wɨchɨ uje etĩ̵rlo lekɨtiyo par uje anɨmɨrãhalo atɨmlo oso uje Jesucristo ɨshɨ õr hnɨtewɨhɨ Porrosht ahɨrkite par uje shuu õr aho kɨɨsɨhɨ Porrosht. 16Ye shɨ erze uje ohyerptosht tɨbey ɨrpe. Tõhwa kuchẽrk uje iich otsɨɨ eskudo par uje sentii ɨre. Wɨchɨ shɨ ɨtso uje ye otiislo Cristope, heke olak pwele ontɨlo erze uje dyablo sehe niyokorĩ̵hɨ olak. Ich yarhak uje ɨre sehe niyokorĩ̵hɨ olak shɨ ɨtso opɨne uje jwekɨta de wasɨt uje serzɨm chĩ̵ra olak. 17Ese uje anãhalo shɨ ɨtso ohyerptosht ɨr wolt wɨchɨ shɨ ɨtso uje Jesús ɨshɨ olak hnɨtewɨhɨ Porrosht ahɨr. Hn aharu olak ɨhɨrrza Porrosht Ɨchɨbich ɨr espada. Wɨchɨ Porrosht ahwoso. 18Shish tyenɨj olak orar apurlo Porrosht. Apurlo Porrosht Ɨchɨbich par uje shiyokorãha olak uje olak orar. Enahalo olak uje olak orar. Uje olak orar uhulo ɨtsorz ich tyenɨj emɨt olak hn ye moymlo uje olak orar. Tyenɨj olak orar toy apurlo Porrosht par uje nos sosɨr erze daabo yewo. 19Titɨm olak par uje olak orar toy apurlo Porrosht par yok par uje Porrosht dosɨm yok erze ahwoso uje ich om par uje titɨm õr, hn par uje ich ye tɨkɨtɨla õrpe par uje tuu ochɨraha uje Jesús ɨshɨ õr hnɨtewɨhɨ Porrosht ahɨrkite pork nos õr ɨre ye odɨrehepe. 20Porrosht shuu takaha par uje titɨm oso ɨr ahwoso, hn shɨ pork tanɨmɨrãha ɨr ahwoso heke oshiyeru pɨhmikɨt ochĩ̵ra kenena hn ochɨmchaha yok karsel ehet. Sehe tuu olak orar apurlo Porrosht par uje yok pwele titɨm õr erze ɨr ahwoso hn ich ye tɨkɨtɨla latɨk. 21Titɨm olak uje Tíquico wɨchɨ Porrosht aap toy hn tahmũr pishɨ ɨre. Yelɨj sehi lahwoso. Wɨchɨ eyok Ɨrhĩch ɨbɨk toy. Tyenɨj nos tatɨm olak erze kuche uje oshiyokorĩ̵hɨ yok, hn erze pɨbiyo uje yesh tiyokõr, 22heke tuu hno tĩ̵r olak par uje shuu erahalo uje tokolɨhɨ õryok hn par uje shuu olak aho kɨɨs. 23Sehe tuu eyok Deych Porrosht hn eyok Ɨrhĩch Jesucristo oduhu eyok leshɨbo õr aho kɨɨs hn onahmũrye pork ye olotiis Porroshtpe. 24Sehe tuu Porrosht dosɨr nos wɨr erze uje shish otsahmũr eyok Ɨrhĩch Jesucristo.

will be added

X\