EFESIOS 5

1Heke tyenɨj eẽtlo olak Deych Porrosht pork olak ɨr aabo. Ich sahmũr olak. 2Tyenɨj shish ahmũrloye uhulo ɨtso Cristo uje sahmũr eyok, heke ɨshɨm ɨre oso par uje oshuu oshuu toy par uje ɨshɨ eyok hnɨtewɨhɨ Porrosht ahɨr. Wɨchɨ shɨ ɨtso kuche uje aat ehmuuj uje oshɨmɨhɨ Porrosht uje ɨre sahmũr. 3Olak uje olak Porrosht aabo ye ompe uje uhu olak eyuwo tɨsĩ̵r erze mɨhnũwo uje erze hnakɨrbo hn tɨmcher oshiyokorĩ̵hɨye uje ye ohnõyhi pishye ahɨrpe. Ye ompe uje uhu olak eyuwo tɨsĩ̵r erze mɨhnũwo uje tɨmcher oshiyokĩ̵hɨ yẽr uje õhyi yẽr ahɨr, hn hnakɨrbo õr ɨtspo uje oshiyokorĩ̵hɨye hn õhyiye ahɨr, hn uje yeẽk sahat loshɨpɨt, hn uje yanak shuu loshɨpɨt sahat ɨre. Ye ompe uje pɨkɨhnino hn pɨkɨhnine oshiyokorĩ̵hɨye toy oshuu ɨtso õr. Ye ompe uje ekuturãha olak kuche pork olak Porrosht aabo. 4Ye ompe uje ekitkẽrlo tɨmcher hn shɨ uhu olak eyuwo mɨhnũwo hn tɨmcher olak ɨtspo ye ompe ekitkẽrlo hnakɨrbo hn uhu olak eyuwo mɨhnũwo. Ye uhu olak ɨlo totihlo uje shɨ ochiyuhu lahwoso uje ye jukur. Ye ompe uje athɨlo kuche mɨhnũwo par uhu oso oyana, pork ye ompe uje Porrosht aabo oshuu ɨtsorz. Ma om uje yɨnshɨp Porrosht. 5Tyenɨj erahalo uje ich ũrpa uje õr owich nihyokĩ̵hɨ Porrosht ahɨr erze hnakɨrbo hn tɨmcher uje oshiyokorĩ̵hɨye uje ye ohnõyhi pishye ahɨrpe, hn erze tɨmcher uje oshiyokorĩ̵hɨ yẽr hn õhyi yẽr ahɨr, hn erze hnakɨrbo õr ɨtspo erze uje oshiyokorĩ̵hɨye hn õhyiye ahɨr, hn erze uje otsahat loshɨpo, hn erze uje shuu loshɨpo sahat ɨre. Erze uje shish ochukutɨrãha ɨre kuche wɨr shɨ ɨtso uje oteychãha kuche ochii ɨr porroshtɨhɨ, nĩhyok õr owich Cristo ahɨr, hnii Porrosht ahɨr. 6Ye ompe uje asɨmlo olak oso par uje otsehnyẽr olak ochĩ̵ra lahwoso uje ye ũrpe pork erze mɨhnũwo uje oshiyokorĩ̵hɨye hn oshiyokorĩ̵hɨ yẽr ich shuu Porrosht sɨtak pishɨ õr, heke tyenɨj sepyẽr õr ich shuu dospa. Wɨr erze uje ye oniyokõrpe uje Porrosht sahmũr 7heke ich ye meylo õr par uje ye ahakõrlo uje ich mɨhnũwo. 8Wapni shɨ olak ɨtso õr pork olak de dɨhlelta toy, per ele ahle ich ye otiislo eyok Ɨrhĩ̵chpe. Erahalo uje ich ũru heke shɨ olak ɨtso luu uje chihit yewo pork uhulo ochɨraha uje ich ũru. Ahakõrlo uje ich om pork Porrosht shɨ ɨtso luu hn olak ɨr aabo 9pork erze uje shɨ ɨtso luu de olak aho heke shuu ahakõrlo hn athɨlo uje ich om, hn shuu ahakõrlo hn athɨlo uje Porrosht sahmũr, hn shuu ahakõrlo hn athɨlo uje ich ũru. 10Enaha olak par uje ma erahalo uje eyok Ɨrhĩch sahmũr. 11Erze uje oshiyokõr uje ich mɨhnũwo wɨr shɨ õr ɨtso uje ode dɨhlelta ehet. Ich ye meylo õr par ahakõrlo uje ich mɨhnũwo. Tyenɨj ebɨtlo orhõta par uje nos ochɨraha erze mɨhnũwo uje oshiyokõr hn otsakɨs. 12Erze mɨhnũwo uje oshiyokõr hn otsakɨs ɨre ich shuu apooklo uje atɨmlo õr per shish tyenɨj ebɨtlo orhõta. 13Nos wɨr erze uje ochɨbɨte orhõta ich shɨ ɨtso uje luu chihit hn shuu nos ochɨraha. 14Heke otatɨm ese uje ye dɨraha Porroshtpe otsɨɨ: --Owa uje shɨ ɨtso uje amo ich erĩ̵hɨ. Atokolɨhɨ wɨr õr ahɨr erze uje tyenɨj otĩ̵r urhuta bahluta ehet nehe, hn Cristo ɨr yokõrt chihit owa shuu eraha uje ich ũru.-- 15Abeylshɨp olak par uje ye ahakõrlo uje wɨr oshiyokõr erze uje ye odɨraha Porroshtpe. Shɨ tyenɨj ahakõrlo uje ich om pork erahalo uje Porrosht sahmũr. 16Uhulo nahnye uje ahakõrlo om pork daalo ich sahnye hn ich oshiyokõr mɨhnũwo ich kɨhniya, 17heke ye ahakõrlo uhulo olak ɨlo erze uje õr totihlo. Shɨ tyenɨj enaha olak par uje ma erahalo uje eyok Ɨrhĩch sahmũr hn ahakõrlo uhulo ɨtsorz. 18Ye ompe uje ehelo yɨkɨch nehech sẽhi olak pork wɨchɨ shuu ahakõrlo uje ich mĩ̵hnɨk. Ma om ahakõrlo uje Porrosht Ɨchɨbich sahmũr uhulo ɨlo uje ehelo Porrosht Ɨchɨbich hn ɨre shuu ahakõrlo uje ich om. 19Uje ekitkẽrloye ich ekitkẽrlo yeehe Porrosht ahwoso uje iich otsɨɨ salmo hn erze imno hn korito. Enaha olak uje eẽtlo erze par eeychãhalo eyok Ɨrhĩch uhulo ɨtsorz. 20Tyenɨj shish enɨlo eyok Deych Porrosht par nos wɨr kuche hn ẽrlo eyok Ɨrhĩch Jesucristo ɨr iich. 21Tyenɨj akashɨmloye pork Cristo ich dich hn tyenɨj atɨlɨlo ɨre. 22Titɨm erze tɨmcher uje õr abiyo de ich tyenɨj oshiyokõr uje õr abiyo otatɨm õr shɨ ɨtso uje oshiyokõr uje eyok Ɨrhĩch tatɨm õr. 23Kal hnakɨrbich tyenɨj tɨbey nerãhta shɨ ɨtso Cristo wɨchɨ uu Porrosht aabo õr bahlut pork wɨchɨ uu õr huta hn ɨr aabo shɨ ɨtso ɨr yũhurrza. Wɨchɨ uje ɨshɨ õr hnɨtewɨhɨ Porrosht ahɨrkite. 24Porrosht aabo tyenɨj oshiyokõr uje Cristo tata shɨ ɨtso erze tɨmcher tyenɨj nos oshiyokõr uje õr abich tatɨm õr. 25Olak hnakɨrbo uje olak ɨrẽhte de ich tyenɨj ahmũrlo õr uhulo olak ɨtso Cristo uje sahmũr Porrosht aabo, heke ɨshɨm ɨre osokite par uje oshuu oshuu toy par tooho õr ɨre 26par uje Cristo churhũ õr aho hn perdonar õr hn otohɨrm õr, hn tatɨm õr uje Porrosht sahmũr uje oshiyokõr. 27Deeych yet nehe hn hnoy Porrosht aabo shuu odebuhu dahɨr. Erze Porrosht aabo shɨ õr ɨtso tɨmcharrza uje sarz ɨre hn ɨhĩ̵rpa hn ɨr ihyẽt hnoy pork Porrosht aabo õr ɨluu ich om. Nĩhyok mɨhnũwo õr aho shɨ ɨtso uje ye õr wãrɨrɨsh hnii uje õr kako ɨtso uje õr ɨlaro hnii kuche yewo uje de õr per wɨr ich shɨ par Porrosht. Nĩhyok ye õr hnɨtew chɨhɨ Porrosht ahɨrpe. 28Shɨ ɨtso uje Cristo sahmũr Porrosht aabo ich hnakɨrbo tyenɨj otsahmũr pishɨ nerẽhte oshuu ɨtso õr ɨre uje otsahmũr ɨre. Erze uje otsahmũr nerẽhte ich otsahmũr ɨre toy. 29pork nĩhyok yeẽk uje sɨtak neyũhurrza pork shiyehe wate ɨre. Shish shuu taak hn tɨbey neyũhurrza shɨ ɨtso Cristo uje tɨbey Porrosht aabo 30pork shɨ eyok ɨtso Cristo yũhurrza. 31Porrosht ahwoso tata ɨm: --Heke hnakɨrbich tyenɨj iim deych hn iim data par uje hõr nerãhta õhiye ahɨr, hn õr osiyer otokole shɨ nohmɨra.-- 32Ahnũwo ahwoso uje titɨm olak ich ye nos odɨrehepe. Kwestpa par uje ochɨraha. Erze uje titɨm olakɨke shɨ tɨteẽta uje Cristo sahmũr Porrosht aabo hn tɨbey õr, 33per kal olak nohmɨra tyenɨj sahmũr nerãhta shɨ ɨtso uje sahmũr ɨre, hn kal tɨmcharrza tyenɨj tola labich.

will be added

X\