EFESIOS 4

1Yok de karsel ehet shɨ pork tiyokõr eyok Ɨrhĩch ɨr ɨbiyo. Porrosht chiihla olak par olak ɨr aabo heke shish tyenɨj ahakõrlo uje ich om pork ye ompe erze uje Porrosht chiihla õr oshiyokõr uje ich mɨhnũwo. 2Ye olak narim olak, hn ye uhu olak ɨljaabo. Tyenɨj enthɨlo pishɨ olak leshɨbo, hn tyenɨj olak ewenta õr hn ahmũrloye pork 3Porrosht Ɨchɨbich sehe duhu olak aho kɨɨsɨhɨye. Enaha olak par uje ye ontɨlo Porrosht Ɨchɨbich. Akashɨlo olak eyuwo par uje ye etakloye uhulo olak kara. 4Porrosht ɨr aabo shɨ õr weeta sohmɨra. Porrosht Ɨchɨbich de õr aho. Wɨchɨ shɨ sohmɨra. Uje omasaha par Porrosht aabo, ich shuu ochɨraha uje õr owich de Porrosht ahɨr. Nĩhyok ye owich kɨnehẽtɨkɨsh. 5Eyok Ɨrhĩch shɨ sohmɨra. Shɨ tyenɨj ye yotiis ɨre, nĩhyok ye ɨluu kɨnaharãsh uje shuu yomsaha par Porrosht aabo. Otohɨrm oso shɨ par shuu ɨmeheeych uje wɨr Porrosht aabo pork ye olotiis Cristope. Nĩhyok ye ɨluu kɨnaharãsh par uje otohɨrm õr. 6Shɨ Porrosht sohmɨra de, wɨchɨ uu nos eyok Deych hn uu eyok bahlut pisht. Wɨchɨ uje shuu nos oshiyokõr debiyo, hn Porrosht Ɨchɨbich de eyok aho. 7Per Cristo nos ɨshɨm eyok kal nohmɨra lakɨrbo par uje yakashɨmloye. Cristo ɨshɨm eyok uje ɨre sahmũr, 8pork Porrosht ahwoso tata shuu ɨtsorz ɨm: --Uje terɨhɨ ɨshɨrĩt uje Cristo hno tĩ̵r poõrc ich hnoy erze oso ich okɨhniya uje ode ese owich uje ye õr pwele otokolpe seya õr poõrc hn ɨshɨm yewo lakɨrbo uje ode lɨka ĩ̵rmo par otakashɨmye.-- 9¿Duhu ɨnaapo uje tata uje hno tĩ̵r poõrc? Shuu ɨmeheeych uje tyenɨj ihnɨmich wap, hn hno tĩ̵r uje topo õr ɨchɨbiyo ode ese owich uje de hnɨmich uut pisht. 10Ese Cristo uje ihnɨmichni shiyehe wɨchɨ ɨre uje ich hno tĩ̵r ma porĩt par uje nos tɨbey lekɨtiyo. 11Heke Cristo ɨshɨm lakɨrbo kal nohmɨra par uje omasaha par apóstole, hn yewo omasaha par profeta, hn yewo omasaha par odɨrkii ɨr ahwoso otsanɨmɨrãha oshuu oso omasaha par Porrosht aabo, hn yewo par õr bahluwo par otɨbey Porrosht aabo, hn yewo par uje oshiyokorãha Porrosht aabo. 12Heke Cristo ɨshɨm erze Porrosht aabo lakɨrbo par uje oshiyokõr ɨr ɨbiyo, hn par uje ma shuu õr ɨluu om 13nehech terĩ̵hɨ uhurc nehe ich nos eyok eyuwo ɨtsye uje ye yotiis Cristope, hn ich nos yɨrahalopa Porrosht ɨr Ijɨt. Uje yomsaha par eyok Porrosht aabo ich shɨ eyok eyuwo ɨtso pɨkɨhnint per uje yɨraha eyok eyuwo ich shɨ eyok ɨtso hnakɨrbo nehech eyok ɨluu ɨtso Cristo ɨr ɨluu 14par uje ich ye eyok ɨlo erze pɨkɨhninope uje nos ochɨbɨte uje erze oso õr ahwoso ich ũru, heke õya yewo hn deeych yet õya yetpo. Erze oso ochɨbɨte ɨre uje ich õr eykdeyo per shɨ par uje otsehnyẽr oso. 15Ye ompe uje yiyokõrlo yuhu eyok ɨtso õr. Ma om uje shish yiita uje ich ũru hn yahmũrloye. Uje yiita yuhu ɨtsorz ich ma shish eyok ɨluu ɨtso Cristo ɨr ɨluu. Wɨchɨ uu Porrosht aabo õr Yɨnsɨrc. Cristo wɨchɨ uu õr huta 16hn ɨr aabo wɨr õr ɨtso ɨr yũhurrza. Shɨ ɨtso uje õr ɨtɨso tehĩye par uje ochishew obiyo hn nos tokole om pork nos õr ɨkiyo om, heke nos otakasho lawich hn otsahmũrye heke õr ɨluu tokole ma om. 17Eyok Ɨrhĩch sehe duhu titɨm olak uje ye ahakõrlo uhulo olak ɨlo erze uje ye odɨraha Porroshtpe. Wɨr shɨ oshiyokõr erze kuche mɨhnũwo uje oshuu deyuwo tɨsĩ̵r. 18Shɨ õr eyuwo ɨtso uje ode dɨhlelta. Nĩhyok õr ɨkɨrĩt Porrosht ahɨr pork ye odɨraha ɨrpe. Shɨ oshuu dehe kata. 19Ye onuuna Porrosht ahwospe hn otsɨnãha ɨre par uje oshiyokõr erze kuche mɨhnũwo uje ich ma otsahmũr. 20Cristo ɨr ahwoso ye duhu ahakõrlope erze kuch mɨhnũwo uhulo olak ɨlo õr. 21Tɨbɨte uje erahalo Cristo ɨr ahwoso pork Cristo shiyokorãha olak, hn Cristo ɨr ahwoso ich ũru. 22Olak tyenɨj moymlo erze olak ɨluu ɨler uje antni shɨ ahakõrlo pork ich ahmũrlo ahakõrlo erze mɨhnũwo. Wɨr shuu olak ɨluu ma mɨhnũ. 23Ele ahle ich tyenɨj enshiilo olak eyuwo pork olak ɨluu ich ahle 24uhu ɨlo uje anaha olak ɨshuwo ahlo pork Porrosht shuu olak ɨluu ahle shɨ ɨtso ɨr ɨluuta. Ich ɨmeheeych uje olak ɨluuta ich ahle pork ahakõrlo uje ich om, hn ye ahakõrlope uje ich mɨhnũwo, 25heke tyenɨj moymlo uje athɨlo olak ukushiĩ par olak leshɨbo. Shish tyenɨj athɨlo uje ich ũru pork nos eyok shɨ ɨtso Cristo ɨr yũhurrza. 26Uje aas olak uulo ich ye ahakõrlo uje ich mĩ̵hnɨk. Ye ompe uje aas olak uulo nehech uhulo deeych yaka 27par uje ye asɨmlo Satanás olak par uje sehnyẽr olak. 28Porrosht aap uje ich echɨkɨ tyenɨj iim uje tohɨr. Ich ma om uje tyenɨj chish obiyo, hn shiyokõr erze obiyo uje ich om par uje pwele serz kuchɨt hn takashɨm erze uje losuhlaabo uje kuche nihyokĩ̵hɨ õr ahɨr. 29Ye eyuhulo olak ahwosoho uje ich mɨhnũwo olak ahwo. Shɨ tyenɨj eyuhulo olak ahwoso uje ich om par õr ɨre otẽr heke akashɨmlo õr uhulo ɨtsorz. 30Ye uhulo Porrosht Ɨchɨbich dosdarak. Wɨchɨ yarta uje Porrosht chɨbɨte olak aho nehech terɨhɨ ese deeych uje Porrosht hnoy daabo nehe. 31Moymlo uje uhulo olak ehnito hn atsɨrãha olak ahwoso olak leshɨbo, hn ye ompe uje moymɨhɨlo olak ehemuro olak aho. Ye etaklo yewo. Moymlo uje aas olak uulo hn ebichlo, hn ye eyuhulo olak ahwoso mɨhnũwo. Ye eyuhulo olak ahwoso uje ye ompe uje shuu olak yewo opook. Moymlo uje sehe tuklo yewo uhulo dospa. 32Tyenɨj akashɨmloye. Tyenɨj eenɨlo uje olak leshɨbo õr losuhlaabo, hn olak perdonarye ɨtso Porrosht uje perdonar olak pork Cristo ɨshɨ olak hnɨtewɨhɨ Porrosht ahɨrkite.

will be added

X\