EFESIOS 3

1Yok Pablo. Yok de karsel ehet shɨ pork tanɨmɨrãha Jesucristo ɨr ahwosni uje ɨre tooho krus eeych hn ɨshɨ õr hnɨtewɨhɨ Porrosht ahɨr hn titɨm olak uje olak dihipo kɨnãho, heke oshiyeru yok. Par yok ich shɨ Jesucristo wɨchɨ uje shiyeru yok, ye osope. 2Tɨbɨte uje ich erahalo uje Porrosht ɨshɨm yok ahnũwo pɨbiyo uje ich ɨhĩ̵rt pisho par uje tiyokorãha olak. 3Porrosht tatɨm yok lahwoso par uje tiyokorãha oso. Tichew tɨbɨte ana hutɨta ehet tuu ahwoso arhaabo. Antni ye oso odɨrehepe erze uje Porrosht tatɨm yok. 4Uje olak ler ana hutɨta ich erahalo erze uje Porrosht tatɨm yokni, erze uje Cristo shiyokõr par eyoklo. 5Porrosht ye tatɨm õryok poruwo wɨshɨ petɨkni hnii olak poruwo wɨshɨ par uje ochɨraha, per ele ahle shuu Dechɨbich tatɨm erze ɨr apóstole hn profeta. 6Porrosht tatɨm yok shuu ɨtsorz. Erze uje ye õr israel osope kɨmɨjɨ ye olotiis Jesucristo ich õr owich de Porrosht ahɨr shɨ õr ɨtso erze israel oso. Erze ahwoso uje Porrosht chɨbɨte par israel oso wɨr par erze dihipo kɨnãho toy. Erze israel oso hn erze dihipo kɨnãho wɨr õr weeta nohmɨra shɨ pork ye olotiis uje Cristo ɨshɨ õr hnɨtewɨhɨ Porrosht ahɨrkite, heke ich õr owich de Porrosht ahɨr. 7Ele ahle ich Porrosht ɨshɨm yok erze obiyo shɨ pork sahmũr shuu tanɨmɨrãha titɨm oso uje Jesucristo ɨshɨ õr hnɨtewɨhɨ Porrosht ahɨrkite hn wɨchɨ takashɨm yok chĩ̵ra dakɨrbo. 8Erze Porrosht aabo wɨr ma õr ɨluu om je yok pork antni tiyokõr mɨhnɨkĩ̵hɨ õr, per Porrosht ɨshɨm yok erze obiyo par uje tanɨmɨrãha ɨr ahwoso titɨm erze dihipo kɨnãho uje Cristo ɨshɨ õr hnɨtewɨhɨ Porrosht ahɨr. Erze uje Cristo shiyokõr par eyok ich nĩhyok ye latɨk pwele chɨbɨte ɨr bahat pork ich dichpa. 9Sehe nos titɨm oso erze uje Porrosht shiyokõr par eyok, erze uje õryok poruwo wɨshɨ ye odɨrehepe hnii olak poruwo wɨshɨ ye odɨrehepe. Porrosht wɨchɨ uje nos shiyokõr erze kuche uje de. 10Porrosht chɨbɨte uje ɨr aabo oshuu ɨmeheeych uje ɨre ukurbo deyo de hn eykdeyo heke erze uje ode poõrc omo õr hn ochɨraha toy. 11Uje ehn yahpaa Porrosht niyokõr nãhu ɨrmõkite ɨchii chɨbɨte uje tyenɨj tokole ɨtsorz heke eyok Ɨrhĩch Jesucristo shuu tokole ɨtsorz. 12Ele ahle uje nos eyok orar ich eyok dechɨ Porrosht ɨle ɨkɨch. Ye yɨpookpe pork ye yotiis Jesucristope. 13Uje yok de lɨka karsel ehet shɨ pork tanɨmɨrãha erze ahwoso oomo titɨm olakni ich ye uhu olak dosdarakɨhɨ yok pork erze uje tĩ̵r yok ich narim olak. 14Porrosht shiyokõr kuchɨt uje ich ɨhĩ̵rtpa par eyok heke ich shuu tokotsa pɨte hnɨmichɨhɨ eyok Deych Porrosht ɨle ɨkɨch. 15Nos wɨr Porrosht aabo uje ode poõrc hn uje ode lɨka hnɨmich ich nos õr iiyo tãra uu õr Deych Porrosht. 16Yok orar tapur Porrosht par uje shuu Dechɨbich uje de olak aho ɨshɨm olak ukurbo uje tãra Porrosht. Ɨr ukurbo ich deyo. 17Sehe tuu Cristo debuhu olak aho shɨ pork ye otiislo ɨrpe heke ahmũrlopa Jesucristo hn ye olak koswãha ɨrpe. 18Heke olak pwele erahalo uje Cristo sahmũr pishɨ olak ɨtso erze Porrosht aabo yewo ochɨraha uje Jesucristo sahmũr pishɨ õr. Wɨchɨ ich ye uhurtɨkɨsh uje sahmũr õr, shɨ ɨtso uje ich ehet dich hn shɨ ɨtso uje berzakpa hn shɨ ɨtso uje porĩt hn shɨ ɨtso uje ich yaka. 19Sehe tuu erahalo uje Cristo sahmũr pishɨ olak shuu ɨtsorz. Nĩhyok yeẽk pwele tɨskẽr pork ich ye uhurtɨkɨsh uje sahmũr olak. Uje erahalo ɨre ɨtsorz ich olak ɨluu ɨtso uu Porrosht ɨr ɨluu. 20Porrosht ɨr ukurbo de eyok aho par uje nɨshii eyok ɨluu. Chĩ̵ra lakɨrbo uje de eyok aho ich ɨre pwele shiyokõr shuu iyuwe erze uje yapur ɨre hn shuu iyuwe toy erze uje yuhu eyok eyuwo tɨsĩ̵r. 21Sehe tuu nos wɨr Porrosht aabo shish oduhu Porrosht ich dich. Wɨr uje ye olotiis Jesucristope. Uje oniyokõr oduhu ɨlorz ich ɨhĩ̵rtpa.

will be added

X\