EFESIOS 2

1Titɨm olak. Wap shɨ olak ɨtso topo pork ye erahalo Porroshtpe. Shɨ tyenɨj etĩ̵rlo urhuta bahluta ehet nehe pork shish ahakõrlo uje ich mɨhnũwo heke olak hnɨtew de Porrosht ahɨr. 2Shɨ olak ɨtso erze oso yewo uje ode nãhu ĩ̵rmo uje shish oshiyokõr uje ich mɨhnũwo. Shish olak de Satanás ɨr hme uje dechɨ poõrc pehet hn shuu oso oshiyokõr uje ɨre sahmũr, erze uje ye oniyokõrpe uje Porrosht sahmũr. 3Antni nos yiyokõr shɨ ɨtso õr ɨre. Shish yiyokõr erze kuche mɨhnũwo uje yahmũr. Yuhu eyok eyuwo tɨsĩ̵rni par uje yiyokõr. Uje eyok shũrha ɨchii ɨtsorz heke Porrosht tyenɨj sepyẽr eyok. Shɨ eyok ɨtso erze oso yewo uje ode nãhu ĩ̵rmo, 4per Porrosht chuuna uje eyok losuhlaabo hn sahmũrpa eyok 5heke uje ehn yiyokõr uje ich mɨhnũwo uje tyenɨj shuu Porrosht sepyẽr eyok nehe ɨchii ye yotiis Cristope heke Porrosht ɨshɨm eyok ese ɨkɨrĩt uje de ɨre ahɨr. Shɨ ɨshɨmɨhɨ eyok pork sahmũr eyok. 6Porrosht tyenɨj shuu eyok ɨkpo nehe shuu ɨtso uje shuu Cristo ɨkponi hn tyenɨj shuu yiyakaha Cristo ahɨr wahacha poõrc nehe, 7par uje shuu yɨraha nehe uje ɨre ich sahmũr pishɨ eyok shɨ pork ye yotiis Jesucristope. 8Porrosht sahmũr pishɨ olak toy heke ɨshɨm olak ese owich uje de ɨre ahɨr shɨ pork ye otiislo ɨrpe. Ye olak pwele uje ahakõrlo kuche par uje uhulo Porrosht ɨshɨm olak ese ɨkɨrĩt. 9Shɨ Porrosht wɨchɨ uje ɨshɨmɨhɨ olak heke nĩhyok yeẽk uje narim ɨrehe wahacha poõrc shuu ɨtsorz. 10Shɨ Porrosht shiyokõr eyok shuu eyok kɨnãho shɨ pork ye yotiis Jesucristope par uje yiyokõrlo erze uje ich om uje Porrosht chɨbɨte wapkite par uje shish yiyokõrlo. 11Olak uje ye olak israel osope ye ekeylo uje olak dihipo kɨnãho. Erze israel oso otata uje olak kɨnãho pork nĩhyok ye olak yarta chɨhɨpe waa je iich otsɨɨ sirkunsisyon. Erze uje õr yarta de wɨr israel oso. Ochɨbɨte õr asa yarta pork Porrosht chiihla õr per shɨ hnakɨrbo wɨr uje ochɨbɨte duhu hnakɨrbo õr yarta. 12Ye ekeylo uje antni ye erahalo Cristope, hn ye meylo erze israel osope heke erze ahwoso uje Porrosht chɨbɨtkite wɨr ye par olakpe, shɨ par israel oso. Olak uje olak de nãhu ĩ̵rmo ye anemlo Porroshtpe par uje etĩ̵rlo ahɨr nehe, hn ye eeychãhalo Porroshtpe. Shɨ eeychãhalo porrosht kɨnãho. 13Antni olak dukuhlehe Porrosht per ele ahle ich ye olak dukuhlehepe shɨ pork ye otiislo uje Jesucristo tooho krus eeych hn ɨr armɨsta noshɨ. Wɨchɨ uje ɨshɨ olak hnɨtewɨhɨ Porrosht ahɨr heke olak owich de ɨre ahɨr. 14Cristo wɨchɨ uje nos shuu eyok aho kɨɨsɨhɨye pork shuu ɨtso erze israel oso hn erze dihipo kɨnãho uje ode lekɨtiyo. Wɨr otsɨtakye shɨ ɨtso uje moraylt de õr ehet per ɨre shuu õr aho kɨɨsɨhɨye heke chiyuhu ese uje ɨtso moraylt. 15Uje Cristo tooho krus eeychkite ich chɨbɨte uje asa ley waa je Moisés chichewkite ich ye jukur. Antni israel oso wɨr õr weeta nohmɨra hn nos wɨr dihipo kɨnãho wɨr õr weeta kɨnaha. Cristo nos shuu otakasho lawich par uje shɨ õr weeta nohmɨra de, shɨ erze uje ye olotiis ɨrpe. Heke shuu erze israel oso hn erze dihipo kɨnãho õr aho kɨɨsɨhɨye. 16Uje Cristo tooho krus eeychkite ich nos ɨshɨ eyok hnɨtewɨhɨ Porrosht ahɨr. Cristo shuu õr weeta nohmɨra erze dihipo kɨnãho hn erze israel oso par uje ye odɨtakyepe. 17Cristo taãchkite par ɨshɨ eyok hnɨtewɨhɨ Porrosht ahɨr hn shuu oyanɨmɨrãha lahwoso oyitɨm olak uje olak dukuhlehe Porrosht hn oyitɨm erze israel oso uje ye odukuhlehepe par uje oyuhu erze israel oso hn erze dihipo kɨnãho õr aho kɨɨsɨhɨye hn oyuhu õr aho kɨɨsɨhɨ Porrosht toy. 18Olak uje olak dukuhlehe Porroshtni hn õryok uje ye õryok dukuhlehe Porroshtpe ele ahle ich eyok ye yotiis Cristope heke Porrosht Ɨchɨbich nohmɨra de eyok aho. Wɨchɨ takashɨm eyok uje eyok orar yapur Porrosht ich shɨ ɨtso uje yɨtĩ̵r ɨre. 19Heke olak ich ye olak ɨlo erze dihipo kɨnãhope uje shɨ otĩ̵r hnɨmich yet otekɨrɨhɨ hn deeych yet ich ocheeshpo. Ele ahle ich olak kɨnãho pork olak owich de Porrosht ahɨr pork olak ɨr iiso ɨtso erze ɨr iiso yewo pork ich olak Porrosht aabo. 20Shɨ õryok ɨtso puertɨt uje oshiyokõr pork ye oyotiis erze apóstole hn erze profeta poruwo wɨshɨ õr ahwospe heke wɨr õr ɨtso uhwɨrbe uje ochihĩtsɨm hn shɨ õryok ɨtso puert ujuwo. Jesucristo wɨchɨ ɨtso ese kutich 21uje sontew ese puertɨt par uje ye kaype. Heke shɨ õryok Porrosht ɨr templo uje yesh oshiyokõr. 22Olak owich de toy ese Porrosht ihyuch pork Porrosht Ɨchɨbich de eyok aho.

will be added

X\