EFESIOS 1

1Yok Pablo. Porrosht chiihla yok par yok Jesucristo ɨr apóstol. Tichew ana hutɨta par tokosɨm olak uje olak Porrosht aabo uje ye otiislo eyok Ɨrhĩch Jesucristope, uje olak dechɨ dɨt Efeso. 2Sehe tuu eyok Deych Porrosht hn eyok Ɨrhĩch Jesucristo odosɨr olak hn oduhu olak aho kɨɨs. 3Pɨshɨbo watsaklo, oyeeychãha eyok Deych Porrosht, uu eyok Ɨrhĩch Jesucristo ɨr Deych. Wɨchɨ uje sosɨr eyok pork ye yotiis Cristope. Sosɨr eyok uje nos ɨshɨm eyok erze kuche om uje tãra ɨre. 4Uje ehn yahpaa Porrosht niyokõr nãhu ɨrmõkite ɨchii chiihla eyok par uje ye yotiis eyok Ɨrhĩch Jesucristope heke eyok ɨr aabo. Ele ahle nĩhyok ye eyok hnɨtew chɨhɨ Porrosht ahɨrpe heke ye latɨk pwele tatehe Porrosht ɨle ɨkɨch uje eyok hnɨtew dechɨ. 5Porrosht ich sahmũr pishɨ eyok. Uje ehn yahpaa niyokõr nãhu ɨrmõkite ɨchii chɨbɨte uje eyok tyenɨj yomsaha par ɨr aabo pork Jesucristo tyenɨj ɨshɨ eyok hnɨtewɨhɨ Porrosht ahɨr. Porrosht chɨbɨtkite shuu ɨtsorz shɨ pork wɨchɨ sahmũr shiyokõr shuu ɨtsorz. 6Heke nos yeeychãhalo Porrosht pork shuu yomsaha par eyok ɨr aaboni. Nĩhyok ye duhu bahatɨkɨsh uje sosɨr eyoklo pork ye yotiis ɨr Ijɨtpe uje ich sahmũrpa. 7Shɨ Cristo wɨchɨ uje tooho eyok hn ɨr armɨsta noshɨhɨ krus eeych par uje ɨshɨ eyok hnɨtewɨhɨ Porrosht ahɨr. Heke Porrosht perdonar eyok erze kuche mɨhnũwo uje yiyokõrlo shɨ pork sahmũr sosɨr eyok. 8Porrosht sosɨr pishɨ eyok, 9pork shuu eyok eykdeyo hn shuu yɨraha uje ɨre sahmũr, hn shuu yɨraha uje Cristo tɨrẽtni par ɨshɨ eyok hnɨtewɨhɨ Porrosht ahɨr. Shɨ tyenɨj ye yotiis ɨre par uje yomsaha par eyok ɨr aabo, per erze yewo ye odɨrehepe uje Porrosht shiyokorĩ̵hɨ eyokloni. 10Uje terĩ̵hɨ ese ɨshɨrĩt nehe ich Porrosht nos nɨshii kuche uje de poõrc hn uje de hnɨmich par uje Cristo masaha par õr bahluwa hn nos tɨbey õr. 11Porrosht chiihla eyok wapkite pork chɨraha uje deeych yet nehe hn ye yotiis Cristo heke nos shuu tokole shɨ ɨtso uje ɨre chɨbɨte wapkite 12par uje õryok webich oso uje ye oyotiis Cristope ich Porrosht ɨshɨmɨhɨ õryok ɨkɨrĩt shɨ par uje oyeeychãha ɨre hn oyuhu ɨre dich. 13Olak ɨtspo, entloni erze ahwoso uje ich ũru uje Cristo ɨshɨ olak hnɨtewɨhɨ Porrosht ahɨrkite, hn ye otiislo Cristope, heke Porrosht ɨshɨm olak Dechɨbich uje chɨbɨte wapkite par uje ɨshɨm eyok. Ese Porrosht Ɨchɨbich uje de eyok aho wɨchɨ yarta 14uje shuu ɨmeheeych uje eyok owich dechɨ Porrosht ahɨr. Deech yet nehe uje yaachĩ̵hɨlo wahacha Porrosht ahɨr ich yomsaha eyok owich, heke shish yeeychãhalo ɨre hn yuhu ɨre dich. 15Pɨshɨbo watsaklo, tukunt uje olak ye otiislo eyok Ɨrhĩch Jesuspe hn tukunt uje ahmũrlo erze Porrosht aabo yewo toy, 16heke shish tɨkɨnshɨp Porrosht par olak, hn shish yok orar tapur Porrosht par olak. 17Shish tapur eyok Ɨrhĩch Jesucristo ɨr Porrosht. Wɨchɨ uu ɨr Deych. Sehe tuu duhu olak eykdeyo hn duhu ma erahalo pishɨ ɨre. Ich om uje oso oshuu Porrosht dich. 18Shish tapur Porrosht par uje sehe tuu duhu ma erahalo ɨr ɨluu. Sehe tuu erahalo uje Porrosht chiihla olak par ɨshɨm olak kuche uje ich om nehe. Wɨr ich ɨhĩ̵rt pisho erze uje yesh Porrosht tɨbey par ɨshɨm daabo nehe. 19Hn shish tapur Porrosht par uje sehe tuu duhu erahalo lakɨrbo uje ich deyo. Nĩhyok ye uhurztɨkɨsh. Chĩ̵ra erze lakɨrbo uje sosɨr eyok uje eyok ɨr aabo. 20Chĩ̵ra erze lakɨrbo uje shuu Cristo ɨkponi hn tokolɨhɨ erze topo õr ahɨr hn shuu sakaha naãchta pork wɨchɨ ich dich toy. 21Porrosht shuu Cristo ma dich je nos wɨr erze uje õr ukurbo de ele ahle hn uje de nehe. 22Porrosht nos chɨbɨte erze kuche Cristo ɨr hnɨte uut pork nos serz heke nos de ɨr hme hn chɨbɨte toy uje Cristo wɨchɨ bahlut uje nos tɨbey Porrosht aabo shɨ ɨtso uje ɨre õr huta, 23hn Porrosht aabo wɨr shɨ õr ɨtso Cristo yũhurrza. Cristo nos de ĩ̵rmo lekɨtiyo hn poõrc.

will be added

X\