COLOSENSES 3

1Titɨm olak uje moymlo olak ɨluu mɨhnũni ich shɨ ɨtso uje atɨlo hn mẽylo Cristo uje toy hn mẽylo ɨre uje ɨkpo pork olak ɨluu ich ahle, heke tyenɨj ahmũrlo erze kuche uje de poõrc. Cristo dechɨ, hn yesh sakaha Porrosht ɨr waãchta pork wɨchɨ ich dich toy. 2Uhu olak eyuwo tɨsĩ̵r erze kuche uje de Porrosht ahɨr, hn ye shɨ uhu olak eyuwo tɨsĩ̵r erze kuche uje de nãhu ĩ̵rmo. 3Olak ich moymloni erze kuche mɨhnũwo uje ahakõrlo shɨ ɨtso uje atɨloni, hn Cristo tɨbey olak ɨkɨritĩ̵hɨ Porrosht ahɨr. 4Cristo wɨchɨ uje ɨshɨm eyok ese ɨkɨrĩt. Uje cheeshpo tĩ̵r hnɨmich nehe ich olak mẽylo ɨre, hn ɨre ich hũrpa. 5Heke titɨm olak, moymlo erze kuche mɨhnũwo uje de nãhu ĩ̵rmo shɨ ɨtso uje atɨlo. Erze mɨhnũwo uje oso oshiyokorĩ̵hɨye wɨr tata shuu ɨtsorz. Ich mĩ̵hnɨk uje hnakɨrbich hn tɨmcharrza ye onõyhi pishye ahɨrpe hn shɨ omuhuye ahɨr. Ich mĩ̵hnɨk uje tɨmcher tɨmcher õhyiyer ahɨr, hn ich mĩ̵hnɨk uje hnakɨrbo hnakɨrbo õhyiye ahɨr. Ich mĩ̵hnɨk uje yeẽk sahat loshɨpɨt, hn ich mĩ̵hnɨk uje yanak shuu loshɨpɨt sahat ɨre. Ich mĩ̵hnɨk uje pɨkɨhnino hn pɨkɨhnine oshiyokorĩ̵hɨye oshuu ɨtsorz. Ye ompe uje sehe ahakõrlo uhulo ɨtsorz, hn ich ye ompe uje uhu olak eyuwo tɨsĩ̵r erze kuche mɨhnũwo. Ye ompe uje ekutɨrãha olak kuche pork uje ahakõrlo uhulo ɨtsorz ich shɨ ɨtso uje eeychãhalo erze olak kuche eylo olak porroshtɨhɨ. 6Nos wɨr erze kuche mɨhnũwo uje titɨm olakɨke uje oso oshiyokõr oshuu ɨtsorz ich tyenɨj shuu Porrosht chesdelpa nehech sepyẽr õr. 7Antni olak ɨluu ɨtso õr heke ahakõrlo uhulo ɨtsorz, 8per ele ahle ich tyenɨj nos moymlo ahakõrlo erze mɨhnũwo. Moymlo uje aas olak uulo shɨchish, hn moymlo uje ehmerlo olak ehemurc olak aho. Ye uhu olak ɨljaabo, hn moymlo uje athɨlo olak ukushiĩhi oso par uje uhu otsɨtak yet. Ye eyuhu olak ahwoso mɨhnuwõho olak ahwo, 9hn ye ata olak ukushiĩhiye, pork moymlo erze olak ɨluu ɨler uje ich mɨhnũ uje wapni shish ahakõrlo. 10Uhu olak ɨluu ahle uje yesh Porrosht nɨshii par uje ich uhurc nehe hn olak ɨluu ɨtso Porrosht ɨr ɨluu. Wɨchɨ uje shuu olak ɨluu ahle. 11Ye latɨkɨsh kɨmɨjɨ olak griego yewo o kɨmɨjɨ olak israel yewo. Kɨmɨjɨ olak yarta de waa je iich otsɨɨ sirkunsisyon, o kɨmɨjɨ nĩhyok ich ye latɨkɨsh. Hn ye latɨkɨsh kɨmɨjɨ olak dihipo kɨnãho uje ye odɨraha latɨk o kɨmɨjɨ olak dihipo kɨnãho uje ma ye odɨraha latɨk. Ye latɨkɨsh kɨmɨjɨ olak õr yɨlo o kɨmɨjɨ ye õr yɨlope. Shɨ uje yɨrahalopa Cristo wɨchɨ uje ma om. 12Titɨm olak uje Porrosht chiihla olak par olak ɨr aabo pork sahmũr olak hn sehe duhu olak ɨluu ɨlo deluu, heke tyenɨj eenɨlo erze uje õr losuhlaabo hn osɨrlo õr. Shish tyenɨj osɨrlo yewo, hn ye olak narim olak. Ye owãhaloye per tyenɨj eenthɨloye. 13Tyenɨj olak ewenta olak leshɨbo hn uje olak yeẽk niyokõr mɨhnɨkĩ̵hɨ leshɨbich ich tyenɨj duhu dehet kɨɨsɨhɨ ɨre hn dɨkey uje shiyokõr mɨhnɨkĩ̵hɨ ɨre shɨ ɨtso uje eyok Ɨrhĩch perdonar eyok. 14Per kɨmɨjɨ ahmũrloye ich ma om par olak je nos wɨr erze ahwoso yewo uje titɨm olakɨke pork uje ahmũrloye ich nos olak aho kɨɨsɨhɨye hn ye etakloyepe. 15Cristo wɨchɨ uje shuu olak aho kɨɨs pork shuu erahalo uje ich om par ahakõrlo, heke shɨ ahakõrlo uje shuu olak aho kɨɨs. Porrosht chiihla olak par uje shɨ olak weeta nohmɨra shɨ ɨtso Cristo ɨr yũhurrza, hn shish tyenɨj enɨlo Porrosht. 16Enaha olak par uje erahalopa Cristo ɨr ahwoso. Ahakorãhaloye hn akɨtloye hn uhulo olak eyuwo tɨsĩ̵r uje ich om par atɨmloye. Ye uhulo olak koswãha uje eeychɨlo eẽtlo salmo hn eẽtlo imno hn korito hn enɨlo Porrosht. 17Nos wɨr erze uje ahakõrlo hn nos wɨr erze uje athɨlo wɨr uje tyenɨj uhulo tokole om pork Jesús wɨchɨ uu eyok Ɨrhĩch hn ahakõrlo par ɨre, hn tyenɨj enɨlo Porrosht uu eyok Deych hn ẽrlo eyok Ɨrhĩch Jesucristo ɨr iich. 18Titɨm olak tɨmcher, tyenɨj ahakõrlo uje olak abich tatɨm olak pork eyok Ɨrhĩch sahmũr uje ahakõrlo uhulo ɨtsorz. 19Hn titɨm olak hnakɨrbo, olak tyenɨj ahmũrlo olak ɨrẽhte hn ye abɨterlo õr. 20Hn titɨm olak pɨkɨhnino hn pɨkɨhnine, nos tyenɨj ahakõrlo uje olak deych hn olak data otatɨm olak pork eyok Ɨrhĩch sahmũr uje ahakõrlo uhulo ɨtsorz. 21Hn titɨm olak hnakɨrbo uje olak aabo ode, ye ahakoslo õr nehech uhulo ochesdelo. Kɨmɨjɨ uhulo õr dosdarak ich ye uhulo duurape. 22Hn titɨm olak uje olak õr yɨlo, tyenɨj nos ahakõrlo uje olak yɨnsɨro otatɨm olak. Ye shɨ uje oteychɨm olak ich hnii eyuhulo olak. Ye uhu olak aho yũhɨrsh. Tyenɨj ahakõrlo uje titɨm olakɨke pork atɨlɨlo eyok Ɨrhĩch Jesucristo. 23Nos wɨr erze uje ahakõrlo ich tyenɨj enaha olak par uje ahakõrlo shɨ ɨtso uje ahakõrlo par eyok Ɨrhĩch, ye shɨ par hnakɨrbope. 24Uje aachĩ̵hɨlo eyok Ɨrhĩch ahɨr nehe ich erahalo kɨmɨjɨ ahakõrlo uje om uje olak de nãhu ĩ̵rmo, ich ɨshɨm olak erze kuche uje de ɨre ahɨr wahacha poõrc, pork uje ahakõrlo olak ɨbiyo ich ahakõrlo Cristo ɨr ɨbiyo. Wɨchɨ uu olak Ɨrhĩch pisht. 25Yeẽk uje shiyokõr uje ich mɨhnũwo, Porrosht tyenɨj shuu erze kuche mɨhnũwo cheeshpo tĩ̵r ɨre nehe. Ye olak kɨnãhope pork Porrosht ye duhu yewo õr kɨnãhope hn duhu yewo õr kɨnãho. Shuu nos õr ɨtsye.

will be added

X\