COLOSENSES 2

1Sehe tuu erahalo uje tɨnaha yok par uje tokosɨr olak, hn par erze Porrosht aabo yewo uje ode wahacha dɨt Laodicea, hn par nos wɨr Porrosht aabo yewo uje yelɨj onomo yok. 2Shish tiyokõr tuu ɨtsorz par uje tuu olak duurapo hn par uje tuu erze Porrosht aabo yewo oduurapo par uje shish otsahmũrye. Heke erahalpa erze uje Porrosht ye duhu yewo odɨrehepe. Wɨr erze Cristo ɨr ɨluu. 3Cristo nos chɨraha kuche hn ɨre pwele shuu erahalo toy. 4Ahnũwo uje titɨm olakɨke wɨr par uje erahalo par uje nĩhyok ye latɨk pwele sehnyẽr olak. Wɨr ochɨrahapa ochiilehet par otsehnyẽr oso. 5Yok Pablo. Ye yok chɨhɨ olak ahɨrpe, per tɨbɨte shɨ ɨtso uje pɨchɨbich de olak ahɨr. Ich pehet kɨɨs uje olak aho kɨɨsɨhɨye hn yelɨj olak koswãha Cristo. 6Shɨ ye otiislo eyok Ɨrhĩch Jesucristo petɨkni heke amsahalo par olak Porrosht aabo. Ele ahle shɨ tyenɨj ma ye otiislo ɨre par uje ahakõrlo uje ɨre sahmũr. 7Heke olak ɨtso erze pohɨr uje ich uro yaka hn ye kaype. Ye otiislo Cristo hn shish ma ye otiislo ɨre shɨ ɨtso uje oshiyokorãha olakni, hn shish tyenɨj enɨlo Porrosht. 8Titɨm olak par uje abeylshɨp olak par uje nĩhyok ye latɨk pwele sehnyẽr olak chĩ̵ra deyuwo uje ye ũrpe. Erze õr ahwoso ich ye jukur pork õr ahwoso ye ɨlope uje Cristo shiyokorãha oso. Wɨr shɨ otata uje õr poruwo wɨshɨ otata. Erze õr ahwoso shɨ tãra demonyo, ye tãra Cristope. 9Nos wɨr Porrosht ukurbo hn ɨr eyuwo nos de Cristo, 10hn Cristo nos de olak aho heke Porrosht ukurbo hn ɨr eyuwo de olak toy. Cristo ich ma dich je nos wɨr erze uje õr ukurbo deyo de. 11Olak de Cristo heke ich shɨ ɨtso uje Cristo chɨbɨte olak asa yarta waa je iich otsɨɨ sirkunsisyon, per ye waa yarta yatape waa je hnakɨrbo ochɨbɨte õr uje ochiyuhu õr yũhurrza pɨkaabɨt. Asa yarta waa je Cristo chɨbɨte olak wɨchɨ uje chiyuhu olak ɨluu mɨhnũ. 12Uje otohɨrm olak ich shɨ ɨtso uje ochihitsɨm olak hnɨmich uut, hn uje ochiyuju olak hnɨmich uut, hn uje ochiyuhu olak awɨt uut ich shɨ ɨtso uje olak ɨkpo hn mẽylo Cristo uje ɨkpo pork ye otiislope uje Porrosht shuu Cristo ɨkponi hn tokolɨhɨ erze topo õr ahɨr. 13Antni ahakõrlo kuche mɨhnũwo heke shɨ olak ɨtso topo. Nĩhyok ye yarta chɨhɨ olak ahope waa je iich otsɨɨ sirkunsisyon. Olak ɨluu shish mɨhnũ pork ye Porrosht diyuhupe, per ele ahle ich olak Porrosht aabo heke ɨshɨm olak ese ɨkɨrĩt uje yelɨj nɨhna ɨre pork ye otiislo Cristope hn ɨre perdonar olak nos wɨr kuche mɨhnũwo uje ahakõrlo. 14Yiyokõrlo uje ich mɨhnũwoni. Yiyuwe Porrosht ɨr ley per Cristo nos ɨshɨ eyok hnɨtew uje de Porrosht ahɨr shɨ ɨtso uje nos chichew erze mɨhnũwo uje yiyokõrlo chɨbɨte hutɨta hn chɨbɨte asa hutɨta krus eeych hn chiwa klabo pork wɨr uje Cristo ɨshɨ uje tooho krus eeychkite. 15Cristo nos serz erze demonyo uje õr ukurbo deyo de hn erze yewo, hn chɨbɨte orhõta uje serz õr. Uje Cristo tooho krus eeych ich nos serz õr. 16Heke titɨm olak par uje ye uhu onehnyẽr olak erze uje otata uje ahakõrlo mɨhnũwo. Sehe onarim olak erze oposo uje elɨlo hn erze uje ehelo, hn sehe oduhu ahakõrlo õr ahmiyo uje õr ɨre otsahmũr o sehe oduhu ahakõrlo uje otsahmũr uje shekurko toy o kɨmɨjɨ sabta. 17Nos wɨr erze ahwoso uje otatɨm olak wɨr shɨ Porrosht sɨteẽta Cristo uje shiyokor uje taachĩ̵hɨ nãhu ɨrmõkite. Jesucristo wɨchɨ ich ũrpa, per erze israel oso õr ahmyo uje oshiyokõr wɨr shɨ Porrosht sɨteẽta Cristo hn tyenɨj oym erze õr ahmyo uje sɨteẽta ɨre pork Cristo taãchkite. 18Ye eẽtlo erze uje sehe onehnyẽr olak. Shɨ sehe oduhu enaha olak premit heke sehe oduhu eeychãhalo anjele. Wɨr otata uje õr ukurbo de shɨ pork omo hn ochɨkẽra anjele. Shɨ onarim ɨre, per shɨ tãra õr eyuwo uje oshuu tɨsĩ̵r erze mɨhnũwo. 19Oym erze ahwoso uje ich ũru uje tãra Cristo. Wɨchɨ shɨ ɨtso uu Porrosht aabo õr huta, hn Porrosht aabo wɨr shɨ õr ɨtso Cristo ɨr yũhurrza. Oso otɨbey neyũhurrza heke otaak par uje õr ukurbosh, hn õr ɨtɨso tehĩye par uje ochishew obiyo hn nos tokole om pork õr ɨkiyo om heke ich õr kresa. Shɨ ɨtso oso õr huta uje tɨbey õr yũhurrza ich shɨ ɨtso uje Cristo nos tɨbey Porrosht aabo hn shish ma shuu õr ɨluu ɨtso deluu. Wɨchɨ uje Porrosht sahmũr. 20Moymlo uje ahakõrlo erze kuche mɨhnũwo shɨ uhulo ɨtso uje atɨlo mẽylo Cristo uje toni. Erze mɨhnũwo tãra demonyo uje tɨbey oso uje ye odɨraha Porroshtpe uje ode nãhu ĩ̵rmo per Cristo chiyuhu olakɨhɨ demonyo õr hme. ¿Ɨnaapo heke sehe eeshlopo ahakõrlo erze kuche mɨhnũwo shɨ ɨtso uje olak de õr hmepo? ¿Ɨnaapo ahakõrlo erze õr ley uje oshɨm olak? 21Otatɨm olak otsɨɨ: --Ye asɨlo, hn ye elɨlo, hn ye akahɨrlo.-- 22Per nos wɨr kuche Porrosht chɨbɨte par sosɨr oso hn erze kuche shɨ sɨhna ɨre shɨchish. Erze õr ley uje otatɨm olak shɨ tãra oso õr eyuwo 23hn shuu oso õr eyuwo tɨsĩ̵r uje erze ley ich om hn shuu oso oteeychãha Porrosht, hn erze ley ye duhu onarim ɨrpe hnii shuu oshiyokõr mɨhnɨkĩ̵hɨ neyũhurrza, per erze ley ye jukur par uje sontew erze õr ɨluu mɨhnũ.

will be added

X\