COLOSENSES 1

1Yok Pablo. Yok Jesucristo ɨr apóstol pork Porrosht sahmũr uje tiyokorãha oso ɨr ahwoso. Timoteo de lɨka pahɨr. 2Oyuhu yet chichew ana hutɨta par tokosɨm olak uje olak Porrosht aabo uje olak dechɨ dɨt Colosas uje ye otiislo Cristope. Sehe tuu Porrosht uu eyok Deych dosɨr olak hn duhu olak aho kɨɨs. 3Shish õryok orar par olak hn oyɨna Porrosht uu eyok Ɨrhĩch Jesucristo ɨr Deych, 4pork oyunt uje olak ye otiislo Jesucristope, hn nos ahmũrlo Porrosht aabo yewo 5pork olak erahalo erze premyo uje ich ɨhĩ̵rtso uje Porrosht yesh tɨbeyɨhɨ wahacha poõrc par olak. Uje entloni erze uje ich ũru uje Jesús tokite hn ɨshɨ olak hnɨtewɨhɨ Porrosht ahɨr ich entlo toy erze uje dechɨ poõrc wɨr par olak. 6Yeẽk de uje shiyokorãha olakni shuu ɨtsorz hn otatehe ĩ̵rmo lekɨtiyo toy. Oso ich okɨhniya lekɨtiyo uje ye olotiispe erze ahwoso heke oshiyokõr uje ich om hn shish ma okɨhniya uje ye olotiispe shɨ ɨtso uje tokolɨhɨ olak uje entloni hn erahalo uje ich ũru uje Porrosht sahmũr olak. 7Epafras wɨchɨ shiyokorãha olakni. Wɨchɨ õryok leshap toy uje oyahmũrpa. Shiyokõr Porrosht ɨbiyo ɨtso õryok hn yelɨj sehi lahwoso uje tata. Uje tatɨm olak Cristoni ich takashɨm õryok oyiyokõr Cristo ɨr ɨbiyo. 8Wɨchɨ tatɨm õryok uje Porrosht Ɨchɨbich shuu ahmũrloye. 9Ese deeych uje tatɨm õryok shuu ɨtsorz nehech ele ahle shish õryok orar par olak par uje Porrosht Ɨchɨbich shuu olak eykdeyo par uje erahalo uje Porrosht sahmũr. 10Oyapur Porrosht par uje ahakõrlo uje ich om pork olak ɨr aabo hn ɨr aabo tyenɨj oshiyokõr uje eyok Ɨrhĩch sahmũr. Uje ahakõrlo uhulo ɨtsorz ich shish ahakõrlo uje ich om hn shish ma erahalo Porrosht ɨr ɨluu. 11Oyapur Porrosht toy par uje ɨshɨm olak ukurbo par uje olak ewenta nos wɨr erze kuche uje tĩ̵r olak. Ɨr ukurbo deyo de uje ɨre pwele ɨshɨm olak par uje shish entɨloye hn shish olak ayla. 12Heke shish enɨlo eyok Deych Porrosht pork wɨchɨ nɨshii olak par uje etĩ̵rlo ɨre ahɨr nehe hn ɨshɨm olak erze uje ich ɨhĩ̵rtso uje tyenɨj ɨshɨm daabo nehe wahacha Porrosht ahɨr uje luu chihit orĩ̵hɨ. 13Porrosht chiyuhu eyokɨhɨ Satanás hme uje shɨ ɨtso uje eyok de dɨhlelta hn chɨbɨte eyok Deyjɨt hme. Ich sahmũrpa Deyjɨt. 14Wɨchɨ uje ɨshɨ eyok hnɨtewɨhɨ Porrosht ahɨr hn Porrosht perdonar eyok erze kuche mɨhnũwo uje yiyokõrlo. 15Cristo wɨchɨ seẽtshɨp ɨr Deych Porrosht. Nĩhyok ye latɨk nomo ɨr Deych. Cristo ich ma dich je nos wɨr kuche uje Porrosht shiyokõrkite. 16Cristo nos shiyokõr kuche uje de poõrc hn uje de lɨka hnɨmich, erze uje eyok pwele yomo hn erze uje ye eyok pwele yomope, ɨtso erze anjele uje ye eyok pwele yomo õrpe, erze anjele uje õr ukurbo deyo hn erze uje õr ukurbo yerɨj deyo hn erze uje õr ukurbo arhaabo hn erze uje ma õr ukurbo pɨkaap. Nos wɨr õr ɨre wɨr uje Porrosht shuu Cristo shiyokõrkite par uje wɨr oshuu Cristo dich. 17Cristo ɨchii dekite ehn yahpaa nos kuche chɨhɨpe. Porrosht shuu wɨchɨ nos tɨbey erze kuche par uje ye nɨhna ɨrpe. 18Cristo wɨchɨ shɨ ɨtso Porrosht aabo õr huta hn Porrosht aabo wɨr shɨ õr ɨtso Cristo ɨr yũhurrza. Wɨchɨ webich osht uje tokolɨhɨ erze topo õr ahɨrkite hn ich ye toypo par uje wɨchɨ ich ma dich je nos wɨr kuche hn ich ma dich je nos wɨr oso toy, 19pork Porrosht sahmũr uje Cristo ɨr ɨluu shɨ ɨtso ɨr ɨluuta. 20Porrosht chiihla Jesuskite par uje shuu oso õr aho kɨɨsɨhɨ ɨre, erze uje de lɨka hnɨmich hn erze uje de wahacha poõrc. Shɨ uje tooho krus eeychkite hn ɨr armɨsta noshɨ ich shuu nos õr aho kɨɨsɨhɨ Porrosht. 21Titɨm olak uje antkite ich olak dukuhlehe Porrosht hn olak eyuwo mɨhnũwo heke shuu ey olak ɨmãha Porrosht pork shish ahakõrlo uje ich mɨhnũwo, 22per ele ahle ich olak aho kɨɨsɨhɨ Porrosht shɨ pork Cristo ɨshɨm ɨre oso hn oshuu oshuu toy par uje hnoy olak seya olak Porrosht ahɨr nehe. Ese deeych uje hnoy olak shuu ɨtsorz ich olak ɨluu ɨtso Cristo ɨr ɨluu. Nĩhyok ye latɨk pwele tata uje olak hnɨtew dechɨ 23kɨmɨjɨ ye otiislo Cristope hn ye olak koswãha. Shɨ olak ɨtso uhwɨrbe uje ochihitsɨm hn oshiyeru hn ich etan. Ye ompe uje moymlo uje anemlo par etĩ̵rlo olak owich uje de Porrosht ahɨr pork Jesús ɨshɨ olak hnɨtewni. Wɨr erze ahwoso uje entloni, hn wɨr erze uje otsanɨmɨrãha otatɨm erze oso uje ode ĩ̵rmo lekɨtiyo. Yok Pablo uje tomsaha par uje tanɨmɨrãha erze ahwoso toy. 24Titɨm olak uje ich pehet kɨɨs uje oshiyokõr mɨhnɨkĩ̵hɨ yok par olak. Erze mɨhnũwo uje tĩ̵r yok wɨr shɨ ɨtso uje Cristo tatni uje tyenɨj tokolɨhɨ yok par uje takashɨm erze Porrosht aabo yewo. Porrosht aabo wɨr shɨ õr ɨtso Cristo ɨr yũhurrza. 25Porrosht chiihla yok par ɨr ɨbɨk par uje tokosɨr olak hn nos tiyokorãha olak erze ɨr ahwoso. 26Antni Porrosht ye duhu oso odɨrehepe uje dihipo kɨnãho tyenɨj omasaha par ɨr aabo, per ele ahle ich shuu laabo ochɨraha. 27Porrosht sehe duhu odɨraha erze uje ye oso odɨraha petɨkni. Erze ahwoso uje shuu ochɨraha tata shuu ɨtsorz ɨm: --Cristo tyenɨj de olak aho uje olak dihipo kɨnãho par uje erahalo uje olak owich de Porrosht ahɨr hn shɨ anemlo uje etĩ̵rlo poõrc nehe.-- 28Heke nos oyitɨm õr uje Cristo tooho krus eeychni par õr. Uje tiyokorãha õr ich tiyokorãha õrpa par uje ochɨraha hn ye otĩ̵r urhuta bahluta ehet nehe. Shish oyakɨt õr par uje deeych yet nehe hn oyukwi õr oyeya õr Porrosht ɨkɨch. Ich õr ɨluu ɨhɨr pishɨ ɨtso Cristo ɨr ɨluu. 29Uje tiyokõr ahnũwo obiyo tuu ɨtsorz, ich tɨnaha yok hn Cristo takashɨm yok chĩ̵ra lakɨrbo.

will be added

X\