HECHOS 5

1Eseekite hn hnakɨrbich de uje iich otsɨɨ Ananías. Ɨr ɨrãhta iich otsɨɨ Safira. Wɨchɨ chiwãha ɨr hnɨmich pɨkaabɨt. 2Ese hnakɨrbich hõr nerãhta okeytkẽrye par uje tyenɨj ochɨhmer ɨr hnɨmich baho pɨt hn shɨ oshɨm pɨt uu apostole par oshuu õr eyuwo tɨsĩ̵r uje nos oshɨm õr. Heke oshiyokõr oshuu ɨtsorz. 3Pedro tatɨm Ananías ɨm: —Ananías, ¿ɨnaapo heke uhu Satanás chɨmchaha eyuwo par ahakõr ɨtsorz heke sehe ehnyẽr Porrosht Ɨchɨbich? Ye nos asɨm õryok uu owa hnɨmich bahope. Ehmer pɨt. 4Uje ehn ye anuwãha petɨkhna ich owa hnɨmich, hn uje anuwãhahna hn uu ɨr baho wɨr par owa par uje ahakõr uje ahmũr. ¿Ɨnaapo heke uhu eyuwo tɨsĩ̵r par uje ata ekushi? Ye ehnyẽr ospe. Shɨ sehe ehnyẽr Porrosht.— 5Uje Ananías chunt uje ɨtsorz hn kay ich toy. Nos wɨr oso uje ochunt uje ɨtsorz ich nos otolpa. 6Hnakɨrbito odechɨ. Otĩ̵r hn otsajuwe Ananías hn ohnoy ochihĩtsɨm. 7Uje ich terɨhɨ tre ora hn Ananías ɨrãhta taachĩ̵hɨchɨs per ye dɨrehepe uje tokolɨke ɨtsorz. 8Pedro umo ɨm: —Sehe tuu atɨm yok. ¿Je shiyehe wɨchɨ ɨr bahat ese hnɨmich uje owa hõr Ananías anuwãhalohna? Hn umo Pedro ɨm: —Ẽhe, oyiwãhahna shɨyehe wɨchɨ ɨr bahat.— 9Pedro umo wate ɨm: —¿Ɨnaapo heke hõr abich uhulo olak eyuwo ɨtsye par uje sehe ehnyẽrlo Porrosht Ɨchɨbich? Hmeychɨm, erze hnakɨrbito uje ohnoy abich ochihitsɨmɨke ich otaãchpo hn tyenɨj ohnoy owa par uje ochihĩtsɨm owa toy.— 10Ɨchii Safira kayɨhɨchɨs Pedro ɨkɨch hn toy. Erze hnakɨrbito omasaha pwert ehet hn omo wate uje toy. Ochishew hn ohnoy ochihitsɨmɨhɨ wahacha ɨr abich lɨshɨ ahɨr. 11Ich nos wɨr Porrosht aabo uje ochunt uje ɨtsorz ich otolpa, hn nos wɨr oso yewo uje ochunt ich otola toy. 12Eseekite hn apostole shish oshiyokõr erze yar uje nĩhyok ye latɨk pwele niyokõr. Erze yar wɨr uje shuu ochɨraha uje Porrosht de õr ahɨr. Shuu oso ochishlabe. Hn nos wɨr Porrosht aabo shish otakɨsho lawichɨhɨchɨs ese puurc uje iich otsɨɨ Salomón wahacha templo patikɨt ehet. 13Nos wɨr oso yewo ich otsahmũr erze Porrosht aabo per ich otolpa. Ye onahmũrpe par uje õya õr pork ye onahmũr pishɨ Porroshtpe. 14Per shish ma okɨhniya hnakɨrbo hn tɨmcher omasaha Porrosht aabo pork ye odotiis uu Ɨrhĩ̵chpe. 15Heke nos wɨr oso hnoy erze uje õr permo shɨ ode darpɨlo eeyo o kɨmɨjɨ detẽno eeyo hn ochɨbɨte õr erze daho wɨro par uje oyem uje Pedro chɨkãhachɨs hn shɨ ɨr puurc terɨhɨ õr ich chukuta õr. 16Oso yewo ich okɨhniya otãra duuwo ijaabo uje de dɨt Jerusalén wɨro uje otĩ̵r wɨchɨ dɨt Jerusalén otõhwa erze oso uje õr permo hn otõhwa erze uje ɨchɨbiyo mɨhnũwo de õr aho hn nos ochukuta õr. 17Eseekite ich ese saserdote õr bahlut pisht hn nos wɨr erze ɨr ihyẽro uje shish õya uje õr ɨluu iich otsɨɨ saduseo ich opota pishɨ wɨr apostole õr obiyo nehech otsɨtak õr. 18Oshuu ochishew õr hn ochɨmchaha õr karsel ehet uje de dɨt ehet. 19Per uje dɨhlich hn Ɨrhĩch ɨr anjel chɨtsẽr asa karsel uhɨr hn shuu otokole. 20Ese anjel umo õr ɨm: —Bolɨlo etĩ̵rlo wahacha templo patikɨt ehet hn alehelo hn nos atɨmlo oso ese ɨkɨrĩt uje yelɨj nɨhna ɨre.— 21Uje ehn dɨhɨrbak hn ohno otĩ̵r wahacha templo patikɨt ehet ɨchii oshiyokorãha oso Porrosht ahwoso oshuu ɨtso uje ese anjel tatɨm õrkɨ. Eseekite hn uu saserdote õr bahlut pisht hn nos wɨr uje ode ahɨr otaachĩ̵hɨchɨs ese owich uje Junta Suprema shish otakɨsho lawichɨhɨ. Oshuu nos otɨbii uu israel oso õr bahluwo yewo uje ode asa weeta ehet toy. Uje nos odechɨ ich oshuu ohno otĩ̵r karsel par uje otõhwa uu apostole uje odechɨ. 22Per uje erze ohyerptoso otaachĩ̵hɨ wahacha karsel ehet hn ye odish õrpe. Heke ohno ocheeshpo otĩ̵r wahacha uje õr bahluwo ode par uje otatɨm õr. Omo õr otsɨɨ: 23—Uje oyaachĩ̵hɨ karseleke ich nos wɨr pwert uhɨr kutute. Uu ohyerptoso ehn ode pwert uhɨr ebich, per uje oyɨtsẽr uu pwert uhɨrke ich nĩhyok ye latɨk chɨhɨ ehet.— 24Uje erze ohyerptoso õr bahlut uje tɨbey templo hõr uu saserdote õr bahluwo ochunt uje ɨtsorz ich ochishlabe hn omye otsɨɨ: —¿Keshɨ latɨkpo uje tyenɨj tokole nehe ɨtsorz?— 25Hnakɨrbich nohmet taãcha hn umo õr ɨm: —Hmeychɨmlo, uu hnakɨrbo uje emchahalo õr karsel ehethna ode wahacha templo patikɨt ehet. Yesh oshiyokorãha oso.— 26Uje ochunt ɨtsorz ich uu ohyerptoso õr bahlut uje tɨbey templo hõr uu ɨr ohyerptoso ohno par uje ochukwi wɨr apostole. Uje ochish õr hn ohnoy õr per ich ye oloter õrpe pork otola erze oso uje odechɨ õr ahɨr par otẽr õr. Kɨmɨjɨ oloter uu apostole ich tyenɨj wɨr oshuu erze ohyerptoso oshuu otoy ochĩ̵ra õr kojano po. 27Ohnoy õr otseya õr wahacha asa õr weeta ɨkɨch waa je iich otsɨɨ Junta Suprema. Uu saserdote õr bahlut pisht umo õr ɨm: 28—Keshɨ õryok oyahɨrm olakhna par uje ye ahakorãhalo oso ese hnakɨrbich ɨr ɨluu per shish ahakorãhalo erze dɨt Jerusalén oso uhulo ɨtsorz hn shish sehe eytɨlo õryok wɨchɨ hnakɨrbich uje oshuu oshuu toni.— 29Pedro hn nos wɨr apostole yewo otatɨm õr otsɨɨ: —Õryok shish oyiyokõr uje Porrosht tata hn ye oyiyokõrpe erze kuche uje shɨ oso otata. 30Olak tukulo Jesusni hn owɨshɨlo ebɨtɨlo krus eeych par uje toy. Per eyoklo poruwo wɨshɨ õr Porrosht wɨchɨ uje shuu Jesús ɨkponi. 31Wɨchɨ sem ɨre chĩ̵ra dakɨrbo hn chɨbɨte naãchta. Shuu masaha par õr bahluwa par uje sosɨr uu israel oso par uje nos wɨr õr ɨre oym uu deluu mɨhnũ hn par perdonar õr erze kuche mɨhnũwo uje shish oshiyokõr uje ye Porrosht nahmũrpe. 32Nos wɨr õryok tyenɨj shish oyiita oyuhu ɨtsorz. Porrosht Ɨchɨbich tatpo shuu ɨtsorz. Porrosht nos ɨshɨm õr Dechɨbich erze oso uje shish oshiyokõr uje ɨre sahmũr.— 33Uje ochunt erze apostole õr ahwoso ich otsɨtak pish õr nehech sehe oduhu õr oduhu otoy. 34Per erze õr bahluwo õr ehet hnakɨrbich nohmet de uje ɨr ɨluu iich otsɨɨ fariseo. Wɨchɨ shish shiyokorãha oso Porrosht ɨr ley. Ɨr iich otsɨɨ Gamaliel. Ese hnakɨrbich ich nos oso otsahmũr. Wɨchɨ iyehetɨhɨchɨs erze õr bahluwo yewo õr ɨkɨch hn shuu oshuu erze apostole otokole par uje okeytkẽrye. 35Uje otokolɨke ɨchii ese hnakɨrbich umo wɨr õr bahluwo yewo ɨm: —Israel oso watsaklo, tyenɨj nos uhulo olak eyuwo tɨsĩ̵r par uje erahalo uje tyenɨj ahakorĩ̵hɨlo nãhu hnakɨrbo. 36Deeych yetkite hn ese hnakɨrbich uje iich otsɨɨ Teudas sehe dii ɨr õr bahluwaha. Hnakɨrbo õr kwatro syento uje õya ɨre. Per uje oshuu ɨre oshuu tokite hn erze hnakɨrbo uje õya ɨre ochur lekɨtiyo. Tokole ye jukur. 37Deeych yet ich terɨhɨ uje oshiyokõr senso par uje ochɨraha õr keshɨ oterɨhɨ latɨkpo hn hnakɨrbich yet de uje iich otsɨɨ Judas. Wɨchɨ israelya. Tãra wahacha hnɨmich Galilea. Wɨchɨ sehe dii ɨr õr bahluwaha toy hn ich oso okɨhniya uje õya ɨre. Uje oshuu oshuu tokite ich nos wɨr oso uje õya ɨre okarẽhe lekɨtiyo. 38Heke yok takɨt olak par uje ye ahakoslo nãhu hnakɨrbo uje õya Jesusni. Moymlo õr par uje shɨ odo pork kɨmɨjɨ erze uje oshiyokõr tãra hnakɨrbich ich tyenɨj tokole ye jukur petɨk nehe. 39Per kɨmɨjɨ tãra Porrosht ich nos wɨr olak ich ye olak pwelpe par uje ontewlo õr. Heke tokole uje atsĩ̵rlo Porrosht.— 40Nos wɨr õr ɨre otsahmũr uje Gamaliel tatɨm õr. Heke oshuu erze apostole omasahapo Junta Suprema õr ɨkɨch. Otsepyẽr õr hn otsahĩ̵rm õr par uje ich ye otata Jesús otatɨm oso hn oshuu ohno otokolɨhɨchɨs. 41Uje erze apostole otokolɨhɨchɨs erze õr bahluwo õr ɨkɨch ich nos õr aylpa pork Porrosht chɨbɨte uje tyenɨj õr ewenta uje otsepyẽr õr. Nos wɨr õr ɨre ye opookpe. Shɨ õr ewenta pork ye odotiis Jesuspe. 42Kal deeych ich shish oshiyokorãha oso wahacha templo patikɨt ehet hn oshiyokorãha orĩ̵hɨ uu õr ihyuwo aho. Otatɨm õr uje Jesús wɨchɨ Cristo. Wɨchɨ uje ɨshɨ oso õr hnɨtewɨhɨ Porrosht ahɨr. Ye onoympe uje oshiyokorãha õr.

will be added

X\