HECHOS 16

1Eseekite hn Pablo hn Silas otaachĩ̵hɨ erze duwo uje iiyo otsɨɨ Derbe hn Listra. Ochish Timoteo uje debuhuchɨs Listra. Wɨchɨ Porrosht aap. Waa ɨr data israel yãr hn Porrosht aap toy, per ɨr deych griego ya. 2Erze Porrosht aabo uje odebuhu wahacha Listra hn Iconio nos ochɨraha Timoteo hn otata uje ɨrɨ ɨluu om. 3Pablo sehe duhu wɨchɨ nõya ɨre per nos oso ochɨraha uje yahpaa yãrɨrash waa je iich otsɨɨ sirkunsisyon. Erze israel oso ochɨraha ese ɨr deych wɨchɨ griego ya heke Pablo chɨbɨte ese Timoteo ɨr yarta par uje erze israel oso uje odebuhu wahacha ich ye odɨtak ɨrpe. 4Eseekite uje Pablo hõr otĩ̵r erze duwo uje de lekɨtiyo hn õr ler wɨr õr ahwoso uje erze apóstole hn erze anciano ochichewni par uje Porrosht aabo oshiyokõr. Erze apóstole hn erze anciano ode wahacha Jerusalén. 5Pablo shish shiyokorãha erze Porrosht aabo uje odechɨ heke ich ochɨraha ma hn ye onoym Jesuspe. Kal deeych ich oso okɨhniya omasaha par Porrosht aabo. 6Eseekite hn Porrosht Ɨchɨbich sontew Pablo hõr par uje ye odo otĩ̵r ese hnɨmich Asia par otsanɨmɨrãha Porrosht ahwoso. Heke ohno ochɨkãha erze hnɨmo Frigia hn Galacia. 7Uje ich otaachĩ̵hɨ ese Galacia hnɨmich uhurc per ye otĩ̵r ese hnɨmich Misiape ich sehe otĩ̵r wahacha hnɨmich Bitinia per Jesús Ɨchɨbich ye nahmũrpe par uje otĩ̵r wahacha. 8Heke ochɨkãhachɨs ese hnɨmich Misia nehech otaachĩ̵hɨchɨ ese dɨt Troas. 9Uje ich dɨhlak hn Pablo umo hn chɨkẽra hnakɨrbitɨt iyehechɨs ɨr ɨkɨch. Wɨchɨ Macedonia os. Tatɨm Pablo ɨm: —Erẽt etĩ̵r lɨka Macedonia par uje akashɨm õryok.— 10Uje Pablo chɨkẽra ese hnakɨrbitɨtɨke ɨchii oyɨnshii õryok shɨchish par uje oyɨtĩ̵r Macedonia pork oyɨraha uje Porrosht sehe duhu oyuko oyɨtĩ̵r õr par oyitɨm õr uje Jesús ɨshɨ õr hnɨtewɨhɨ Porrosht ahɨrkite. 11Eseekite hn oyitokolɨhɨ dɨt Troas hn oyuko oyonãha pohorrza par uje oyɨtĩ̵r wahacha Samotracia. Deychole hn oyitokolɨhɨ Samotracia hn oyɨtĩ̵r wahacha Neápolis. 12Oyitokolɨhɨ Neápolis hn oyɨrkɨhɨ hnɨmich nehech oyaachĩ̵hɨ wahacha dɨt Filipos. Ese dɨt romano oso oshiyokõrni. Wɨchɨ ma dich je erze duwo yewo uje de ese hnɨmich Macedonia. Õryok oyiyakaha shɨ oyuhu daalo arhaabo. 13Uje ich terɨhɨ sabta hn oyitokolɨhɨchɨs dɨt ehet. Oyuko oyɨtĩ̵r onoota wɨrc. Õryok eyuwo tɨsĩ̵r uje oso otakɨsho lawichɨhɨ wahacha par uje oteeychãha Porrosht pork nĩhyok ye sinagogĩ̵rsh. Oyish tɨmcher uje otakɨsho lawichɨhɨ wahacha hn oyiyakaha õr ahɨr ɨchii oyanɨmɨrãha Porrosht ahwoso oyitɨm õr. 14Tɨmcharrza nohmata dechɨ waa je iich otsɨɨ Lidia. Wate dɨt Tiatira oto. Ɨr ɨbiyo shɨ chiwãha bortɨso ɨhĩ̵rtso uje kolor lila. Asa tɨmcharrza shish teeychãha Porrosht heke Porrosht shuu wate ehet kɨɨs par uje sahmũr erze uje Pablo tata. 15Oyohɨrm wate hn nos wɨr ɨr iiso oyohɨrm õr toy. Hn asa Lidia tatɨm õryok ɨm: —Erahalo uje yok Porrosht aap heke yukulo akahalo pihyuch.— Wate shish tatɨm õryok nehech oyuko oyɨtĩ̵r ɨr ihyuch. 16Eseekite hn oyukopo oyɨtĩ̵r onoota wɨrc par uje oyeechãha Porrosht hn tɨmcharrza yata chish oryokĩ̵hɨ dehet pehet. Wate ɨchɨbich mĩ̵hnt de ehet uje shuu chɨraha kuche uje tyenɨj tokole nehe. Wate shɨ õr yɨla hn shuu wɨr nensɨro otserz hnote ich kɨhniya. 17Asa tɨmcharrza apɨbitɨta ɨchii iyehe Pablo hõr nẽr. Shish tɨbich par nos oso ochunt ɨm: —Ahnũwo hnakɨrbo nãhu Porrosht ɨbiyo. Porrosht ich dich. Erze hnakɨrbo otatɨm olak ese dehet yet uje seya olak Porrosht ahɨr.— 18Daalo kɨhniya uje shish iyehe õryok nẽr hn tɨbich shuu ɨtsorz. Ich uhurc hn Pablo sɨtak. Somtɨs ɨre hn tatɨm ese demonit uje de wate ehet par shuu tokole hn ɨm: —Titɨm owa tĩ̵ra Jesucristo ɨr iich par uje atokolɨhɨ asa tɨmcharrza ehet.— Ese demonit tokole shɨchish. 19Uje asa õr yɨlta ɨr yɨnsɨro ochɨraha uje ese demonit tokolɨhɨ ehetɨke hn ye õr pwelpe par otserz hnote wɨr ochishew Pablo hn Silas. Ohnoy õr otseya õr dɨt ehet uje õr bahluwo ode. 20Ochɨbɨte õr erze õr bahluwo õr ɨkɨch hn otatɨm erze õr bahluwo otsɨɨ: —Nãhu hnakɨrbo israel oso. Oshuu wɨr dɨt oso ye õr aho kɨɨspe. 21Eyok romano oso. Oshiyokorãha eyok kuche par uje sehe oduhu yiyokõr per eyok ye eyok pwelpe par uje yiyokõr pork eyok ley sɨtak erze õr ɨluu.— 22Oso yewo otakɨsho lawich ɨchii otsɨtak hn otatɨm toy erze õr bahluwo uje Pablo hn Silas oshiyokõr mɨhnũwo. Erze õr bahluwo oshuu ochiyuhu Pablo hn Silas õr ɨshuwo hn oshuu otsepyẽr õr ochĩ̵ra õr piyo. 23Uje oym uje oshuu õrkɨ hn oshuu ohnoy õr otseya õr karsel ehet. Otatɨm ese uje tɨbey karsel ehet par uje tɨbey pishɨ õr. 24Uje wɨchɨ chunt uje ɨtsorz hn chɨmchaha õr karsel ehet pisht, hn chɨmchaha erze õr hnɨte tabla aho hn shiyeru. 25Uje terɨhɨ dɨhlich pehet hn Pablo hõr Silas õr orar hn oteeychɨ otseẽt imno. Erze yewo uje odechɨ karsel ehet otẽr õr. 26Ɨchii ochuuna uje hnɨmich telerrza ich jwerte. Shuu wate karsel telerrzpa. Nos wɨr uhɨr chɨtsẽr ɨre hn erze kenena ich nos tokolɨhɨ õr meyko. 27Ese uje tɨbey karsel nɨhɨ. Uje teychɨm erze uhɨr uje ich nos ɨsaha hn ɨr eyuwo tɨsĩ̵r kelje wɨr nos otokolɨke heke chiyuhu ɨr espada par uje shuu ɨre. 28Hn Pablo tɨbich ɨm: —Ye tuk owa. Nos õryok de lɨka.— 29Hn ese uje tɨbey karsel ehet tɨbii yet par uje tõhwa nampyon. Uje tohwãka hn ese uje tɨbey karsel ushɨɨhɨchɨs karsel ehet. Ich ɨr ɨkiyo tãra. Ɨchii icha dete hnɨmoho Pablo hn ese Silas õr ɨkɨch. 30Chiyuhu orĩ̵hɨchɨs karsel ehet hn ɨm: —Ɨrhĩche hõr, ¿tuu ɨnaapo par uje yok owich omɨhɨ Porrosht ahɨr?— 31Otatɨm ɨre otsɨɨ: —Ye otiis ese Ɨrhĩch Jesucristo par uje owa owich de Porrosht ahɨr. Hn nos wɨr eeyso ye olotiis par uje õr owich de toy.— 32Otsanɨmɨrãha ese Ɨrhĩch Jesús ɨr ahwoso otatɨm ese hnakɨrbich uje tɨbey karsel ehet hn nos wɨr erze yewo uje ode ɨr ihyuch ehet. 33Ese uje tɨbey karsel chunt õr ahwoso ɨchii nos churhũ õr obɨlo.Uje yuwɨrke hn Pablo hõr ohnoy ɨre hn nos wɨr ɨr iiso hn otohɨrm õr. 34Uje nos otohɨrm õr hn ohnoy Pablo hn Silas par uje oshuu otaakɨhɨ dahuch. Ɨre hn nos wɨr ɨr iiso ich õr ayla pork ye olotiis Porroshtpe hn omasaha par Porrosht aabo. 35Uje ich dɨhɨrbɨt hn erze õr bahluwo oshuu ohyerptoso ohno otatɨm ese uje tɨbey karsel par uje chiyuhu Pablo hn Silas. 36Heke ese uje tɨbey karsel tatɨm Pablo ɨm: —Erze õr bahluwo oshuu otatɨm yokɨke par uje tiyuhu owa hn Silas. Ele ahle atokolɨhɨ lɨklo. Bolɨlo uhu olak aho kɨɨs.— 37Per Pablo tatɨm erze ohyerptoso ɨm: —Õryok romano oso. Erze dɨt oso õr bahluwo oshuu otsepyẽr oryokĩ̵hɨ erze dɨt oso õr ɨkɨchhna per ye oteychɨm wappe kesh latɨkĩ̵r uje mĩ̵hnɨk uje oyiyokõr. Oshuu ohnoy õryok ochɨmchaha õryok karsel ehethna hn ele ahle ich sehe odiyuhu õryok wɨshɨ. Erze õr bahluwo sehe olakɨs ɨre per ye ompe. Shɨ or ɨre uje tyenɨj otɨrẽt par ochiyuhu õryok wɨshɨ karsel ehet.— 38Eseekite hn erze ohyerptoso ohno ocheeshpo otĩ̵r wahacha erze dɨt oso õr bahluwo hn otatɨm õr uje Pablo shuu ɨtsorz. Uje õr bahluwo ochunt uje Pablo hn Silas õr romano oso ich ochishlabe. 39Ohno otĩ̵r wahacha karsel hn otsapur Pablo hn Silas otsɨɨ: —Ye owãhalo õryok. Uhu olak aho kɨɨsɨhɨ õryok. Ochiyuhu õr karsel ehet hn otatɨm õr otsɨɨ: —Atokolɨhɨ lɨklo dɨt ehet. Bolɨlo.— 40Uje Pablo hn Silas otokolɨhɨchɨs karsel ehetɨke hn ohno otĩ̵r Lidia ihyuch. Oshuu Porrosht aabo otakɨsho lawich hn otsanɨmɨrãha Porrosht ahwoso otatɨm õr. Uje yuwɨrke hn Pablo hn Silas ohno otokolɨhɨ dɨt ehet.

will be added

X\