HECHOS 12

1Eseekite hn rey Herodes shuu ochishew Porrosht aabo nohmɨramo par uje shuu oshiyokõr kuche mɨhnuwõho õr. 2Ɨre shuu oshuu wɨchɨ Santiago lɨshɨ oshuu toy ochĩ̵ra espada. Wɨchɨ uu apóstol Juan leshɨbich. 3Uje rey Herodes chɨrahaka uje nos wɨr israel oso otsahmũr uje wɨchɨ shuu oshuu Santiago oshuu toy ich shuu ochishew Pedro toy. Ochishew ɨre uje erze israel oso õr ahamich dich tokole uje otew pankite uje nĩhyok ye eyhirãsh. 4Uje rey Herodes chishew Pedro hn shuu ohnoy ochɨmchaha karsel ehet. Ɨshɨm uu ohyerptoso õr dyes y seys uje õr wee kwatro par uje otɨbey. Herodes chɨbɨte uje ese õr ahamich yuwɨr nehe ich tyenɨj shuu ohnoy otseya wahacha oso õr ɨkɨch par uje shuu oshuu oshuu toy. 5Uje ehn Pedro de wahacha karsel ehet ich otɨbeypa per Porrosht aabo shish õr orar otsapur Porrosht par uje takashɨm Pedro. 6Eseekite uje ich dɨhlich hn Pedro umuhu wɨr õr ehet erze ohyerptoso uje õr osiyer. Oshiyeru uku kenena oshuu tẽhi ohyerptoso õr uku. Uu ohyerptoso yewo oyehe wate karsel ebich. Uje dechole hn Herodes de par uje chiyuhu Pedro par uje shuu ohnoy otseya wahacha par uje oso oteychɨm uje shuu oshuu Pedro oshuu toy. 7Per ese dɨhlichni ɨchii Ɨrhĩch ɨr anjel masaha wate karsel ehet hn ich chihit ese uje Pedro de. Sakahɨr Pedro arzɨbich hn shuu Pedro nĩ̵hɨ. Tatɨm ɨm: —Erĩ̵hɨ shɨchish.— Ich uu kenena tokolɨhɨ Pedro hme. 8Ese anjel tatɨm ɨm: —Anãha asuwo hn erɨhɨ erihyo.— Pedro shiyokõr uje wɨchɨ tatɨm. Tatɨm ɨm: —Anãha anerpta hn yuko mẽya yok.— 9Pedro tokolɨhɨ karsel ehet hno ĩya ese anjel, per ɨre ich ye dɨrehepe uje ich ũru uje ese anjel shiyokorĩ̵hɨ ɨre. Chɨbɨte uje shɨ chɨkẽra uje tokolɨhɨ karsel. 10Ohno oyuwe ohyerptosht webich osht hn oyuwe toy uu ohyerptosht nẽr osht. Ohno ochish waa pwert uhurrza waa je fyerzo uje tyenɨj ochɨkãha par otokole otĩ̵r dɨt ehet. Uhurrza chɨtsẽr ɨre hn otokole. Uje ich ohno odɨrkɨhɨ dɨt ehet pɨkaap hn Pedro teychɨm ich nĩhyok ye anjeltɨkɨsh. 11Uje Pedro chɨraha uje tokolɨhɨ karsel ehet hn ɨm: —Ich ũru uje Ɨrhĩch shuu ɨr anjel chiyuhu yokɨhɨ rey Herodes hme par uje ye duhu oduhu yok oduhu tɨkɨtɨ. Erze israel oso sehe oteychɨm yok uje tɨkɨtɨ nehe per ye oteychɨm yokpe.— 12Uje Pedro kemɨhɨ uje tokolɨhɨ karsel ehet ich hno tĩ̵r María ihyuch. Wate Juan ɨr data. Ese Juan ɨr iich yet otsɨɨ Marcos. Porrosht aabo okɨhniya otakɨsho lawichɨhɨchɨs ese María ihyuch ehet hn õr orar otsapur Porrosht par uje takashɨm Pedro. 13Pedro shuu pwert uhurrza waa je de dehet wɨrc hn tɨmcharrza apɨbitɨta hno dale waa je iich otsɨɨ Rode. Tatɨm ɨm: —¿Owa yeẽkpo?— 14Chunt Pedro ahwoso hn ich aylpa, per ye dɨtsẽr pwert uhurrzpe. Hno uushɨ tatɨm õr ɨm: —Pedro dechɨ pwert ebich.— 15Otatɨm otsɨɨ: —Owa totihla.— Per ɨre shish tatɨm õr uje ich ũru uje wɨchɨ Pedro. Heke nos wɨr ochɨbɨte uje wɨchɨ shɨ ɨr anjel uje shish tɨbey ɨre. 16Mahn Pedro shish shuu pwert uhurrza. Uje otsɨtsẽr ich omo hn ich nos ochishlabe. 17Pedro seem nahmɨta par uje shuu ye odiilehetpe hn nos tatɨm õr uje Ɨrhĩch chiyuhu ɨrehe karsel ehetɨke. Tatɨm õr toy ɨm: —Atɨmlo Santiago hn nos atɨmlo Porrosht aabo yewo uje Porrosht chiyuhu yokɨhɨ karsel ehetɨke.— Uje sɨhna lahwoso keytkẽr õr ich hno tokolɨhɨchɨs hno tĩ̵r owich yet. 18Eseekite uje lekɨtiyo poro ich ohyerptoso onĩ̵hɨ ich ochishlabe uje Pedro nihyokĩ̵hɨ õr ahɨr. 19Rey Herodes shuu ochukwi Pedro per ich ye odishpe, heke keytkẽr uu ohyerptoso uje otɨbey Pedroko. Shuu omasaha Pedro owich par uje oshuu õr oshuu otoy. Eseekite ich Herodes tokolɨhɨchɨs hnɨmich Judea hn hno tĩ̵r wahacha dɨt Cesarea par uje sakahachɨs shuu daalo arhaabo. 20Rey Herodes ich chesdelpa chowãha wɨr dɨt Tiro oso hn erze dɨt Sidón oso. Heke nos wɨr duuwo oso otakɨsho lawich par uje okeytkẽrye par uje nos oshuu deyuwo ɨtsye. Sehe odo otĩ̵r rey Herodes ɨkɨch. Wap nos ohno otĩ̵r ese hnakɨrbich uje iich otsɨɨ Blasto par uje sehe oduhu takashɨm õr. Ese Blasto wɨchɨ rey Herodes ɨr ɨbɨk. Sehe oduhu rey Herodes ehet kɨɨsɨhɨ õr pork õr poso shɨ tãra ese rey ɨr hnɨmich. 21Eseekite hn rey Herodes chɨbɨte deeych par uje otɨrẽt nehe. Uje terɨhɨ ese deeych ich rey Herodes iyãha õr ɨshuwo uje ich ɨhĩ̵rtso uje rey oyãha hn sakaha debɨta eeych hn keytkẽr õr. 22Nos wɨr oso uje ochunt rey Herodes ɨr ahwoso ich nos otɨbich otsɨɨ: —Erze ɨr ahwoso ye tãra Herodespe. Shɨ tãra uu porrosht yet.— 23Uje otata oshuu ɨtsorz hn Herodes ye tata latɨk heke ese Ɨrhĩch ɨr anjel shuu wɨchɨ permo pork ye duhu Porrosht dichpe. Shuu dɨchashĩ̵ro masaha ehet tew nehech shuu toy. 24Eseekite ich Porrosht ahwoso chũr lekɨtiyohochɨs hn ich oso okɨhniya ich ye odotiis ɨrpe. 25Eseekite uje Bernabé hn Saulo otsɨhna debiyohochɨs dɨt Jerusalén hn ohno ocheeshpo otĩ̵r dɨt Antioquía. Ohnoy Juan. Ɨr iich yet otsɨɨ Marcos.

will be added

X\