HECHOS 11

1Eseekite hn apóstole hn nos wɨr Porrosht aabo yewo uje odechɨ hnɨmich Judea ochunt uje dihipo kɨnãho omasaha par Porrosht aabo toy. 2Heke uje Pedro cheeshpo tĩ̵r dɨt Jerusalén ich nos wɨr israel oso uje õr Porrosht aabo ich otsowãha Pedro. 3Otatɨm otsɨɨ: —¿Ɨnaapo heke etĩ̵r wɨr dihipo kɨnãho õr ihyuwohna hn aakɨhɨ õr ahɨr?— 4Pedro nos tatɨm õr uje tokolɨhɨ ɨrni shuu ɨtsorz ɨm: 5—Uje ehn yok de wahacha ese dɨt Jopehna hn yok orar hn tokomo kuchẽrk uje ye latɨk pwele nomo. Tokomo kuchɨt ɨtso sawɨnta dich uje tãra poõrc. Oshiyeru waso uje kwatro ihnɨmichɨhɨ ese uje yok de. 6Uje takachɨm ehet hn nos tokomo loshɨpo kɨnãho uje de ehet. Tokomo ɨlpiyo hn echĩ̵re de ehet hn tokomo chɨpɨrme uje de ehet toy. 7Tukunt õr ahwoso uje tatɨm yok ɨm: “Pedro, alehet tuk kuchɨt hn ew.” 8Titɨm too: “Ɨrhĩche, nos wɨr oposo uje dechɨ ye ompe par uje otew. Yelɨj taw tuu ɨtsorz.” 9Tukunt uu õr ahwospo uje tãra poõrc tatɨm yok ɨm: “Uje Porrosht chɨbɨte shuu om ich ye ompe uje on mɨhnũwo.” 10Ahnũwo kuche tokolni tre bese hn odalii ochish poõrzpo. 11Shiyehe uje tĩ̵r poõrc hn hnakɨrbo õr tre otaachĩ̵hɨ wahacha ese pwert uje yok de. Ochukwi yok. Wɨr uje otãra ese dɨt Cesarea. 12Porrosht Ɨchɨbich tatɨm yok ɨm: “Bo mẽya wɨr hnakɨrbo. Ye owa koswãha õr.” Erze Porrosht aabo uje õr seys õya yokhna uje oyomsaha wɨchɨ dihip kɨnẽhet ɨr ihyuch. 13Ese dihip kɨnẽhet ich nos tatɨm õryok uje umo Porrosht ɨr anjel uje tokolɨhɨ ɨkɨchɨhɨ wahacha ɨr ihyuchhna. Ese anjel tatɨm ɨre ɨm: “Uhu hnakɨrbo odo otĩ̵r wahacha dɨt Jope par uje otõhwa ese hnakɨrbich uje iich otsɨɨ Simón. Ɨr iich yet otsɨɨ Pedro. 14Ɨre tyenɨj shiyokorãha owa par uje owa hn nos wɨr owa eeyso õr pwele aachĩ̵hɨlo wahacha Porrosht ahɨr nehe.” 15Hn Pedro tatɨm erze apóstole ɨm: —Ɨchii tɨkitkẽr ese Cornelio hn erze yewo uje ode ahɨr hn Porrosht Ɨchɨbich masaha õr aho shɨ ɨtso uje masaha eyoklo wapni. 16Uje tokole ɨtsorz hn peyucha uu Ɨrhĩch ahwoso uje tatɨm eyokni ɨm: “Juan lɨshɨ tohɨrm orĩ̵hɨ awɨtkite per daalo arhaabo hn nos wɨr olak tyenɨj Porrosht ɨshɨmɨhɨ olak Dechɨbich shɨ ɨtso uje tohɨrm olak chĩ̵ra Dechɨbich.” 17Heke Porrosht ɨshɨmɨhɨ õr Dechɨbich shuu ɨtso uje ɨshɨmɨhɨ eyokloni uje ye yotiislo eyok Ɨrhĩch Jesucristo petɨkni. Kɨmɨjɨ tiyokõr mɨhnĩ̵khna ich Porrosht ɨtspo.— 18Uje ochunt Pedro ahwoso ich ye onowãhape. Oteeychãha Porrosht otsɨɨ: —Heke Porrosht chɨbɨte par uje nos wɨr dihipo kɨnãho õr pwele ochuuna uje oshiyokõr mɨhnũwo hn oym uu deluu mɨhnũ uje shish oshiyokõr uje ye Porrosht nahmũrpe par uje oshiyokõr uje Porrosht ahwoso tata shuu ɨtsorz. Heke Porrosht perdonar erze dihipo kɨnãho hn ɨshɨm õr ɨkɨrĩt uje yelɨj nɨhna ɨre ɨtso uje ɨshɨm eyok.— 19Eseekite uje oshuu Esteban oshuu tokite ich nos wɨr Porrosht aabo otsehek ɨrehe lekɨtiyo. Yewo ohno otĩ̵r wahacha hnɨmich Fenicia hn yewo ohno otĩ̵r wahacha hnɨmich Chipre hn yewo ohno otĩ̵r wahacha dɨt Antioquía. Shish otsanɨmɨrãha Porrosht ahwoso per shɨ otatɨm uu israel oso. 20Per erze Porrosht aabo uje otãra hnɨmich Chipre hn yewo uje otãra hnɨmich Cirene wɨr ohno otĩ̵r ese dɨt uje iich otsɨɨ Antioquía. Uje otaachĩ̵hɨchɨ ɨchii otsanɨmɨrãha Porrosht ahwoso otatɨm uu dihipo kɨnãho toy uje odechɨ uje otãra griego oso õr hnɨmich. Otatɨm õr uje Ɨrhĩch Jesús tokite par uje ɨshɨ oso õr hnɨtewɨhɨ Porrosht ahɨr. 21Shish uu Ɨrhĩch takashɨm õr hn ich oso okɨhniya ye odotiis õrpe hn otsapur Jesucristo par ɨshɨ õr hnɨtewɨhɨ Porrosht ahɨr hn omasaha par Porrosht aabo. 22Eseekite hn Porrosht aabo yewo uje odechɨ dɨt Jerusalén ochunt uje dihipo kɨnãho omasaha par Porrosht aabo wahacha dɨt Antioquía heke oshuu Bernabé hno tĩ̵r dɨt Antioquía par uje teychɨm õr. 23Uje Bernabé taachĩ̵hɨ wahacha hn umo uje ɨmeheeych uje ye odotiis Porroshtpe heke ɨre ich aylpa. Tatɨm õr par uje shish ye odotiis uu Ɨrhĩch hn yelɨj oduhu daho kɨnãho. 24Ese Bernabé wɨchɨ hnakɨrbich ich ɨr ɨluuta om hn Porrosht Ɨchɨbich de ehet. Ye dotiis uu Porroshtpe heke erze oso uje ochunt ɨr ahwoso uje sanɨmɨrãha Porrosht ahwoso ich okɨhnipa uje omasaha par Ɨrhĩch aabo. 25Eseekite hn Bernabé hno tĩ̵r wahacha dɨt Tarso par uje chukwi Saulo. 26Uje chish ich hnoy seya wahacha dɨt Antioquía. Oshuu ãyt nohmɨra uje otsakahachɨs erze Porrosht aabo õr ahɨr. Õr ɨre shish otakɨsho lawich hõr wɨr Porrosht aabo ich okɨhniya hn oshiyokorãha õr. Hn erze dɨt Antioquía oso ɨchii ochukwẽra wɨr Porrosht aabo õr iiyo otsɨɨ Cristiano. 27Eseekite uje Bernabé hn Saulo odechɨ dɨt Antioquía hn profeta otaãcha. Otãra wahacha dɨt Jerusalén. 28Uu profetɨt nohmet iyehetɨhɨ Porrosht aabo õr ehet. Ese profetɨt iich otsɨɨ Agabo. Wɨchɨ Porrosht Ɨchɨbich shuu chiilehet tatɨm õr ɨm: —Deeych yet nehe ich sewɨt dich ihnɨmichɨhɨ lɨka ĩ̵rmo.— Ese sewɨt ihnɨmich uje ehn wɨchɨ Claudio rey. 29Porrosht aabo uje odechɨ dɨt Antioquía sehe otakashɨm Porrosht aabo yewo uje odechɨ hnɨmich Judea. Kal nohmɨra tyenɨj ɨshɨm uje ɨr pwele par uje otakashɨm õr par uje ye sewɨt nẽyhi õrpe. 30Oshiyokõr uje ɨtsorz hn oshuu Bernabé hn Saulo ohnoy erze hnote par uje oshɨm uu Porrosht aabo õr bahluwo uje õr iiyo otsɨɨ anciano uje ode wahacha ese hnɨmich Judea.

will be added

X\