HECHOS 10

1Eseekite wahacha dɨt Cesarea hnakɨrbich de uje iich otsɨɨ Cornelio. Wɨchɨ kapitan uje tɨbey ohyerptoso õr weeta nohmata waa je iich otsɨɨ Italiano. 2Ɨre ich sahmũr Porrosht hn tola. Nos wɨr ɨr aabo hn ɨr iiso õr ɨtspo nos otola Porrosht toy. Ɨre shish ɨshɨmɨhɨ israel oso õr kuche uje nihyokĩ̵hɨ õr ahɨr, hn ɨre shish orar sapur Porrosht. 3Deeych yetkite uje a la tre yɨlka hn umo kuchẽrk uje ye latɨk pwele nomo shɨ ɨre uje umo. Umo Porrosht ɨr anjel uje masaha pwert ehet hn tatɨm ɨm: —Cornelio.— 4Cornelio teychɨm pishɨ hn ich tola. Tatɨm ɨre ɨm: —Ɨrhĩche, ¿sehe uhu tiyokõr latɨkpo?— Porrosht ɨr anjel tatɨm ɨm: —Porrosht shish chunt uje owa orar apur ɨre hn teychɨm erze kuche uje shish asɨmɨhɨ uu oso uje õr losuhlaabo. 5Uhu hnakɨrbo odo otĩ̵r wahacha dɨt Jope par uje otõhwa ese hnakɨrbich uje iich otsɨɨ Simón. Wɨchɨ iich yet otsɨɨ Pedro. 6Ese hnakɨrbich de wɨchɨ ese hnakɨrbich yet ihyuch uje iich otsɨɨ Simón uje tohɨrmɨhɨ kwer ɨmisht par uje shuu koota. Ese hnakɨrbich ihyuch de onoota bahluta wɨrc. Ese Simón Pedro tyenɨj shiyokorãha owa uje tyenɨj ahakõr.— 7Uje Porrosht ɨr anjel hnooko hn Cornelio tɨbii uu delo uje õr osiyer hn ohyerptosht nohmet ĩya õr uje tola Porrosht toy. 8Nos tatɨm õr uje tokolɨke uje ɨtsorz hn shuu ohno otĩ̵r dɨt Jope. 9Uje ohno deeych nohmɨra hn pehet ĩya hn wɨr ode par uje otaachĩ̵hɨ dɨt Jope. Eseekite hn Pedro dohɨr Simón ihyuch eeych uje õr owich om de par uje sakaha hn orarɨhɨchɨs. 10Ich iyuwo sẽhi sehe taak. Ehn oshiyokõr oposht par uje tyenɨj otaak hn umo kuchẽrk uje ye latɨk pwele nomo shɨ ɨre uje umo. 11Pedro teychɨm poõrc uje sɨtsẽr ɨre hn umo kuchẽrk uje ihnɨmich shɨ ɨtso sawɨnta dich uje oshiyeru waso kwatro. 12Asa sawɨnta nos wɨr de ehet erze loshɨpo uje hnɨte de kwatro hn nos wɨr echĩ̵re hn nos wɨr chɨpɨrme. 13Pedro chunt õr ahwoso uje tata ɨm: —Pedro, alehet tuk kuchɨt hn ew.— 14Pedro tatɨm ɨm: —Ɨrhĩche, ye ompe. Yok yelɨj taw wɨr oposo uje mɨhnũwo uje yelɨj otew.— 15Ich chunt õr ahwospo uje umo ɨm: —Porrosht wɨchɨ uje shuu wɨr om heke ye ompe uje on: “Wɨr mɨhnũwo.”— 16Tatɨm tre bese hn ese uje ɨtso sawɨnta ich hno tĩ̵r poõrzpo shɨchish. 17Pedro shuu deyuwo tɨsɨr par uje chɨraha keshɨ duhu ɨnaapo erze kuche uje umoko uje ye latɨk pwele nomo hn erze hnakɨrbo otaachĩ̵hɨchɨs uje otãra Cornelio ihyuch. Shɨ okẽytker oso par ochɨraha Simón ihyuch. Uje otaachĩ̵hɨ Simón ɨr patikɨt uhurrza 18ich otɨbich jwerte sehe odɨraha kɨmɨjɨ uu Simón chɨhɨchɨ uje iich yet otsɨɨ Pedro. 19Eseekite uje ehn Pedro shuu deyuwo tɨsɨr eyucha uu kuche uje umoko hn uu Porrosht Ɨchɨbich tatɨm ɨm: —Hmeychɨm, hnakɨrbo ode wahacha õr tre. Yesh ochukwi owa. 20Alehet. Ahnɨmich. Bo etĩ̵r õr. Ye atɨla uje mẽya õr pork yok uje tuu otaachĩ̵hɨ lɨka.— 21Pedro ihnɨmichɨhɨchɨs ese õr ihyuch eeych hn hno tĩ̵r wɨr hnakɨrbo. Umo õr ɨm: —Yok uje yesh ekulo yok. ¿Je sehe uhulo tiyokõr latɨkpo?— 22Nos wɨr õr ɨre otatɨm otsɨɨ: —Ese ohyerptoso õr kapitan uje iich otsɨɨ Cornelio shuu oyɨrẽthna. Wɨchɨ hnakɨrbich ich ɨluuta om hn ich tola Porrosht. Uu israel oso shish otata uje ɨre ɨluuta om. Deeych yethna hn Porrosht ɨr anjel tokolɨhɨ Cornelio ɨkɨch hn tatɨm ɨre par uje shuu etĩ̵r wahacha ɨr ihyuch par uje ekitkẽr ɨre.— 23Hn Pedro shuu Cornelio ɨbiyo omasaha pwert ehet par uje omuhuchɨs ese dɨhlich. Uje dechol hn Pedro hno ĩya õr. Porrosht aabo nohmɨramo ohno õya ɨr toy. Wɨr otãra dɨt Jope. 24Deeych yet ich otaachĩ̵hɨ ese dɨt Cesarea. Eseekite hn Cornelio shɨ iyem orĩ̵hɨ dahuch ehet. Nos shuu wɨr deyso otakɨsho lawichɨhɨchɨs hn erze ɨr ihyẽro yewo uje ich otsahmũr ɨre. Nos ode ese ɨr ihyuch ehet oyem Pedro. 25Uje Pedro taachĩ̵hɨ ese Cornelio ihyuch hn ese Cornelio dalehe arhĩch hn icha dete hnɨmoho ɨkɨch par uje teeychãha Pedro. 26Pedro chishew hmata shuu iyehet. Tatɨm ɨm: —Alehet pork yok hnakɨrap. Shɨ yok ɨtso owa.— 27Okeytkẽrye nehech omasaha pwert ehet. Pedro umo uje ich oso okɨhniya uje otakɨsho lawichɨhɨ pwert ehet. 28Tatɨm õr ɨm: —Nos wɨr olak ich erahalpa uu õryok ɨluu chɨbɨte uje ye ompe par uje oyakɨsho õryok owichɨhɨ dihipo kɨnãho õr ahɨr hnii par oyekɨrɨhɨ õr. Per Porrosht shiyokorãha yok uje ich ye ompe uje tiita tuu wɨr oso õr mɨhnũwo uje ye õr pɨhnapsope 29heke uje ebiilo yokhna ich tɨkɨrẽt shɨchish hn ich ye tɨkɨtɨloho latɨk. Sehe tɨkɨraha keshɨ ɨnaapo heke ebiilo yokhna par uje takaachĩ̵hɨ lɨka ele olak ahɨr.— 30Cornelio tatɨm ɨm: —Ich terɨhɨ daalo kwatro hn shiyehe wate orta a la tre yɨlkahna uje tokoym uje takaak par uje tɨkeeychãha Porroshtɨhɨ pihyuch hn hnakɨrbich tokolɨhɨ pɨkɨch. Ich ɨr ɨshuwo hũre. 31Tatɨm yok ɨm: “Cornelio, Porrosht chunt uje shish owa orar apur ɨre. Chɨraha uje shish asɨmɨhɨ kuche uu oso uje ich õr losuhlaabo. 32Heke tyenɨj uhu hnakɨrbo odo otĩ̵r wahacha ese dɨt Jope par uje otõhwa ese hnakɨrbich uje iich otsɨɨ Simón. Ɨr iich yet otsɨɨ Pedro. Wɨchɨ tekɨrɨhɨ ese hnakɨrbich yet ihyuch uje ɨr iich otsɨɨ Simón. Wɨchɨ chishew obiyo tohɨrmɨhɨ kwer ɨmisht par uje shuu koota. Ese hnakɨrbich ɨr ihyuch de onoota bahluta wɨrc.”— 33Hn Cornelio ɨm: —Heke tuu ohno shɨchish par uje otõhwa owahna. Ahakõr om uje erẽtɨke. Ele aahle õryok de lɨka par oyiyokõr uje Porrosht sahmũr uje oyẽr uu ahwoso uje Ɨrhĩch ɨshɨm owa par uje atɨm õryok.— 34Eseekite ɨchii Pedro chiilehet tatɨm õr ɨm: —Ele aahle ich tɨkɨraha uje ich ũrpa uje Porrosht ye duhu oso õr kɨnãho kɨnãhope. Nos shuu õr ɨtsye. 35Nos wɨr oso uje ode ĩ̵rmo lekɨtiyo uje otola Porrosht hn uje shish oshiyokõr uje om hn Porrosht shuu omasaha par ɨr aabo. 36Porrosht shuu otatɨm uu israel oso par uje ochɨraha ɨr ahwoso uje ich om uje shuu oso õr aho kɨɨs pork Jesucristo ɨshɨ õr hnɨtewɨhɨ Porrosht ahɨr. Jesucristo wɨchɨ uu nos oso õr yɨnsɨrc pisht. 37Nos wɨr olak ich erahalo uje tokolɨhɨ wahachni ese israel oso õr hnɨmich. Uje Juan lɨshɨ iyehe uje tohɨrm oso ɨchii Jesús hno tĩ̵r lekɨtiyoho wahacha Galilea hn tĩ̵r lekɨtiyoho wahacha Judea. 38Jesús neẽhe Nazatretni. Porrosht chiihla ɨre hn ɨshɨm Dechɨbich hn ɨshɨm dakɨrbo toy, heke Jesús shish tĩ̵r lekɨtiyo hn shiyokõr kuche uje om. Nos chukuta oso uje demonyo de õr aho. Porrosht shish takashɨm ɨre. 39Õryok nos oyumo uje ɨtsorzni heke oyɨtĩ̵r lekɨtiyo oyitɨm oso uje Jesús shiyokorĩ̵hɨ wahacha ese israel oso õr hnɨmichni hn wahacha ese dɨt dich ehet uje iich otsɨɨ Jerusalén. Wɨr ochowɨsh ochɨbɨte krus eeych par uje oshuu oshuu toni 40per uje terɨhɨ daalo trekite ich Porrosht shuu ɨkpo. Porrosht shuu tokolɨhɨ õryok ɨkɨchni par uje oyeychɨm uje ɨkpo.— 41Hn Pedro tatɨm õr ɨm: —Wɨchɨ ye nos tokolɨhɨ oso õr ɨkɨch petɨkni. Shɨ tokolɨhɨ õryok ɨkɨch pork õryok uje Porrosht chiihla par uje tyenɨj oyiita uje oyumo. Uje ɨkponi hn oyaakɨhɨ ahɨr hn oyooho ahɨr. 42Ɨre uje shuu oyɨtĩ̵r uu israel oso par uje oyanɨmɨrãha uu Porrosht ahwoso. Oyitɨm õr uje Porrosht wɨchɨ uje chɨbɨte Jesús par jwe par shuu nos sepyẽr wɨr topo hn nos wɨr uje yesh õr ɨka nehe. 43Nos wɨr profeta poruwo wɨshɨ uje ehn odekite otatɨm oso uu Cristo. Otatɨm oso otsɨɨ: “Nos wɨr oso kɨmɨjɨ ye odotiis Cristope ich tyenɨj Porrosht perdonar õr erze kuche mɨhnũwo uje shish oshiyokõr uje ye Porrosht nahmũrpe. Shɨ tyenɨj otsapur Cristo par uje ɨshɨ õr hnɨtewɨhɨ Porrosht ahɨr.”— 44Eseekite uje ehn Pedro chiilehet keytkẽr õr hn Porrosht Ɨchɨbich ihnɨmichɨhɨ wɨr õr ahɨr erze oso uje otẽr Pedro. 45Nos wɨr Porrosht aabo uje õya Pedro uje tĩ̵r Cornelio ihyuch wɨr israel oso toy. Wɨr ochishlabe uje Porrosht ɨshɨm Dechɨbich uu dihipo kɨnãho shuu masaha õr aho ɨtso uje masaha israel osoni. 46Ɨmeheeych uje masaha õr aho pork ochunt uje Porrosht Ɨchɨbich shuu nos otseẽt õr ahwoso kɨnãho hn oteeychã Porrosht. Heke Pedro tatɨm õr ɨm: 47—¿Je yeẽk chɨhɨ uje ye nahmũrpe par uje oyohɨrm nãhu oso? Ɨmeheeych uje Porrosht Ɨchɨbich masaha õr aho ɨtso uje masaha eyokloni.— 48Heke Pedro shuu otohɨrm õr ochĩ̵ra Jesucristo ɨr iich. Depwe ich nos wɨr õr ɨre otsapur Pedro par uje sakaha õr ahɨr shuu daalo arhaabo.

will be added

X\