3 JUAN 1

1Yok Juan. Yok anciano uje tɨkɨbey Porrosht aabo. Gayo, tichew ana hutɨta tokosɨm owa. Yok ich tahmũr pishɨ owa. 2Pɨshɨbiche, shish yok orar tapur Porrosht par owa. Ɨtso uje ahmũr Porrosht ich sehe tuu nos ebiyo tokole om hn sehe tuu owa owich om. 3Uje Porrosht aabo yewo otaachĩ̵hɨ lɨka hn otatɨm yok uje ahakõr uje ich ompa ich shuu yok aylpa. Ich ũru uje ahakõr uje Porrosht ahwoso tata. 4Owa shɨ owa ɨtso pijɨt pork tuu amsahani par Porrosht aap. Uje tukunt uje pijo oshiyokõr uje Porrosht ahwoso tata ich shuu yok aylpa. Nĩhyok yeẽk pwele shuu yok ma ayla je erze. 5Pɨshɨbiche, ich ɨhĩ̵rtpa uje akashɨm Porrosht aabo yewo, hn ich ma ɨhĩ̵rtpa uje akashɨm erze Porrosht aabo yewo uje otãra dukul dich uje ye eraha õrpe. 6Wɨr õr eyucha owa iglesya ahoni. Otatɨm Porrosht aabo uje ahmũr õr hn akashɨm õr. Ahakõr uje ich om uje akashɨm õr uje otĩ̵r lekɨtiyo. Ich om uje yakashɨm erze uje oshiyokõr Porrosht ɨbiyo oshuu ɨtsorz. 7Wɨr otĩ̵r lekɨtiyo par uje oshiyokõr Porrosht ɨbiyo. Shɨ otsahmũr uje Porrosht aabo oshɨm õr uje õr nesita. Ye onahmũrpe uje yewo oshɨm õr uje õr nesita. 8Eyok tyenɨj nos yakashɨmlo Porrosht aabo uje õr ɨbiyo ɨtso wɨr, heke uje yakashɨmlo õr yuhu ɨtsorz ich wɨr eyok ihyẽro par yanɨmɨrãha Porrosht ahwoso. 9Tichew hutɨta par tokosɨm Porrosht aabo uje ode iglesya ehet per Diótrefes sɨtak. Shɨ sahmũr uje sehe duhu ɨre dichɨhɨ wahacha heke wɨchɨ ye tola yokpe. 10Kɨmɨjɨ uje takaachĩ̵hɨ wahacha nehe ich tɨbɨte orhõta erze uje ɨre shiyokõr. Wɨchɨ shish chish majamichɨhɨ yok. Ye shɨ erzepe uje shiyokõr. Ye nahmũr uje Porrosht aabo yewo otĩ̵r ɨrpe, hn sontew Porrosht aabo uje õr ayla uje erze yewo otekɨrɨhɨ õr. Erze uje sehe otakashɨm õr ich wɨchɨ chiyuhu orĩ̵hɨ iglesya ehet. 11Pɨshɨbiche, ye eẽt erze uje oshiyokõr uje ich mɨhnũwo. Shɨ eẽt erze uje oshiyokõr uje ich om. Erze uje oshiyokõr uje ich om oshuu ɨmeheeych uje õr ɨre Porrosht aabo per erze uje oshiyokõr uje ich mɨhnũwo wɨr ye odɨraha Porroshtpe. 12Nos otata uje Demetrio ich ɨr ɨluu om. Porrosht ahwoso chɨbɨte orhõta uje wɨchɨ ɨr ɨluu ich om, hn yok tɨkɨraha uje ɨr ɨluu ich om toy, hn eraha uje yok shish tiita uje ich ũru. 13Titɨm owa. Kuche kɨhniya de uje sehe tichew titɨm owa per ye tichew tɨbɨte hutɨtape. 14Sehe takaha tɨtĩ̵r owa shɨchish par yɨkitkẽrye. 15Sehe tuu Porrosht shish duhu ehet kɨɨs. Uu owa ahĩ̵re oshɨm owa saludo, hn nos tokosɨm uu pihyẽre õr saludo toy.

will be added

X\