2 TIMOTEO 4

1Porrosht hn Jesucristo sehe oduhu titɨm owa uje nos wɨr erze uje yesh õr ɨka hn erze uje otoni tyenɨj otĩ̵r Jesús ɨle ɨkɨch nehe. Wɨchɨ jwe uje tyenɨj teychɨm erze mɨhnũwo uje oshiyokõrni. Titɨm owa pork Cristo tyenɨj cheeshpo nehe hn masaha par rey. Sehe tuu 2shish anɨmɨrãha Porrosht ahwoso. Emɨt owa par uje anɨmɨrãha Porrosht ahwoso uje owa tyempɨt de, hn uje ye owa tyemptɨkɨsh. Enshii erze uje ochimehi kuche, hn ahɨrm erze uje oshiyokõr uje mɨhnũwo par uje oshiyokõr uje ich om. Uhu oduurapo par uje oshiyokõr uje ich om. Tyenɨj eentha pishɨ õr uje ahakorãha õr 3pork uje terɨhɨ ɨshɨrĩt nehe ich ye oso onahmũrpe uje otẽr erze ahwoso uje ich ũru. Erze oso tyenɨj ochiihla hnakɨrbo ich okɨhniya par uje oshuu oshiyokorãha õr ahwoso uje otsahmũr otẽr. 4Porrosht ahwoso ich ũru per ye onahmũrpe par uje otẽr. Shɨ otsahmũr otẽr erze monɨhne. 5Per owa shish tyenɨj abeyshɨp owa. Tyenɨj owa ewenta erze kuche mɨhnũwo uje tĩ̵r owa, hn tyenɨj shish ahakorãha oso par uje uhu omasaha par Porrosht aabo. Nos ahakõr erze obiyo uje Porrosht ɨshɨm owa. 6Yok shɨ yok ɨtso erze kuche uje oshɨm Porrosht par uje oteeychãha ɨre, pork yej terɨhɨ ese pɨshɨrĩt uje par oshuu yok. 7Ich tɨmɨtɨke erze obiyo uje Porrosht ɨshɨm yok par uje tiyokõr heke shɨ ɨtso uje oteye hn terz. Shɨ yok ɨtspo ese uje uushɨ hn serz. Yelɨj tokotiis Jesucristo 8heke yok premit yesh dechɨ poõrc. Wɨchɨ yok premit uje yok Ɨrhĩch tyenɨj shuu pɨluuta ompa. Yok Ɨrhĩch ich jwe uje yelɨj niyokõr uje mĩ̵hnɨk. Uje terɨhɨ ese deeych nehe ich ɨshɨm yok uje terz, hn ye duhu yok sohmɨrape. Nos ɨshɨm wɨr toy uje otsahmũr uje ɨre tɨrẽt. 9Sehe tuu erẽt shɨchish etĩ̵r yok. 10Demas ich sahmũr pishɨ ĩ̵rmo ɨshujãro heke iim yokni. Hno tĩ̵r wahacha dɨt Tesalónica. Shɨ Crescente hno tĩ̵r wahacha hnɨmich Galacia, hn Tito hno tĩ̵r wahacha hnɨmich Dalmacia. 11Shɨ Lucas nohmɨra sakaha pahɨr. Timoteo, sehe tuu bo bey Marcos par tɨrẽt nõya owa tĩ̵r yok pork wɨchɨ shish takashɨm yok pɨbiyo. 12Tuu Tíquico hno tĩ̵r dɨt Efesoni. 13Timoteo, uje erẽt nehe hn õhwa asa piyẽrpta waa je tĩ̵ra hmemɨt uje tokoymɨhɨ wahacha dɨt Troasni. De ese hnakɨrbich ihyuch uje iich otsɨɨ Carpo. Õhwa yok hute toy, hn ye moym erze hute uje oshiyokõr ochĩ̵ra obejɨ yũhɨr. 14Alejandro ɨr ɨbiyo ich shɨ shiyokõr fyero, wɨchɨ shiyokõr kuche mɨhnuwõho yokni ich kɨhniya. Eyok Ɨrhĩch tyenɨj shuu ɨshɨ dabahat erze mɨhnũwo uje shiyokorĩ̵hɨ yokni. 15Abeyshɨp owa par uje ye wɨchɨ niyokõr mɨhnɨkĩ̵hɨ owa toy pork wɨchɨ sɨtakpa erze Porrosht ahwoso uje yiyokorãha õr. 16Uje otseya yok jwe ɨkɨch wapni ich nĩhyok ye latɨk takashɨm yok. Nos oym yok. Sehe tuu Porrosht ye nowãha õrpe hn ye depyẽr õr. 17Eyok Ɨrhĩch takashɨm yok hn ɨshɨm yok pukurbo par uje yok pwele nos tanɨmɨrãha Porrosht ahwoso hn tuu nos dihipo ochɨraha. Eyok Ɨrhĩch takashɨm yok heke ye oduhu yok oduhu tɨkɨtɨ shɨ ɨtso uje chiyuhu yokɨhɨ ɨlpiyot ahwo. 18Eyok Ɨrhĩch tyenɨj takashɨm yok par uje yok ewenta erze mɨhnũwo uje oso oshiyokorĩ̵hɨ yok par uje takaachĩ̵hɨ wahacha ɨr ahɨr poõrc nehe. Sehe tuu Porrosht dich. Tahmũr uje ɨtsorz. 19Tokosɨm saludo Prisca hn Aquila hn nos wɨr Onesíforo ɨr iiso. 20Erasto sakaha ese dɨt Corinto, hn tokoymɨhɨ Trófimo wahacha dɨt Mileto pork wɨchɨ permoni. 21Timoteo, emɨt owa hn erẽt shɨchish etĩ̵r yok pork yej terɨhɨ hmamo ɨshɨrĩt. Eubulo ɨshɨm owa saludo. Pudente hn Lino hn Claudia oshɨm owa saludo toy, hn nos wɨr Porrosht aabo uje ode lɨka. 22Sehe tuu eyok Ɨrhĩch Jesucristo shish nõya owa, hn sehe tuu Porrosht shish nos dosɨr olak.

will be added

X\