2 TIMOTEO 3

1Sehe tuu erahapa uje ich yej terɨhɨ uje ĩ̵rmo sɨhna ɨre hn ich yarhakpa par oso. 2Oso ode ich okɨhniya nehe uje shɨ otsahmũr ɨre. Ode uje opota hnote hn ode uje ich onarim pishɨ ɨre. Ode uje otata uje ma ochɨraha kuche je yewo hn ode uje ochinehnɨm Porrosht hn ochinehnɨm nos wɨr oso toy. Ode uje ye otola deyo hn datɨpe hn ode uje yelɨj onɨna uje oshɨm õr kuche. Ode uje ye otola Porroshtpe. 3Ode uje ye onahmũr nerẽtpe hn daabo hn tɨmcher õr ɨtspo, ye onahmũr dabiyope hn ye onahmũr daabope. Ode uje yelɨj õr perdonar oso yewo. Ode uje otatɨm dekushiĩ oso par uje oshuu oso otsɨtak yewo. Ode uje ye õr pwelpe uje otɨbey ɨre heke shish oshiyokõr uje mɨhnũwo. Ode uje õr ehnito. Ode uje ye onahmũrpe uje ich om. 4Ode uje otatɨm oso õr ɨmãho par uje oshuu ochishew õr, hn ode uje oshiyokõr kuche shɨchish hn yelɨj õr pyensa kɨmɨjɨ om o kɨmɨjɨ mĩ̵hnɨk. Ode uje sehe oduhu deyuwo ma deyo je erze yewo, hn ode uje ma otsahmũr uje olota je uje oteeychãha Porrosht. 5Wɨr oshuu oso oteychɨm ɨre par uje oshuu õr pyensa uje wɨr Porrosht aabo per ye oduhu Porrosht Ɨchɨbich nuhrũ dahope. Aham erze oso uje oshiyokõr oshuu ɨtsorz. 6Hnakɨrbo ode erze oso õr ehet uje otĩ̵r erze tɨmcher õr ihyuwo hn otsehnyẽr õr. Erze tɨmcher ye oduhu deyuwo tɨsĩ̵rpe. Wɨr shish oshiyokõr uje mĩ̵hnɨk. Shish otẽr erze uje otsehnyẽr õr. 7Shish oso oshiyokorãha erze tɨmcher per yelɨj odɨraha uje ich ũru. 8Erze hnakɨrbo uje otsehnyẽr erze tɨmcher wɨr shɨ õr ɨtso ese Janes hn Jambres uje sehe onontew Moiseskite. Sehe onontew erze ahwoso uje ich ũru. Shɨ oshuu deyuwo tɨsĩ̵r erze kuche uje ich mɨhnũwo. Otata uje õr Porrosht aabo per otsotiis Jesús. 9Shɨ oshiyokorãha oso pɨkaap hn nos oso okemɨhɨ õr shɨ ɨtso erze uje õr osiyer sehe onontew Moiseskite. 10Owa ye owa ɨlo õrpe. Eraha erze ahwoso uje tiyokorãha oso, hn eraha yok pɨluu, hn eraha erze uje sehe tiyokõr. Eraha uje ye tokotiis Jesuspe, hn erahapo uje tɨkɨnta pishɨ oso. Eraha uje tahmũr oso, hn nos eraha uje yok ewenta wɨr kuche mɨhnũwo uje tĩ̵r yok. 11Eraha erze kuche mɨhnũwo uje oshiyokorĩ̵hɨ yok, hn eraha erze yok dosĩ̵ryo uje chish yokɨhɨ dehet paho. Eraha toy nos wɨr erze mɨhnũwo uje masaha yokɨhɨ wahacha dɨt Antioquía hn Iconio hn wahacha dɨt Listra. Eraha erze mɨhnũwo uje yok ewenta uje oso oshiyokorĩ̵hɨ yok, per eyok Ɨrhĩch takashɨm yok heke ye wɨr oduhu yokpe oduhu tɨkɨtɨ. 12Ich ũru uje nos wɨr erze uje sehe oniyokõr uje Jesucristo sahmũr ich shish oso oshiyokõr mɨhnuwõho õr. 13Per erze hnakɨrbo uje õr ɨluu mɨhnũ hn erze yewo uje otsehnyẽr oso shish oshiyokõr uje ma mɨhnũwo hn shish ma otsehnyẽr oso hn yewo odepo uje otsehnyẽr wɨr. 14Per owa ye owa ɨlo õr heke shish ahakõr erze uje oshiyokorãha owani pork eraha uje ich ũru hn eraha erze uje oshiyokorãha owa. 15Uje ehn owa pɨkɨhninaapni ɨchii eraha nehech ele ahle yesh eraha erze Porrosht ahwoso. Porrosht ahwoso shuu eraha uje ye otiis eyok Ɨrhĩch Jesucristope hn shuu amsaha par owa Porrosht aap. 16Nos wɨr Porrosht ahwoso tãra ɨre pork shuu oso ochichew lawhoso. Porrosht ahwoso ich om par uje oshiyokorãha õr, hn sahɨrm õr uje oshiyokõr uje mĩ̵hnɨk. Ich om par nɨshii erze uje ochimehi kuche, hn ich om par oshiyokorãha õr oshuu oshiyokõr uje Porrosht sahmũr. 17Uje õr ler Porrosht ahwoso hn uje otẽr ich nɨshii õr eyuwo erze uje otsahmũr ɨre par oshiyokõr nos wɨr obiyo uje ich ɨhĩ̵rtso.

will be added

X\