2 TIMOTEO 2

1Timoteo, owa shɨ owa ɨtso uje pijo. Tyenɨj eyuhu owa ẽra erze akɨrbo uje Jesucristo ɨshɨm owa. 2Tyenɨj owa eyucha pahwoso uje ẽntni uje titɨm oso okɨhniya. Wɨr ochɨraha uje erze ahwoso ich ũru. Owa tyenɨj ahakorãha erze ahwoso atɨm hnakɨrbo uje ye olotiis Porroshtpe par uje wɨr oshiyokorãha oso yewo toy. 3Titɨm owa par uje owa ewenta erze kuche mɨhnũwo uje tĩ̵r owa pork owa Cristo ɨbɨk. Tyenɨj uhu owa ɨtso uje ohyerptosht shiyokõr uje ɨr ɨluu om. 4Ese uje masaha par ohyerptosht ye ɨchii niyokõr obiyope duhu kɨnãho. Shɨ tyenɨj shiyokõr uje ɨr bahlut tatɨm ɨre pork sehe duhu ɨr bahlut ehet kɨɨsɨhɨ ɨre. 5Shɨ ɨtspo ese uje loter pɨlota. Kɨmɨjɨ ye niyokõr uje refle tatɨm ɨre ich ye derzpe. Ye dosɨm ɨre asa koptape. 6Hn shɨ ɨtso ese uje chish obiyoho ɨr shakɨrrza ehet. Ich chiyuhu ɨre heke wɨchɨ webich osht uje tyenɨj hnoy erze ɨr jõro ee uje chekushu. 7Tyenɨj uhu eyuwo tɨsĩ̵r ahnũwo uje titɨm owaka, hn eyok Ɨrhĩch nos shuu eraha keshɨ duhu ɨnaapo ahnũwo pahwoso. 8Owa eyucha Jesucristo. Wɨchɨ ɨkponi, hn ɨr porokkite wɨchɨ uu rey David lɨshɨ. Ahnũwo ɨr ahwoso uje tanɨmɨrãha titɨm oso uje ɨshɨ õr hnɨtewɨhɨ Porrosht ahɨrkite. 9heke wɨr oshiyeru yok. Oshiyeru kenena pɨhmiko oshuu yok ɨtso uje tiyokõr uje mĩ̵hnɨk, per ye õr pwele onontew erze Porrosht ahwospe. Shish ochuntɨhɨ lekɨtiyo, 10heke yok ewenta erze mɨhnũwo uje tĩ̵r yok par uje erze oso uje Porrosht chiihla õr pwele omasaha par Porrosht aabo toy nehe uje ye olotiis Jesucristope, hn õr ɨkɨrĩt de uje ich ɨhĩ̵rtpa uje yelɨj nɨhna ɨre. 11Titɨm owa ahnũwo ahwoso uje ich ũru. Cristo tooho eyok. Kɨmɨjɨ ye yotiis ɨrpe ich shɨ ɨtso uje yukwiĩya ɨre hn yutɨ toy. Hn Cristo ɨkpo, heke eyok tyenɨj eyok ɨkpo hn yebuhu ɨre ahɨr nehe. 12Uje kuche mɨhnũwo tĩ̵r eyok ich tyenɨj shish eyok ewenta. Kɨmɨjɨ eyok ewenta ɨtsorz hn tyenɨj eyok ɨr wɨmshɨro hn yukwiĩya ɨre. Uje yiita uje yukwim ɨre ich ɨre tyenɨj iim eyok toy. 13Kɨmɨjɨ yotiis, per ɨre shish ye sehi lahwospe pork ɨre ye pwelpe sata uje ɨre ye Cristope. 14Tyenɨj shish uhu Porrosht aabo õr eyucha ahnũwo pahwoso uje titɨm owaka. Porrosht sehe duhu atɨm õr par uje oym oshiyokosyeehe erze õr ahwoso uje ye jukur. Wɨr shɨ chimehĩ oso õr eyuwo uje otẽr. 15Uhu owa duurapo par ahakõr Porrosht ɨbiyo ich uhu ɨhĩ̵rts pisho. Heke uje terɨhɨ ese deeych uje aachĩ̵hɨ Porrosht ɨle ɨkɨch nehe ich sahmũr pork uje anɨmɨrãha Porrosht ahwoso ich ye eymehiĩpe. Ye ompe uje ahakõr uhu kɨnaha, heke ich uhurc ich apook. 16Aham erze uje otakɨsho lawich hn shɨ otata lahwoso mɨhnũwo. Erze uje ye onaham õr shɨ õya õr heke oshuu õr ɨluu mɨhnũ nehech õr ɨluu mɨhnũpa ɨtso õr. 17Erze õr ahwoso uje oshiyokorãha õr wɨr ahwoso mɨhnũwo uje chũr lekɨtiyo shɨ ɨtso permo oshye. Wɨr erze uje tĩ̵r Himeneo hn Fileto 18hn shuu õr eyuwo mɨhnũwo heke oym erze Porrosht ahwoso uje ich ũru. Otata uje topo õr ɨkponi hn oshuu erze Porrosht aabo nohmɨramo otsotiis Porrosht. 19Per Porrosht chɨbɨte lahwoso ich tyenɨj yakaha. Ɨr ahwoso uje shuu eyok aho kɨɨs tata ɨm: —Eyok Ɨrhĩch chɨraha laabo.— Hn tata toy ɨm: —Nos wɨr erze uje otata otsɨɨ: “Cristo wɨchɨ uu õryok Ɨrhĩch,” wɨr uje tyenɨj oym erze mɨhnũwo uje oshiyokõr.— 20Tɨteẽta kuchɨt titɨm owa. Pwert dich ehet kuche de uje oro, hn kuche de uje plata, hn kuche de uje tabla, hn kuche de uje katuu. Erze uje ich ɨhĩ̵rtso wɨr oro hn plata. Okahnĩ̵r par õr ahmiyo. Erze uje ich tabla hn katuu wɨr uje ochĩ̵ra obiyo kal deeych. 21Uje yeẽk iim shiyokõr uje mɨhnũwo par uje ɨre ɨtso erze oro hn plata ich chɨmɨt ɨre par uje shiyokõr Porrosht ɨbiyo. Wɨchɨ shuu deluuta om. Heke ɨr yɨnsɨrc sahmũr pork chɨmɨt ɨre par nos shiyokõr wɨr obiyo uje ich ɨhĩ̵rtso. 22Aham erze mɨhnũwo uje hnakɨrbite hn apɨbite shish oshiyokõr. Shish emɨt owa par uje ahakõr uje ich om, hn emɨt owa par uje ma ye otiis eyok Ɨrhĩch ɨr ahwoso, hn ahmũr oso yewo, hn uhu ehet kɨɨs. Tyenɨj meya erze Porrosht aabo yewo uje õr ɨluu om hn shish õr orar otsapur eyok Ɨrhĩch. 23Aham erze uje oshiyokosyeehe erze kuche uje ye jukur pork eraha uje wɨr shɨ oshuu oso ochɨnkẽrk delo. 24Ich ye ompe uje eyok Ɨrhĩch ɨr ɨbich satsɨrãha lahwoso. Shɨ tyenɨj nos keytkẽr oso hn hneta lahwoso. Tyenɨj chɨraha shiyokorãha oso Porrosht ahwoso, hn tyenɨj shish hneta oso. 25Erze uje ye onahmũr eyok Ɨrhĩch ɨr ɨbich ɨr ahwoso ich tyenɨj saraãshi uje shiyokorãha õr, hn shɨ iyem uje Porrosht shuu õr eyuwo tɨsĩ̵r nehech ochɨraha uje erze ahwoso ich ũru. 26Ich uhurc hn ochɨraha uje ich ũru, hn ochɨraha uje Satanás sehnyẽr õr. Wɨr shɨ õr ɨtso uje otokolɨhɨ Satanás trampta ehet. Uje ehn wɨr ode asa trampta ehet ich oshiyokõr uje Satanás sahmũr.

will be added

X\