2 TESALONICENSES 3

1Pɨshɨbo watsaklo, ich uhurc uje oyichew oyɨbɨte ana hutɨta par olak. Sehe oyuhu olak orar apurlo Porrosht par õryok par uje erze eyok Ɨrhĩch ɨr ahwoso nũr lekɨtiyo shɨchish hn ye olotiis shɨ ɨtso olak uje ahmũrloni. 2Apurlo ɨre par uje ye wɨr hnakɨrbo uje õr ɨluu mɨhnũ odishew õryok, pork shish ode uje ye onahmũr Porrosht ahwospe. 3Eyok Ɨrhĩch ɨr ahwoso shish yakaha, heke shuu olak duurapo hn tɨbey olak par uje ye Satanás niyokõr mɨhnɨkĩ̵hɨ olak. 4Ye oyotiis uje shish Porrosht takashɨm olak par uje shish ahakõrlo erze uje oyitɨm olak. 5Sehe oyuhu eyoklo Ɨrhĩch Jesucristo duhu erahalo ma uje Porrosht sahmũr olak hn duhu olak ewenta erze mɨhnũwo shɨ ɨtso uje Cristo ewenta erze uje oso oshiyokorĩ̵hɨ ɨrni. 6Pɨshɨbo watsaklo, eyoklo Ɨrhĩch Jesucristo sehe duhu oyitɨm olak par uje moymlo ese olak leshɨbich uje ich tok hn ye niyokõrpe uje oyitɨm olak. Erze Porrosht ahwoso wɨr uje oyitɨm olakni. 7Uje ehn õryok de olak ahɨrni erahalo uje shish oyishew obiyo par oyiya õryok poso par uje eychɨmlo uje oyiyokõr hn ahakõrlo uhulo ɨtso õryok. 8Shish oyiya oposo par uje oyahu. Deeych hn dɨhlak õryok shish oyishew obiyo par uje ye oyuhu asɨmlo õryok kuche. 9Kɨrẽhe oyahmũr ich oyapur olak par uje akashɨmlo õryok per ye oyapur olakpe. Õryok shish oyishew obiyo par uje eychɨmlo hn ahakõrlo uhulo ɨtso õryok. 10Uje ehn õryok dechɨ olak ahɨrni hn oyitɨm olak oyuhu ɨtsorz: —Kɨmɨjɨ yeẽk chɨhɨ uje ye nahmũr dishew obiyope ich ye ompe par uje taak.— 11Oyitɨm olak oyuhu ɨtsorz pork oyunt uje olak yewo ye onahmũr odishew obiyope. Shɨ olale leshɨbo õr ɨbiyo ɨkiyo. 12Eyoklo Ɨrhĩch Jesucristo shuu oyitɨm erze oso uje ye onahmũr odishew obiyope par uje odishew obiyo hn oduhu daho kɨɨs. Uje odishew obiyo oduhu ɨlorz hn õr pwele otiya dabɨso uje otew. 13Pɨshɨbo watsaklo, ye ermtsɨrlo uje akashɨmlo yewo pork om uje ahakõrlo uhulo ɨtsorz. 14Uje yeẽk chɨhɨ olak ehet uje ye nahmũr niyokõr uje ana hutɨta tata uhulo nos odɨraha hn ye mẽylo par uje uhulo pook. 15Ye eylo olak ɨmãha. Shɨ tyenɨj akɨtlo ɨre pork wɨchɨ Porrosht aap toy. 16Eyoklo Ɨrhĩch wɨchɨ uje shuu oso õr aho kɨɨs. Sehe tuu ɨre shish duhu olak aho kɨɨs toy. Uje kuche mɨhnũwo tĩ̵r olak sehe ɨre shish duhu olak aho kɨɨs. Sehe oyuhu eyok Ɨrhĩch shish nõya olak. 17Yok Pablo. Tichew tɨbɨte ana hutɨta uhurc par uje erahalo uje asa hutɨta tãra yok. Erze yok piche uje tɨbɨte asa hutɨta shuu ɨmeheeych uje yok. Shish nos tɨbɨte hute uhurc tuu ɨtsorz. Tokosɨm olak saludo. 18Sehe tuu eyok Ɨrhĩch Jesucristo shish nos takashɨm olak.

will be added

X\