2 TESALONICENSES 2

1Pɨshɨbo watsaklo, ele ahle sehe oyitɨm olak erze uje tyenɨj tokole wap nehe uje eyok Ɨrhĩch Jesucristo cheeshpo hn shuu yakɨshlo eyoklo owichɨhɨ lahɨr. Titɨm olak par uje erahalo 2uje yeẽk taãcha hn tata uje Cristo taãchhna ich ye as olak ɨbe hn ye uhu olak eyuwo kɨnãho. Kɨmɨjɨ yeẽk tata uje Porrosht Ɨchɨbich tatɨm ɨre uje eyok Ɨrhĩch taãchhna, o kɨmɨjɨ shɨ otatɨm olak o kɨmɨjɨ otõhwa hutɨta kɨnaha uje ochichew oshuu tãra yok uje otata otsɨɨ: —Uu Ɨrhĩch taãchhna— 3per ye uhulo onehnyẽr olak. Uje ehn yahpaa Cristo taãcha ich oso okɨhniya tyenɨj oym Porrosht nehe, hn hnakɨrbich nohmet uje ye nahmũr Porrosht ɨr ley tyenɨj de nehe. Wɨchɨ uje Porrosht chɨbɨte lahwoso par uje deeych yet nehe hn chɨbɨte urhuta bahluta ehet. 4Wɨchɨ hnakɨrbich sehe nontew erze uje oteeychãha Porrosht hn sehe nontew erze uje oteeychãha kojano po ochii ɨr porroshtɨhɨ. Sehe duhu ɨre ma dich je Porrosht hn sehe duhu ɨre ma dich je nos wɨr yewo uje oso oteeychãha ochii ɨr porroshtɨhɨ. Tyenɨj masaha erze israel oso õr templo ehet nehe hn sakaha hn tatɨm oso ɨm: —Yok uu Porrosht.— 5Uje ehn yok de olak ahɨrni hn titɨm olak ese hnakɨrbich. ¿Je ekeylo? 6Olak yesh erahalo ese uje sontew ɨre par uje ye tokolpe. Ye tokolpe nehech terɨhɨ ese ɨshɨrĩt nehe par uje ɨre tokole. 7Erze obiyo uje mɨhnũwo yesh oshiyokõr per shɨ otsakɨs ɨre. Ich ye ɨmeheeychpe pork ese uje sontew ɨre shish dechɨ. Ese uje sontew ɨre tyenɨj tokole nehe 8hnii ese hnakɨrbich tokole uje ɨluuta mɨhnũ. Uje eyok Ɨrhĩch Jesús cheeshpo nehe ich tyenɨj shuu ese hnakɨrbich chĩ̵ra dehyerc. Jesús tyenɨj hũrpa uje cheeshpo nehe hn uu ɨr yokõrt tyenɨj sɨhna ese hnakɨrbich. 9Uje terɨhɨ ɨshɨrĩt ɨchii ese hnakɨrbich uje ɨluuta mɨhnũ tokole pork Satanás takashɨm ɨre. Ɨshɨm ukurbo ich kɨhniya par uje pwele shiyokõr kuche uje ye latɨk pwele niyokõr. Shiyokõr par shuu oso õr eyuwo tɨsĩ̵r uje ɨr ukurbo de hn par shuu oso ochishlabe. 10Nos shiyokõr kuche kɨhniya uje ich mɨhnũwo shɨ par sehnyẽr oso uje tyenɨj otĩ̵r urhuta bahluta ehet nehe pork ye onahmũrpe Porrosht ahwoso uje ich ũru uje tata uje Jesús ɨshɨ õr hnɨtewɨhɨ Porrosht ahɨr par uje õr owich dechɨ Porrosht ahɨr. 11Erze oso uje õr ɨluu mɨhnũ ye onahmũr Porroshtpe heke Porrosht tyenɨj shiyokõr kuche par shuu õr eyuwo tɨsĩ̵r uje ese hnakɨrbich tata uje ich ũru per shɨ tata lekushiĩ. 12Porrosht shiyokõr shuu ɨtsorz pork chɨbɨte lahwosni uje nos wɨr oso uje ye onahmũrpe ɨr ahwospe uje ich ũru wɨr tyenɨj otĩ̵r urhuta bahluta ehet nehe. Shɨ otsahmũr mɨhnũwo. 13Pɨshɨbo watsaklo, eyoklo Ɨrhĩch sahmũr pishɨ olak. Shish oyɨna Porrosht par olak, pork Porrosht chiihla olak uje ehn yahpaa niyokõr ɨrmõkite. Shɨ pork ye otiislo Porrosht ahwospe uje ich ũru hn Porrosht Ɨchɨbich churhũ erze mɨhnũwo uje de olak aho heke olak owich de Porrosht ahɨr. 14Shɨ pork oyitɨm olak uje Jesús ɨshɨ eyok hnɨtewɨhɨ Porrosht ahɨrkite hn ye otiislo heke Porrosht chiihla olak par uje ɨshɨm olak erze om uje de eyok Ɨrhĩch Jesucristo ahɨr. 15Pɨshɨbo watsaklo, ye ekeylo hn ye moymlo erze ahwoso uje tãra Porrosht uje oyiyokorãha olakni kɨmɨjɨ oyitɨm olak o kɨmɨjɨ oyichew oyɨbɨte hute. 16Sehe oyuhu eyok Ɨrhĩch Jesucristo hn eyok Deych Porrosht otakashɨm olak. Wɨr uje otsahmũr pishɨ eyoklo heke otsõsɨr eyoklo uje shish oshuu eyoklo aho kɨɨs. Wɨr oshuu yɨrahalo uje eyoklo owich de õr ahɨr. 17Sehe oyuhu eyok Ɨrhĩch Jesucristo hn eyok Deych Porrosht oduhu olak aho kɨɨs hn oduhu olak duurapo par uje nos wɨr kuche uje ahakõrlo tokole om, hn par uje nos wɨr olak ahwoso uje atɨmlo yewo ich tokole om.

will be added

X\