2 TESALONICENSES 1

1Yok Pablo. Silvano hn Timoteo ode lɨka pahɨr. Oyichew ana hutɨta par oyosɨm olak uje olak Porrosht aabo uje olak dechɨ dɨt Tesalónica. Porrosht wɨchɨ uu olak Deych, hn Jesucristo wɨchɨ olak Ɨrhĩch. 2Sehe oyuhu Porrosht uu eyok Deych hn eyok Ɨrhĩch Jesucristo odosɨr olak hn oduhu olak aho kɨɨs. 3Pɨshɨbo watsaklo, oyɨraha uje amsahalo par Porrosht aabo tenitni ich shɨ ye otiislo ɨrpe per ele ahle ich ma ye otiislo ɨrpe hn ma ahmũrloye heke shish oyɨna Porrosht par olak. 4Hn õryok aho kɨɨs uje oyitɨm Porrosht aabo yewo uje ode lekɨtiyo uje ye otiislo Porrosht hn ye moymlo ɨrpe uje oso oshiyokõr mɨhnɨkĩ̵hɨ olak. Shɨ olak ewenta 5heke ich ɨmeheeych uje Porrosht shiyokõr om uje chiihla olakni. Par Porrosht ich om uje etĩ̵rlo wahacha ɨr ahɨr nehe pork olak ewenta erze mɨhnũwo uje oso oshiyokorĩ̵hɨ olak. 6Wɨchɨ ɨr ɨluuta om heke tyenɨj shuu oshɨ labahat nehe erze uje oshiyokõr mɨhnuwõho olak. 7Uje eyok Ɨrhĩch Jesús cheeshpo nehe hn Porrosht ye duhu mɨhnũwo tĩ̵r olak hn ye duhu tĩ̵r oryõkpe. Ich sontew erze mɨhnũwo shuu ɨtsorz. Uje wɨchɨ tãra poõrc nehe ich jwekɨta data ĩya ɨre hn Porrosht ɨr anjele õya ɨre toy uje õr ukurbo deyo de. 8Porrosht tyenɨj sepyẽr erze uje ye odɨraha ɨrpe hn otsotiis eyok Ɨrhĩch Jesús ɨr ahwoso uje tata uje ɨre ɨshɨ õr hnɨtewɨhɨ Porrosht ahɨrkite. 9Par sepyẽr õr ich tyenɨj shuu omasaha asa urhuta bahluta ehet uje ich dospa. Shish odechɨ hn yelɨj onɨhna ɨre. Wɨr shish odechɨ odukulehe eyok Ɨrhĩch. Ich ye onomope erze uje ich ɨhĩ̵rtso pisho uje Porrosht shiyokõr chĩ̵ra dakɨrbo. 10Uje terɨhɨ ese deeych uje eyok Ɨrhĩch cheeshpo nehe ich ɨhĩ̵rtpa par ɨre pork nos wɨr Porrosht aabo odechɨ ɨr ahɨr. Nĩhyok kuche mɨhnũwo õr aho. Tyenɨj omo ɨre hn oteychɨm hn ich oteeychãha. Wɨr uje ye olotiis ɨrpe. Olak ye otiislope erze ahwoso uje oyitɨm olakni, heke olak dechɨ õr ahɨr toy. 11Hn shish õryok orar oyapur Porrosht par olak par uje Porrosht nɨshii erze olak ɨluu pork wɨchɨ uje chiihla olak par shuu olak ɨluu ich om. Oyapur Porrosht par uje takashɨm olak chĩ̵ra dakɨrbo par uje tokole om erze uje sehe ahakõrlo shɨ pork ye otiislo ɨrpe. 12Oyapur Porrosht oyuhu ɨtsorz par erze uje ahakõrlo shuu oso ochɨraha uje eyok Ɨrhĩch Jesús ich dich. Kɨmɨjɨ erze olak ɨbiyo tokole ɨtsorz hn Porrosht tyenɨj shuu olak deyo toy. Tyenɨj tokole ɨtsorz pork Porrosht takashɨm olak hn eyok Ɨrhĩ'ch Jesucristo ɨtspo takashɨm olak.

will be added

X\