2 PEDRO 3

1Pɨshɨbo watsaklo, tichew ana hutɨta yatapo. Ich otiyer uje tichew tokosɨm olak par uje uhu olak eyuwo tɨsĩ̵r. Sehe ye tuu olak koswãha, 2hn sehe tuu olak eyucha uu Porrosht ɨr profeta poruwo wɨshɨ õr ahwoso hn olak eyucha uu eyok Ɨrhĩch ɨr ahwoso toy uje erze apóstole yewo oshiyokorãha olak uje Jesucristo ɨshɨ eyok hnɨtewɨhɨ Porrosht ahɨrkite. 3Wap sehe tuu erahalo uje deeych yet nehe uje yej terɨhɨ ĩ̵rmo uhurc hn oso ode uje ochiyuhu lahwoso uje shɨ õr ɨre otsahmũr par uje oloter yewo. Shɨ oshiyokõr erze mɨhnũwo uje õr ɨre otsahmũr. 4Wɨr otata otsɨɨ: —¿Jesús chɨhɨ ɨraãpo? Chɨbɨte lahwoso uje tyenɨj cheeshpo per ye deeshpope. Nehech eyok deyo wɨshɨ otoni hn ye taãchpe nehech ele ahle. Uje ehn ĩ̵rmo tenitkite nehech ele ahle shish ɨtsye.— 5Erze oso ye onahmũr odɨrehepe heke ochɨkey uje Porrosht chiilehetkite hn poõrc tokole hn ĩ̵rmo de hn hnɨmich tokolɨhɨ awɨt uut hn shuu awɨt pɨt tĩ̵r poõrc hn pɨt sakaha hnɨmich. 6Porrosht chĩ̵ra ese awɨt shuu kresyent bahlut tɨrẽt par uje nos sɨhna oso uje ode nãhu ɨrmõkite. 7Porrosht chɨbɨte lahwoso par uje terɨhɨ ese deeych nehe ich shɨ chilehet hn jwekɨta sɨhna poõrc hn sɨhna hnɨmich hn sepyẽr erze oso uje ye onahmũr ɨrpe hn chɨmchaha õr urhuta bahluta ehet. 8Pɨshɨbo watsaklo, ye ekeylo. Par eyok Ɨrhĩch uu deeych nohmet shɨ ɨtso mil ãyo hn mil ãyo shɨ ɨtso deeych nohmet. 9Oso ode uje otata uje eyok Ɨrhĩch iyehi lahwoso pork ye niyokõr shɨchishpe uje ɨre tata, per eyoklo Ɨrhĩch yelɨj sehi lahwoso. Shɨ hneta oso pork ye nahmũr uje yeẽk tĩ̵r urhuta bahluta ehet nehe. Shɨ sehe duhu nos õr eyuwo tɨsɨrĩ̵hɨ Cristo uje ich ũru, ye onimehipe hn ye olotiis ɨrpe. 10Per ye latɨk dɨraha eyok Ɨrhĩch ɨr ɨshɨrĩt shɨ ɨtso echɨkɨt uje taachĩ̵hɨ dɨhlak hn ye latɨk dɨraha. Shɨ ich ihyokõrak dich uje ɨre sɨhna poõrc chĩ̵ra jwekɨta hn erze kuche uje dechɨ hn sɨhna hnɨmich toy. Nos wɨr kuche uje oso oshiyokõr nos sẽru. 11Ich ma om uje ahakõrlo uje Porrosht sahmũr hn eeychãhalo ɨre pork ɨre tyenɨj nos sɨhna erze kuche shuu ɨtsorz nehe. 12Uje ehn anemlo ese deeych nehe ich ahakõrlo uje ɨre sahmũr par uje uhulo cheeshɨ shɨchish. Uje terɨhɨ ese ɨshɨrĩt ich Porrosht sɨhna poõrc hn sɨhna hnɨmich chĩ̵ra jwekɨta. 13Porrosht chɨbɨte lahwoso uje tyenɨj shiyokõr poõrc hn shiyokõr hnɨmich ahlo heke shɨ yiyemlo erze ahlo uje mĩ̵hnɨk nihyokõhochɨs. 14Pɨshɨbo watsaklo, uje ehn yesh anemlo ĩ̵rmo ahle ich enahalo olak par uje ye ahakõrlo uje mɨhnũwo. Heke uje Cristo cheeshpo nehe ich nĩhyok olak kuche mɨhnũwo, hn shɨ olak aho kɨɨsɨhɨ ɨr ɨle ɨkɨch. 15Ye ekeylo uje eyok Ɨrhĩch yesh hneta oso par uje omasaha par ɨr aabo. Porrosht ɨshɨm eyok leshɨbich Pablo eyuwoni hn shuu chichew lahwoso 16uje tata ɨtso uje tichew. Nos wɨr erze ɨr hute uje chichewni tata ɨtso yok uje tiita uje Cristo cheeshpo nehe. Ɨr ahwoso yewo de uje ich kwestpa par uje ochɨraha. Erze oso uje ye odɨraha latɨk hn erze uje yerɨj odɨrahapa Porrosht ahwoso oshuu Pablo ɨr ahwoso poshɨk par uje oshiyokõr uje õr ɨre otsahmũr. Wɨr oshuu Porrosht ɨr ahwoso yewo poshɨk toy per uje oshiyokõr oshuu ɨtsorz ich shɨ sehe oduhu Porrosht nɨhna õr ɨre nehe. 17Pɨshɨbo watsaklo, uje ehn ye wɨr otaãcha ich titɨm olak wap par uje erahalo. Abeylshɨp olak par uje ye onehnyẽr olak hn oduhu olak koswãha. Wɨr õr ɨluu mɨhnũ. 18Ma om uje erahalo ma eyoklo Ɨrhĩch Jesucristo par uje ma takashɨm olak. Wɨchɨ uje ɨshɨ eyok hnɨtewɨhɨ Porrosht ahɨrkite. Ele deeych ich sehe tuu nos oso onahmũr uje Porrosht wɨchɨ uu õr bahlut pisht hn shish ɨtsorz. Ich ɨhĩ̵rtpa kɨmɨjɨ oniyokõr oduhu ɨlorz.

will be added

X\