2 PEDRO 2

1Titɨm olak uje oso odekite uje ochii ɨr profetɨhɨ ese israel oso õr hnɨmich per wɨr ye profetpe. Je deeych yet nehe hn oso ode uje otsanɨmɨrãha Porrosht ahwosoho olak ehet per wɨr shɨ otata uje tãra õr eyuwo. Õr ahwoso shuu oso ochɨbɨte uje ye otĩ̵r urhuta bahluta ehet nehe per ye ũrpe. Ye oduhu deyuwo ɨmeheeychpe uje oshiyokorãha olak nehech uhurc ich otsata eyok Ɨrhĩch Jesucristo uje ɨshɨ õr hnɨtewkite heke Porrosht tyenɨj sepyẽr õr shɨchish ich shuu dospa. 2Ich okɨhniya uje ye olotiis õr petɨk nehe hn otseẽt õr. Oshiyokõr mɨhnɨkĩ̵hɨ tɨmcher oshuu õr ɨluu ɨtso õr. Heke oshuu oso yewo ochish majamichɨhɨ Porrosht ahwoso uje ich ũru. 3Wɨr shɨ otsahmũr hnote heke oshiyokorãha olak erze ahwoso uje ye ũrpe par uje oshuu asɨmlo õr hnote. Osdeyo uje Porrosht chɨbɨte par uje sepyẽr õr nehe hn tyenɨj yakaha. 4Porrosht ye perdonar erze anjele petɨkkite uje oshiyokõr mɨhnũwo. Tãra õr chɨbɨte õr ese jotsɨt uje ich yakpa hn iim orĩ̵hɨchɨs asa dɨhlelta ehet. Shɨ oyem uje sepyẽr õr nehe. 5Hn ɨtspo Porrosht ye perdonar erze oso petɨkkite uje ehn ode nãhu ĩ̵rmo uje ehn Noé de. Shuu kresyent bahlut tɨrẽtkite par uje sɨhna erze oso uje ye onahmũr Porroshtpe. Noé nos tatɨm oso uje tyenɨj oshiyokõr uje Porrosht sahmũr, per ye onahmũrpe, heke Porrosht shɨ takashɨm ɨre hn erze õr syete uje õya ɨre, heke ye otope. 6Hn ɨtso erze oso uje odebuhu erze duwo Sodoma hn Gomorra, Porrosht sɨhna õrkite hn sẽru erze õr duwo nehech piitsak. Shiyokõr shuu ɨtsorzkite par uje oso uje ye onahmũr Porrosht ochɨraha uje Porrosht tyenɨj sepyẽr õr ich dospa. 7Porrosht chiyuhu Lotɨhɨ ese dɨt Sodoma ehetkite uje oso ode uje õr ɨluu mɨhnũ. Ese Lot ich ɨluuta om per ich sɨtak wɨr õr ɨluu. Shish oshiyokõr uje mɨhnũwo heke ye duhu Lot lɨshɨ ehet kɨɨspe. 8Debuhu wɨr õr ehet hn kal deeych umo erze mɨhnũwo uje wɨr oshiyokõr hn chunt erze mɨhnũwo uje otata. Wɨr shuu ɨre dosdarak. 9Heke ich ɨmeheeych uje eyok Ɨrhĩch chɨrahapa sosɨr erze uje otsahmũr ɨre par uje ye oniyokõr erze kuche mɨhnũwo uje yewo sehe oduhu Porrosht aabo oniyokõr. Hn chɨraha toy tɨbey erze uje oshiyokõr uje mɨhnũwo nehech terɨhɨ ɨshɨrĩt par sepyẽr õr. 10Ese deeych uje Porrosht sepyẽr õr ich yarhakpa par erze uje shɨ omuhuye ahɨr par uje oshiyokõr mɨhnuwõhoye. Tyenɨj Porrosht sepyẽr õr ich shuu dospa. Erze oso ye otolpe erze õr bahluwo. Ye otola latɨk. Ochinehnɨm erze uje ode poõrc uje õr ukurbo deyo de hn ye otola õrpe. 11Erze anjele ma õr ukurbosh per ye oniyokõrpe oduhu ɨlorz. Yelɨj otatehe eyok Ɨrhĩch ɨle ɨkɨch uje yewo õr ɨluu mɨhnũ. 12Erze hnakɨrbo oshiyokorãha olak nehe erze uje ye ũrpe. Otata lahwoso mɨhnũwo erze uje hnii õr ɨre ye odɨrehepe. Oshiyokõr erze uje ich mɨhnũwo hn erze kuche mɨhnũwo tyenɨj cheeshɨ tĩ̵r õr hn sɨhna õr. Wɨr shɨ õr ɨtso loshɨpo. Ye õr eyuwĩ̵rsh. Ye õr eyuwo tɨsĩ̵rpe uje oshiyokõr kuche. Wɨr shɨ õr ɨtso loshɨpo uje shũrha shɨ par uje yeẽk pwele shiyeru hn shuu shuu toy. 13Oshiyokõr mɨhnɨkĩ̵hɨ yewo hn wɨr oshiyokõr mɨhnɨkĩ̵hɨ õrpo. Uje deeych ich otsahmũr pishɨ erze õr ahmyo uje oshiyokõr. Otɨrẽt otĩ̵r olak ahamich toy per ich ye ompe pork wɨr õr ɨluu mɨhnũ. Uje odechɨ ich shɨ ɨtso mansha uje de õr nerpta. Uje odechɨ olak ahamich owich ich õr aylpa pork otsehnyẽr olak oshuu ebɨtɨlo uje ich õr ɨluu om. 14Otsahmũrpa uje oteychɨm tɨmcher hn opota õr shɨ par uje sehe otorãha õr. Yelɨj patɨm õr uje oshiyokõr oshuu ɨtsorz. Otsehnyẽr Porrosht aabo uje hnii ochɨraha Porrosht ahwoso oshuu oshiyokõr uje mɨhnũwo. Ich yakaha õr uje opota kuche. Porrosht chɨbɨte lahwoso uje tyenɨj chɨmchaha õr urhuta bahluta ehet nehe. 15Erze uje otsehnyẽr õr ich oym Porrosht ɨjɨch par uje oshiyokõr kɨnaha. Oshiyokõr ɨtso uje uu profeta Balaam lɨshɨ shiyokõrkite. Ese Balaam wɨchɨ ɨr deych iich otsɨɨ Beor. Balaam ich sahmũr pishɨ uje shiyokõr uje mɨhnũwo par uje serz hnote. 16Porrosht shuu asa borkɨta chilehet keytkẽr Balaam uje shiyokõr uje mĩ̵hnɨk, hn sontew ese profeta uje sehe niyokõr uje mĩ̵hnɨk shɨ ɨtso uje wɨchɨ totihla. 17Erze hnakɨrbo uje otsanɨmɨrãha ahwoso uje ye jukurpe wɨr shɨ õr ɨtso jotse uje ye awɨt chɨhɨ ehetpe. Shɨ õr ɨtso ukuhur uje shɨ myent hnoy par uje ye ɨbɨkpe. Porrosht chɨbɨte owich shɨ par õr ɨre wahacha uut pisht uje ich dɨhlelpa. 18Uje õr ɨre ochiilehet ich otsɨhnew lahwoso par onarim ɨre per ye jukur. Wɨr otsehnyẽr erze uje yesh omasaha par Porrosht aabo uje antni shish oshiyokõr erze kuche mɨhnũwo shɨ ɨtso oso yewo. Wɨr oshuu oshiyokõr erze mɨhnũwo toy uje antni oshiyokõr. 19Otatɨm õr uje ye latɨkɨsh uje oshiyokõr erze mɨhnũwo per ye ũrpe. Erze kuche mɨhnũwo ye duhu õr librepe. Erze kuche mɨhnũwo shɨ masaha ɨtso õr yɨnsɨro pork ich yakaha õr pork erze kuche mɨhnũwo uje yakaha oso wɨr uu õr yɨnsɨro. 20Uje ochɨraha uje eyok Ɨrhĩch Jesucristo ɨshɨ õr hnɨtewkite ich oym erze kuche mɨhnũwo uje de ĩ̵rmo. Kɨmɨjɨ odeeshpo oniyokõr erze mɨhnũwo uje oymkite nehech uhurc ich yakaha õr heke ich uhurc ich õr ma ɨluu mɨhnũ. Ye ɨlo uje wap petɨkni. 21Ma om kɨrẽhe ye onunt uje tyenɨj shɨ ye olotiis Cristo par uje omasaha par Porrosht aabo je uje ochuntni hn oym ocheeshpo oshiyokõr erze mɨhnũwo. 22Shɨ õr ɨtso erze ahwoso uje ich ũru uje oso otata. Shɨ õr ɨtso pohoch uje pwey hn cheeshpo tew lapweych. Shɨ õr ɨtspo poohle uje ochũrhu hn cheeshpo tabɨtehe katuta.

will be added

X\