2 PEDRO 1

1Yok Simón Pedro uje tichew ana hutɨta tokosɨm olak. Yok Jesucristo ɨr yɨlak hn ɨr apóstol. Jesucristo wɨchɨ uu eyok Porrosht uje ɨshɨ eyok hnɨtewɨhɨ dahɨrkite. Wɨchɨ uje ye duhu yotiis ɨrpe, hn ye duhu otiislo ɨre. Ye niyokõrpe kɨnaha par olak hn kɨnaha par õryok. 2Par uje ma erahalo Porrosht ɨr ɨluu hn ma erahalo eyok Ɨrhĩch Jesucristo ɨr ɨluu ich sehe shish tuu odosɨr olak hn ma oduhu olak aho kɨɨs. 3Chĩ̵ra dakɨrbo ich nos ɨshɨm eyok uje eyok nesita par ese ɨkɨrĩt uje yelɨj nɨhna ɨre hn par uje yuhu eyok ɨluu ɨtso ɨre. Shɨ pork yɨraha ɨre uje chiihla eyok, heke ɨshɨm eyok shuu ɨtsorz. Wɨchɨ chiihla eyok par uje yuhu ɨre ma dich. 4Shɨ pork yuhu ɨre ma dich ich chɨbɨte lahwoso uje ich ɨhĩ̵rts pisho par uje olak pwele moymlo erze kuche mɨhnũwo uje oso oshiyokorĩ̵hɨ nãhu ĩ̵rmo. Oshiyokõr kuche mɨhnũwo pork otsahmũr. Ich uhurc nehe ich olak ɨluu om shɨ ɨtso Porrosht ɨr ɨluu. 5Porrosht tyenɨj shiyokõr ɨtsorz par olak pork ye otiislo ɨre heke enaha olak par uje ahakõrlo om. Enaha olak toy par uje erahalo uje Porrosht ahwoso tata. 6Hn enaha olak par uje ahakõrlo uje Porrosht ahwoso tata hn ye ahakõrlo kuche mɨhnũwo. Enaha olak par uje nos olak ewenta erze kuche mɨhnũwo uje tĩ̵r olak. Enaha olak toy par uje ahmũrlo Porrosht. 7Enaha olak par uje ahmũrlo Porrosht aabo yewo, hn enaha olak par uje nos ahmũrlo oso yewo. 8Kɨmɨjɨ ye ahakõrlo erze uje titɨm olakɨke ich ye olak jukur, per kɨmɨjɨ shish ahakõrlo ich ahakõrlo om pork erahalopa eyok Ɨrhĩch Jesucristo ɨr ɨluu. 9Kɨmɨjɨ ye yeẽk niyokõr uje ɨtsorz ich wɨchɨ shɨ ɨtso uje olɨbɨk o kɨmɨjɨ ɨle pata, heke chɨkey uje Jesús perdonar erze kuche mɨhnũwo uje shiyokõrni. 10Pɨshɨbo watsaklo, par uje ye tokolɨhɨ olak yeẽk ɨlorz ich tyenɨj ahakõrlo ɨtso uje titɨm olakloko par uje uhulo ɨmeheeych uje ich ũru uje Porrosht chiihla olak. Kɨmɨjɨ ahakõrlo uhulo ɨtsorz ich ye eeshlo ahakõrlo mɨhnũwo uje ye Porrosht nahmũrpe. 11Ɨmeheeych uje olak Porrosht aabo heke deeych yet nehe ich shɨ ɨtso uje otsɨtsẽr pwert uhurrza oshuu ɨsahapa par uje amsahalo ehet etĩ̵rlo ese owich uje eyok Ɨrhĩch Jesucristo tyenɨj tɨbey Porrosht aabohochɨs nehe. Wɨchɨ shish tɨbey õr. Yelɨj nɨhna ɨre. Wɨchɨ uje ɨshɨ eyok hnɨtewɨhɨ Porrosht ahɨrkite. 12Heke sehe shish tuu olak eyucha uje yesh titɨm olak. Osdeyo uje entloni, hn ahakõrlo hn erahalo uje erze ich ũru. 13Uje ehn yesh yok ɨkaha nãhu ĩ̵rmo ich tɨbɨte uje ma om tuu olak eyuchapo uje oshiyokorãha olak par uje ye ekeylo. 14Tɨkɨraha uje ich yej terɨhɨ pɨshɨrĩt par uje tɨkɨtɨ heke tyenɨj oshuu yok oshuu tɨkɨtɨ shɨ ɨtso uje eyok Ɨrhĩch Jesucristo tatɨm yokni. 15Tichew ana hutɨta par uje titɨm olak erze pahwoso. Heke uje tɨkɨtɨ nehe ich shish erahalo ahnũwo pahwoso uje titɨm olakɨke. 16Erze uje tiyokorãha olak hn erze uje apóstole yewo oshiyokorãha olak oshuu erahalo uje eyok Ɨrhĩch Jesucristo ɨr ukurbo de, hn tyenɨj cheeshpo nehe. Erze ɨr ahwoso ye monɨhnepe uje shɨ otata. Ye shɨ õryok eyuwo tɨsĩ̵rpe hn oyitɨm olak. Wɨr ich ũru. Yok hn erze apóstole yewo oyumoni uje Jesús hũre. 17Oyunt Porrosht uje narim Jesús. Tata ɨm: —Wɨchɨ uu yok pijɨt pisht. Tahmũrpa uje shiyokõr.— 18Õryok oyunt erze ɨr ahwoso uje tãra poõrc pork õryok dechɨ Cristo ahɨr kojach eeych uje ɨr Deych keytkẽr. 19Heke Porrosht shuu yakaha erze ahwoso uje profeta poruwo wɨshɨ otatkite. Tyenɨj ẽrlo pahwoso uje titɨm olak. Erze profeta õr ahwoso shɨ ɨtso nampyont uje hũre chihit ese owich uje ich dɨhlelpa nehech deychole hn porrzeebcha bahluta tokole shɨ ɨtso uje chihit olak aho. Shɨ tɨteẽta uje shuu erahalo kuche nehech Cristo cheeshpo nehe ich erahalopa. 20Ahnũwo ahwoso uje tyenɨj titɨm olak ich tyenɨj erahalo. Nĩhyok uje yeẽk shuu deyuwo tɨsĩ̵r hn chichew Porrosht ahwoso shuu ɨtsorz, 21heke ich nĩhyok profeta uje shɨ tata lahwosni. Shɨ otatni uje Porrosht Ɨchɨbich tatɨm õr uje Porrosht tata.

will be added

X\