2 CORINTIOS 9

1Ye nesitpe uje tichew tɨbɨte ana hutɨta titɨm olakpo erze hnote uje eeshɨlo yẽrni par uje akashɨmlo erze Porrosht aabo pork ich erahalo. 2Tɨkɨraha uje sehe akashɨmlo õr heke titɨm Porrosht aabo uje ode lɨka hnɨmich Macedonia too: —Ich ãyt nohmɨra uje erze Porrosht aabo uje ode hnɨmich Acaya sehe otakashɨm erze Porrosht aabo uje ode Jerusalén par oshɨmɨhɨ õr hnote.— Uje Macedonia oso ochunt uje sehe akashɨmlo erze Porrosht aabo ich sehe otakashɨm õr toy. 3Titɨm erze Porrosht aabo uje eeshɨlo hnote yẽrni. Ye tahmũrpe uje yok kushĩyak heke tuu eyok leshɨbo ohno otĩ̵r olak par oteychɨm kɨmɨjɨ nos emɨtlo hnote owich ɨtso uje titɨm õrni 4pork kɨmɨjɨ Macedonia oso onõya yok uje takaha tɨtĩ̵r olak hn olak ye emɨtlo hnote owɨlope ich uhulo oyɨpook hn ich shuu apooklo toy pork titɨm õrni uje olak ich nos emɨtlo. 5Heke ma om tuu eyok leshɨbo ohno wap otĩ̵r olak par onɨshii erze hnote owich uje atɨmlo yokni par uje ebɨtlo. Heke uje takaachĩ̵hɨ olak ahɨr nehe ich nos de. Ye oyɨrok olakpe par uje ebɨtlo erze hnote. Shɨ ahmũrlo heke ebɨtlo. 6Ahnũwo uje titɨm olakɨke shɨ tɨteẽta. Kɨmɨjɨ akashɨmlo erze losuhlaabo pɨkaap ich shɨ ɨtso ese uje chukwẽr pɨkaap heke chekushu pɨkaap per ese uje chukwẽr kɨhniya ich chekushu kɨhniya pork Porrosht ma takashɨm erze uje ma otsõsɨr yewo. 7Kal nohmɨr nohmɨr shuu deyuwo tɨsĩ̵r par ɨshɨmɨhɨ. Ye ompe uje yeẽk ɨshɨm uje ye nahmũr dosɨmpe, hn ye ompe ɨshɨm shɨ pork yeẽk chɨrok ɨre. Porrosht sahmũr erze uje ich õr ayla uje oshɨm 8hn ɨre nos pwele ɨshɨmɨhɨ olak kuche uje olak nesita hn shuu iyuwe par uje shish de olak ahɨr uje olak nesita hn par uje olak pwele akashɨmlo yewo hn uhulo sowe pork nos wɨr erze obiyo ich om. 9Porrosht ahwoso tata shuu ɨtsorz ɨm: —Uje yeẽk sahmũr yok ich ye narhak ɨr kushjãro par ɨshɨmɨhɨ erze losuhlaabo hn wɨr ye olɨkey uje ɨshɨmɨhɨ õr erze uje ich om hnii Porrosht ye dɨkeype uje wɨchɨ shiyokõr.— 10Porrosht wɨchɨ uje ɨshɨm oso jõro eyhi par uje ochukwẽr hn ɨshɨm õr poso par uje otew. Tyenɨj nos ɨshɨm olak uje olak nesita par uje olak pwele akashɨmlo erze yewo hn shish de olak ahɨr ma kɨhniya. 11Porrosht tyenɨj takashɨm pɨshɨ olak par uje olak pwele akashɨmlo pɨshɨ erze yewo toy hn erze hnote uje asɨmɨhɨlo õryok par uje oyosɨmɨhɨ õr ich shuu onɨna Porrosht. 12Uje asɨmɨhɨlo erze Porrosht aabo erze hnote ich akashɨmlo õr hn ich uhulo wɨr onɨna Porrosht toy. 13Uje akashɨmlo õr uhulo ɨtsorz ich uhulo ɨmeheeych uje olak ye otiislope uje Cristo ɨshɨ olak hnɨtewɨhɨ Porrosht ahɨrkite hn uhulo oso onarim Porrosht uje akashɨmlo õr hn akashɨmlo yewo toy. 14Heke wɨr õr eyucha olak hn õr orar otsapur Porrosht par takashɨm olak pork Porrosht wɨchɨ uje shuu akashɨmlo pɨsh õr. 15Tɨkɨnshɨp Porrosht pork shuu Cristo ɨshɨ eyok hnɨtewɨhɨ dahɨrkite. Ich ɨhĩ̵rtpa uje ɨtsorz.

will be added

X\