2 CORINTIOS 8

1Pɨshɨbo watsaklo, sehe oyuhu erahalo uje Porrosht shiyokõr par erze ɨr aabo uje otakɨsho lawichɨhɨ lekɨtiyo hnɨmich Macedonia. 2Kuche mɨhnũwo ich kɨhniya tĩ̵r õr, per uje ochunt uje sewɨt sẽhi erze Porrosht aabo uje ode dɨt Jerusalén ich sehe otakashɨm õr hn õr ayla. Ahni wɨr õr losuhlaabo pisho per oshɨm õr ich kɨhniya. 3Tɨkɨraha uje oshɨm õr uje õr pwele hn oshuu iyuwe. Nĩhyok uje yeẽk chɨrok õrni. 4Shɨ õr ɨre otsapur pish õryok par uje sehe otakashɨm erze Porrosht aabo uje ode dɨt Jerusalén. 5Õryok eyuwo tɨsĩ̵r uje wɨr shɨ oshɨmɨhɨ õr pɨkaap per ich oshuu iyuwe. Wap ich oshɨmɨhɨ ɨre eyok Ɨrhĩch par uje sehe oniyokõr ɨr ɨbiyo hn oshɨmɨhɨ ɨre õryok toy par uje otakashɨm õryok. Erze uje oshiyokõr wɨr uje Porrosht sahmũr. 6Heke oyitɨm Tito par uje sehe oyuhu nɨmɨt erze obiyo uje shiyokorĩ̵hɨ olak ahɨrni uje eeshɨlo hnote yẽr par erze Porrosht aabo uje õr losuhlaaboho wahacha Jerusalén. 7Shɨ olak ɨluu par enahalo olak uje ahakõrlo kuche. Shish enahalo olak uje ye otiislo Cristope hn enahalo olak uje anɨmɨrãhalo Porrosht ahwoso hn enahalo olak toy par erahalo pɨshɨ Porrosht ahwoso. Shish emɨtlo olak par uje ahakõrlo Porrosht ɨbiyo. Hn ahmũrlo pɨshɨ õryok. Shish enaha olak uhulo ɨtsorz heke titɨm olak par uje enahalo olak par akashɨmlo erze Porrosht aaboho wahacha dɨt Jerusalén toy. 8Uje titɨm olak tuu ɨtsorz ich ye tɨrok olakpe. Shɨ titɨm olak uje erze yewo otsahmũr otakashɨm erze Porrosht aabo uje kuche nihyokĩ̵hɨ õr ahɨr. Heke tuu ɨmeheeych uje olak ahmũrlo õr toy hn sehe akashɨmlo õr. 9Erahalo uje eyok Ɨrhĩch Jesucristo ich sahmũr pɨshɨ eyoklo. Wɨchɨ ich ɨrhĩch dich per shuu ɨre losuhlaap par uje takashɨm olak shuu olak ɨhĩ̵r deyo uje shuu olak Porrosht aabo. 10Heke takɨt olak par uje emɨtlo erze obiyo. Ãyt yetni ɨchii ebɨtlo olak ahwoso par eeshɨlo hnote yẽr hn ɨchii eeshɨlo yẽr. 11Ahmũrlo eeshɨlo erze hnote yẽr heke sehe tuu eeshɨlo yẽr shɨchish par emɨtlo. Ich om uje ebɨtɨlkite erze hnote uje olak pwele uje de olak ahɨr. 12Porrosht ayla uje yeẽk sahmũr ɨshɨm ɨre kuchɨt per shɨ uje de ɨre ahɨr, ye uje nihyokĩ̵hɨ ɨre ahɨrpe. 13Ye titɨm olak par uje akashɨmlo erze yewo uhulo õr kuche kɨhniya hn shɨ uhu olak losuhlaabo. 14Uje kuche chɨhɨ olak ahɨr hn erze yewo kuche nihyokĩ̵hɨ õr ahɨr ich akashɨmlo õr, hn uje kuche de õr ahɨr hn nihyokĩ̵hɨ olak ahɨr ich tyenɨj wɨr otakashɨm olak. Heke nos olak ɨtsye pork akashɨmloye. 15Porrosht ahwoso tata ɨm: —Erze israel oso uje otsamɨta manakite kɨmɨjɨ onamɨta kɨhniya ich ye oduhu sowe, hn kɨmɨjɨ onamɨta oduhu pɨkaap ich ye oduhu sehi pork otakashɨmye oshuu ɨtsshɨpye.— 16Titɨm olak uje ich tɨkɨnshɨp Porrosht uje shuu Tito sahmũr pɨshɨ olak shɨ ɨtso yok uje ich tahmũr pɨsh olak. 17Titɨm Tito par uje hno tekɨrɨhɨ olak hn ɨre sahmũrpa uje tĩ̵r olak heke tĩ̵r olak pork sehe do. 18Eyok leshɨbich yet tyenɨj hno ĩya Tito. Nos wɨr Porrosht aabo uje ode lekɨtiyo ochɨraha ɨre pork chɨrahapa sanɨmɨrãha Porrosht ahwoso tatɨm õr uje Jesús ɨshɨ õr hnɨtewɨhɨ Porrosht ahɨrkite. 19Ye shɨ erzepe per Porrosht aabo õr wee nohmɨramo ochiihla wɨchɨ par uje shish ĩya õryok hn takashɨm õryok uje oyiyokõr erze obiyo par oyakashɨm erze Porrosht aabo uje õr losuhlaabo. Uje oyiyokõr oyuhu ɨtsorz ich oyuhu eyok Ɨrhĩch ich dich hn oyuhu ɨmeheeych toy uje sehe nos oyosɨr oso 20par uje ye latɨk ninehnɨm õryok uje oyiish erze hnote yẽr uje ich kɨhniya par oyosɨm erze Porrosht aabo uje õr losuhlaabo 21heke sehe oyiyokõr uje ich om. Eyok Ɨrhĩch chɨraha hn sehe oyuhu oso odɨraha toy uje oyiyokõr om. 22Oyuhu eyok leshɨbich yet ĩya Tito hõr toy. Wɨchɨ shish oyosɨm ɨr ɨbiyoni par oyeychɨm hn shish shiyokõr uje ich om. Wɨchɨ sehe nõya õr par uje hno tĩ̵r olak pork chɨraha uje shish ahakõrlo uje ich om. 23Kɨmɨjɨ olak yeẽk ye dɨraha Tito ich wɨchɨ uu yok pihyẽrak uje takashɨm olak. Erze eyok leshɨbo uje õya Tito wɨr otãra erze Porrosht aabo uje otakasho lawichɨhɨ lekɨtiyo. Wɨr uje oshuu otɨrẽt. Uje oshiyokõr ese obich ich onarim Cristo. 24Uje ahakõrlo oomɨhɨ Tito hn erze uje õya ɨre ich nos wɨr Porrosht aabo ochɨraha uje ahmũrlo õr hn uhulo ɨmeheeych uje ahakõrlo om ɨtso uje titɨm õrni.

will be added

X\