2 CORINTIOS 7

1Pɨshɨbo watsaklo, Porrosht chɨbɨte lahwoso par debuhu eyok aho, heke tyenɨj yukwimlo erze kuche mɨhnũwo hn ye niyokõrlo pork erze kuche mɨhnũwo uje yiyokõrlo ich shuu eyok aho mɨhnũwo hn shuu eyok ɨchɨbiyo mɨhnũwo. Tyenɨj yɨtɨlɨlo Porrosht hn shish yiyokõrlo uje ɨre sahmũr. 2Sehe titɨm olak par uje ahmũrlo õryok uhulo ɨlo uje oyahmũr pɨsh olak. Ye oyiyokõr mɨhnɨkĩ̵hɨ yeẽkpe, hn ye oyuhu yeẽk niyokõr mɨhnĩ̵kpe, hn ye oyehnyẽr yeẽkpe. 3Uje titɨm olak tuu ɨtsorz ich ye peyuwo tɨsĩ̵r uje ahakõrlo uhulo ɨtsorz. Titɨm olakɨke uje ich oyahmũr pɨshɨ olak. Kɨmɨjɨ yehe eyok ɨka hn kɨmɨjɨ yɨtɨlo ich shish oyahmũr olak. 4Tɨkɨraha uje shish ahakõrlo uje tahmũr. Ich tahmũr uje ahakõrlo. Ich uhulo yok tukuurapo. Shish kuche mɨhnũwo kɨhniya tĩ̵r õryok per uhulo yok aylpa. 5Pork uje oyaachĩ̵hɨ hnɨmich Macedoniani ich oyɨrmtsɨr per ye oyiyarpe. Uje oyɨtĩ̵r lekɨtiyo ich shish oshiyokõr mɨhnɨkĩ̵hɨ õryok. Shish sehe oso oduhu õryok, hn shish oyuhu õryok eyuwo tɨsĩ̵r erze uje omasaha par Porrosht aabo kɨmɨjɨ õr owich om o kɨmɨjɨ ye õr owich ompe. 6Per Porrosht wɨchɨ uje shuu wɨr õr duura erze uje õr dosdarak heke shuu oyuurapo uje shuu Tito taachĩ̵hɨ õryok ahɨr. 7Ye shɨ uje taachĩ̵hɨ õryok ahɨrpe uje shuu oyuura, mahn shuu oyuurapo uje tõhwa erze olak ahwoso hn tatɨm õryok uje olak uje ebuhulo dɨt Corinto uhulo ɨre duuraponi. Wɨchɨ tatɨm õryok uje olak sehe eychɨmlo õryok toy, hn tatɨm õryok uje entɨlo uje uhulo yok dosdarakni hn eyerhlo. Tito tatɨm õryok uje shish olak eyuwo tɨsɨrĩ̵hɨ yok. Heke ich ma shuu yok aylpa. 8Uje tichew asa hutɨta tokosɨm olakni ich tuu olak dosdarak. Wap ich yok dosdarak uje tokosɨm olak asa yok hutɨta per ele ahle ich ye yok dosdarakpe. Tɨkɨraha uje asa hutɨta waa je tichew hn tokosɨm olak ich shuu olak dosdarak per shɨ par daalo arhaabo. 9Ye yok aylpe uje tuu olak dosdarak, per ele ahle ich yok ayla pork Porrosht shuu olak dosdarak par uje shuu olak eeshlopo ahakõrlo uje ɨre sahmũr. Heke ye oryõkpe uje oyiyokõr mɨhnɨkĩ̵hɨ olak. 10Uje Porrosht shuu yeẽk dosdarak ich shɨ sehe duhu noym shiyokõr uje ich mɨhnũwo par uje shiyokõr uje ɨre sahmũr. Uje shiyokõr uje Porrosht sahmũr ich ye dosdarakpe, per uje erze ĩ̵rmo oso õr dosdarak ye latɨk nɨshii õr ɨluupe. Ich uhurc shɨ shuu otoy. 11Uhu olak eyuwo tɨsĩ̵r asa hutɨta waa je tichewni hn tokosɨm olak. Uje olak ler ich Porrosht shuu olak dosdarak heke olak kemɨhɨ ese mĩ̵hnt uje yet shiyokorĩ̵hɨ olak ehet. Porrosht shuu enshiilo ese kuch mĩ̵hnt uje de olak ehet. Porrosht shuu etakloni ese kuch mĩ̵hnt uje de olak ehet. Wɨchɨ shuu olak kemɨhɨ ese kuch mĩ̵hnt uje de olak ehet. Wɨchɨ shuu olak eyuwo tɨsĩ̵rni uje sehe uhulo takaha tɨtĩ̵r olak par uje takashɨm olak. Sehe enshiilo shɨchish ese kuch mĩ̵hnt uje de olak ehet. Shuu eyuhulo wɨchɨ olak ehet ese hnakɨrbich uje shiyokõr mɨhnɨkĩ̵hɨ olak ehet. Wɨchɨ shuu nos ahakõrlo uhulo ɨtsorz par uje ebɨtlo orhõta uje enshiilo ese kuch mĩ̵hnt uje de olak ehet. 12Heke uje tichew asa hutɨtani hn tokosɨm olak ich ye tokorzɨhɨ ese hnakɨrbich uje shiyokõr mĩ̵hnɨk hn ye tokorzɨhɨ ese hnakɨrbich yetpe uje ese yet shiyokõr mɨhnɨkĩ̵hɨ ɨre. Shɨ tichew asa hutɨta tokosɨm olak par uje tuu ɨmeheeych Porrosht ɨle ɨkɨch uje olak sehe ahakõrlo uje õryok oyahmũr. 13Heke uhulo õryok duuraponi. Ye shɨ esepe per ich õryok aylpo uje Tito taachĩ̵hɨ õryok ahɨr hn ich ayla toy pork nos uhulo ɨre ehet kɨɨs. 14Uje ehn yahpaa tuu Tito do tĩ̵r olakni ich yok narim olak titɨm Tito uje ahakõrlo om. Uje Tito taachĩ̵hɨ olak ahɨrni ich ɨmeheeych uje nos ũru erze uje titɨm ɨrni, heke ye tɨkɨpookpe. 15Ɨre ma sahmũr olak uje eyucha uje nos ahakõrlo uje oyitɨm olakni pork ich ahmũrlo uje Tito tekɨrɨhɨ olak hn atɨlɨlo ɨre. 16Yok ayla pork tɨkɨraha uje ahakõrlo uje tahmũr.

will be added

X\