2 CORINTIOS 5

1Yɨrahalo uje ehn eyok ɨkaha nãhu ĩ̵rmo eyok yũhur shɨ ɨtso pwertɨt uje yebuhulo, hn uje yɨtɨlo ich sɨhna ɨre. Mahn eyok yũhur ahle depo shɨ ɨtso ihyuwo uje de poõrc uje Porrosht shiyokõr, ye oso oniyokõrpe. Wɨr yelɨj nɨhna ɨre. 2Uje eyok de nãhu ĩ̵rmo ich eyok ɨtso uje eyok ɨhnakosh pork sehe yuhu eyok yũhur ahle masaha eyok shɨchish par yebuhu poõrc nehe. 3Yahmũr uje eyok yũhur ahle masaha eyok shɨ ɨtso uje yonãha eyok ɨshuwo pork uje yɨtɨ ich eyok yũhur ɨler tokole heke eyok ɨchɨbiyo ich shɨ ɨtso uje ɨmehshɨp eeych. 4Uje ehn eyok yũhur ɨler de nãhu ĩ̵rmo ich ɨhnakosh hn yɨtɨrãha, sehe yuhu eyok yũhur ahle shɨchish. Ye yahmũrpe uje eyok yũhur ɨler sɨhna ɨre shuu eyok ɨtso uje yɨmehe eeych per sehe yuhu eyok yũhur ahle. Eyok yũhur ich shish ma ɨler nehech sɨhna ɨre per eyok yũhur ahle de uje yelɨj nɨhna ɨre. 5Porrosht wɨchɨ uje nos nɨshii eyokni par uje erze eyok yũhur ahle masaha eyok. Sehe duhu yɨraha uje ich ũru ɨtsorz heke ɨshɨm eyok Dechɨbichni. 6Heke ye eyok koswãhape pork yɨraha uje ehn eyok ɨkaha nãhu ĩ̵rmo ich eyok dukuhlehe poõrc uje eyok Ɨrhĩch de. 7Ele ahle ye yomo Porroshtpe per wɨchɨ tɨbey eyok. Yɨrahalo uje tɨbey eyok pork ye yotiislo ɨrpe. 8Shish ye eyok koswãhape. Yahmũrlo yukwim erze eyok yũhur uje de nãhu ĩ̵rmo par yɨtĩ̵rlo eyok Ɨrhĩch ahɨr. 9Kɨmɨjɨ ehn eyok ɨka o kɨmɨjɨ yɨtɨ shish tyenɨj yɨbɨte par uje yiyokõr uje eyok Ɨrhĩch sahmũr, 10pork nos wɨr eyok tyenɨj yiyehelo Cristo ɨr ɨle ɨkɨch nehe hn ɨshɨm eyok erze uje yerz kɨmɨjɨ yiyokõrlo uje ich om o kɨmɨjɨ yiyokõrlo uje ich mɨhnũwo uje ehn eyok de nãhu ĩ̵rmo. 11Heke titɨm olak. Oyɨraha eyok Ɨrhĩch hn shish oyɨtɨla ɨre heke oyitɨm oso oyuhu ɨmeheeych uje Cristo ɨshɨ õr hnɨtewɨhɨ Porrosht ahɨrkite. Porrosht chɨraha õryok aho. Chɨraha erze uje oyitɨm olak ich ũru, hn tahmũr uje olak erahalo toy. 12Ye õryok narim oryokĩ̵hɨ olak ɨkɨchpe. Shɨ oyitɨm olakpo par uje olak aylɨhɨ õryok, pork ode uje oshuu yeẽk dich hn onarim ɨre hn ye oduhu deyuwo tɨsĩ̵r kɨmɨjɨ ɨre ehet yũhurash. Erze uje titɨm olakɨke shuu erahalo uje tyenɨj atɨmlo õr. 13Kɨmɨjɨ eylo õryok totiloho ich ye latɨkɨsh pork shɨ oyiyokõr uje Porrosht sahmũr. Kɨmɨjɨ ye eylo õryok totilohope ich shɨ oyiyokõr par oyakashɨm olak. 14Yɨraha uje Cristo sahmũr eyok heke yiyokõr uje ɨre sahmũr pork yɨraha uje wɨchɨ tooho nos wɨr oso heke par Porrosht ich shɨ ɨtso uje nos yɨtɨ hn yoshɨ eyok hnɨtew pork Jesús ɨshɨkite. 15Cristo tooho nos wɨr oso par uje erze uje ye olotiis ɨrpe uje ehn õr ɨka ich ye oniyokõr uje shɨ õr ɨre otsahmũr. Uje ehn õr ɨka shɨ tyenɨj oniyokõr uje Cristo sahmũr, pork wɨchɨ uje nos tooho eyokkite hn ɨkpo. 16Heke oyitɨm olak. Antni ich eyok eyuwo shɨ ɨtso ĩ̵rmo oso õr eyuwo per ele ahle ich ye eyok eyuwo ɨlorzpe. Antni uje eyok eyuwo tɨsɨrĩ̵hɨ Cristo ich eyok eyuwo shɨ ɨtso ĩ̵rmo oso õr eyuwo per ele ahle ich ye eyok eyuwo ɨlorzpe, 17heke yeẽk uje ye lotiis Cristo ich ɨre kɨnaha. Ɨr ɨluu ich ahle. Wɨchɨ ye ɨlo uje wapni pork ɨr ɨluu ɨler ich nĩhyok. 18Nos wɨr erze ɨr ɨluu ahle shɨ tãra Porrosht. Wɨchɨ uje shuu Cristo ɨshɨ eyok hnɨtewɨhɨ dahɨrkite par uje Porrosht ehet kɨɨsɨhɨ eyok, hn wɨchɨ uje ɨshɨm õryok erze obiyo uje oyiyokõr par uje oyitɨm õr par oyuhu Porrosht ehet kɨɨsɨhɨ õr toy. 19Oyanɨmɨrãha ɨr ahwoso oyitɨm oso uje Cristo ɨshɨ õr hnɨtewɨhɨ Porrosht ahɨrkite par uje shuu Porrosht ehet kɨɨsɨhɨ õr. Heke ele ahle hn Porrosht ye eyucha õr hnɨtewpe pork Cristo nos ɨshɨkite. Wɨchɨ uje ɨshɨm õryok erze obiyo par uje oyanɨmɨrãha ɨr ahwoso oyitɨm oso. 20Heke õryok Cristo ɨr ɨbiyo uje otsɨɨ embajador par uje oyitɨm oso ɨr ahwoso. Shɨ Porrosht wɨchɨ uje shuu oyitɨm oso, heke oyitɨm õr shɨ ɨtso uje Cristo tatɨm õr par uje oshuu Porrosht ehet kɨɨsɨhɨ õr ɨre. 21Cristo ye niyokõr latɨk uje mĩ̵hnɨk per Porrosht sehe dosɨr eyok heke shuu Cristo ɨshɨ eyok hnɨtewɨhɨ dahɨr. Heke uje ye yotiislo ɨre ich nĩhyok ye eyok hnɨtew chɨhɨ Porrosht ahɨr shɨ ɨtso uje yelɨj yiyokõrlo uje mɨhnũwo uje Porrosht ye nahmũrpe.

will be added

X\