2 CORINTIOS 4

1Heke titɨm olak uje Porrosht sosɨr õryok hn ɨshɨm õryok erze obiyo par uje oyanɨmɨrãha ɨr ahwosni shɨ pork sahmũr ɨshɨm õryok. Ye oyuhu patɨm oryõkpe uje oyiyokõr ɨr ɨbiyo. 2Oyɨbɨte par uje ye oyiyokõr erze mɨhnũwo uje oso oshiyokõr uje shuu oso opook hn otsakɨs, hn oyɨbɨte par uje ye oyehnyẽr yeẽk hn ye oyuhu Porrosht ahwoso poshɨkpe. Uje oyiyokorãha õr ich shɨ oyiyokorãha õr uje ich ũru hn oyuhu ɨmeheeych. Heke erze uje otẽr ochɨraha uje shɨ oyiita uje ich ũru Porrosht ɨle ɨkɨch. 3Oyanɨmɨrãha Porrosht ahwoso oyitɨm õr uje Cristo ɨshɨ õr hnɨtewɨhɨ Porrosht ahɨrkite. Kɨmɨjɨ ye ɨmeheeychpe ich shɨ par erze uje otĩ̵r urhuta bahluta ehet nehe. 4Satanás wɨchɨ uu ĩ̵rmo oso õr porrosht. Wɨchɨ ye duhu õr eyuwo dishpe heke otsotiis Cristo. Ye duhu odɨraha uje Cristo ɨshɨ õr hnɨtewɨhɨ Porrosht ahɨrkite. Cristo wɨchɨ ɨtsshɨp ɨr Deych. 5Uje oyanɨmɨrãha Porrosht ahwoso ich ye õryok narim oryõkpe. Shɨ oyanɨmɨrãha oyitɨm õr uje Jesucristo wɨchɨ uu õryok Ɨrhĩch. Oyitɨm õr uje õryok olak yɨlo pork õryok de shɨ par uje oyakashɨm olak pork õryok Jesús ɨr ɨbiyo. 6Shɨ Porrosht wɨchɨ uje chiilehetkite ɨm: —Tuu luu tokole hn dihit asa dɨhlelta.— Wɨchɨ shɨ ɨtso uje chihit eyok aho toy par uje shuu yɨraha erze uje ich om uje shiyokõr par eyok uje shuu Cristo ɨshɨ eyok hnɨtewɨhɨ dahɨrkite. 7Ese uje Cristo shiyokõr par eyok ich om. Nos wɨr eyok ye eyok ukurbope uje yuhu oso omasaha par Porrosht aabo. Shɨ eyok ɨtso jarta hn erze ɨr ahwoso wɨr de eyok aho par uje oyuhu oso ochɨraha uje ɨre ukurbo deyo de par shuu oso omasaha par ɨr aabo heke ye shɨ tãra eyokpe erze ukurbo par shuu oso omasaha par Porrosht aabo. 8Shish kuche mɨhnũwo ich kɨhniya tĩ̵r õryok per wɨr ye nɨhna oryõkpe. Uje erze mɨhnũwo tĩ̵r õryok ich ye oyɨraha uje oyiyokõr per ye oyukwim Porrosht ɨbiyope. 9Oshiyokorĩ̵hɨ õryok uje ich mɨhnũwo per Porrosht yelɨj noym õryok. Oshiyokõr shɨ ɨtso uje wɨr oshuu õryok kay per ye õr pwele uje oduhu õryok oduhu oyɨtpe. 10Shish oloter õryok shɨ ɨtso uje oloter Jesusni. Sehe oduhu õryok oduhu oyɨtɨ per Jesús takashɨm õryok heke shuu ɨmeheeych uje ɨre yesh ɨka. 11Uje yesh õryok ɨka shish sehe oduhu õryok oduhu oyɨtɨ pork ye oyotiis Jesuspe. Ɨmeheeych uje Jesús yesh ɨka pork shish takashɨm õryok. 12Uje oyanɨmɨrãha Porrosht ahwoso ich shish sehe oduhu õryok oduhu oyɨtɨ, per erze Porrosht ɨbiyo uje oyiyokõr shuu olak ɨkɨrĩt de uje yelɨj nɨhna ɨre. 13Porrosht ahwoso tata shuu ɨtsorz ɨm: —Yeẽk de uje tatɨm Porrosht ɨm: “Ye tokotiis owape heke titɨm oso.”— Õryok ɨtspo ye oyotiis Porroshtpe heke oyitɨm oso 14pork oyɨraha uje Porrosht shuu eyok Ɨrhĩch Jesús ɨkponi. Heke oyɨraha uje wɨchɨ tyenɨj shuu eyok ɨkpo nehe pork ye oyotiis Jesuspe hn olak tyenɨj meylo õryok uje Jesús nos hnoy eyok seya eyok dahɨr nehe. 15Nos wɨr erze kuche mɨhnũwo tɨr õryok pork oyitɨm olak Cristo heke uje oso ma okɨhniya ochunt Porrosht ahwoso ich ma okɨhniya ode uje onɨna Porrosht hn oshuu ɨre dich. 16Heke ye oyuhu õryok dosdarakpe hn oyukwim Porrosht ɨr ɨbiyo. Eyok ukurbo saraãshi ɨre uje sɨhna ɨre uje yɨtĩ̵r par eyok ɨlaro per eyok aho kal deeych shɨ ɨtso uje ich ɨchɨrãha 17pork uje yuhu eyok eyuwo chishew erze uje ich ɨhĩ̵rtso uje yelɨj nɨhna ɨre uje de Porrosht ahɨr ich ye yuunape erze kuche mɨhnũwo uje tĩ̵r eyok uje ehn eyok de nãhu ĩ̵rmo. 18Heke ye yuhu eyok eyuwo tɨsĩ̵r erze uje de nãhu ĩ̵rmo. Wɨr tyenɨj sɨhna ɨre. Shɨ yuhu eyok eyuwo tɨsĩ̵r erze uje yahpaa yomope uje de poõrc. Wɨr yelɨj nɨhna ɨre.

will be added

X\