2 CORINTIOS 3

1Uje oyitɨm olak õryok ɨbiyo oyuhu ɨtsorzɨke ¿je yesh õryok narim oryõk? Ye õryok narim oryõkpe. Ye nesitpe uje oyosɨm olak hutɨta uje tata yeniipo õryok hn õryok ɨbiyo latɨkpo uje oyiyokõr shɨ ɨtso uje yewo oshɨm olak. Ye nesitpe oyapur olak par uje atsɨlo asa hutɨta uje tata yeniipo õryok par uje oyosɨm yewo. 2Olak ɨluu ich ahle pork amsahaloni par uje olak Porrosht aabo. Erze olak ɨluu ahle ich shɨ ɨtso hutɨta uje tata yeniipo õryok pork olak ɨluu ahle chɨbɨte orhõta yeniipo õryok. Nos ochɨraha olak uje olak ɨluu kɨnẽhe. 3Ich ɨmeheeych uje ye otiislo Cristope. Erze olak ɨluu uje ich ahle ich shɨ ɨtso hutɨta uje Cristo chichew hn ɨshɨm õryok par uje nos ochɨraha yeniipo õryok. Wɨchɨ ye dichew dɨbɨte hutɨtape. Porrosht wɨchɨ ɨka hn chɨbɨte Dechɨbich olak aho shɨ ɨtso uje chichew hn chɨbɨte olak aho. Ye dichew dɨbɨte duhu ɨlo uje chichew chɨbɨte ese kojach uje ɨshɨm Moiseskite. 4Oyɨraha uje Porrosht chiihla õryok par oyiyokõr ɨr ɨbiyo pork Cristo takashɨm õryok. 5Ye oryõkpe uje oyuhu olak ɨluu ahle par uje õryok narim õryok. Shɨ Porrosht wɨchɨ uje takashɨm õryok par uje shuu olak ɨluu ahle. 6Wɨchɨ takashɨm õryok par uje oyanɨmɨrãha ɨr ahwoso ahlo uje chɨbɨtni. Wɨr ye ɨlo asa ɨr ley uje chichewkite chɨbɨte kojano po per chɨbɨte Dechɨbich olak aho shɨ ɨtso uje chichew chɨbɨte olak aho. Asa ɨr ley shuu ɨmeheeych uje oso oshiyokõr uje ich mɨhnũwo heke tyenɨj shuu otoy per ɨr Ɨchɨbich ɨshɨm olak ɨkɨrĩt uje yelɨj nɨhna ɨre. 7Uje Porrosht chichew asa leykite chɨbɨte erze kojano po hn ɨshɨm Moisés par erze israel oso ich shuu Moisés ɨle hũre heke ye wɨr õr pwele uje oteychɨm Moisespe pork ich ɨr ɨle hũrpa shuu õr ɨle pata, per shɨ sɨhna ɨre saraãshi nehech ye ɨr ɨle hũrpe. 8Ich ma ɨhĩ̵rtpa ese Porrosht Ɨchɨbich ɨr ɨbiyo ahlo je uje ɨshɨm Moiseskite. 9Ich om uje chɨbɨte erze ley uje shuu oso otoy per ich ma om ese uje shuu õr ɨkɨrĩt de uje yelɨj nɨhna ɨre. 10Asa ley waa je Porrosht ɨshɨm Moiseskite ich om per Cristo ɨr ahwoso ich ma om heke shuu asa ley tokole shɨ ɨtso uje ye latɨkɨsh. 11Uje Moisés tõhwa erze ley ich ɨr ɨle hũrpa per shɨ daalo arhaabo hn erze uje hũre ich sɨhna ɨrpo, per uje Porrosht shuu Dechɨbich masaha eyok aho ich ma om pork shish eyok ɨkɨrĩt de Porrosht ahɨr. 12Yɨrahalo uje eyok ɨkɨrĩt shish de Porrosht ahɨr heke ye yɨtɨlape uje yanɨmɨrãha ɨr ahwoso. 13Eyok ɨbiyo shish bale. Ye yakɨslope uje yiyokõrlo yuhu eyok ɨlo Moisés uje shiyeru delekite chĩ̵ra shekɨpɨt par uje ye erze israel oso oteychɨm ɨle uje ich hũrpa nehech sɨhna ɨrehe ɨle. 14Õr ɨre ye onahmũrpe uje otẽr Moisés par uje ochɨraha. Ele ahle ich shish israel oso õr ɨtsye. Uje õr ler Porrosht ahwoso ich ye odɨrehepe uje tata. Shɨ ɨtso ese shekɨpɨt uje Moisés shiyeru delekite wɨchɨ sentii õr ɨle, heke ye odɨrehepe. Ye õr pwele odɨrehepe per uje ye olotiis Cristo ich ochɨraha. Wɨchɨ shɨ ɨtso uje chiyuhu ese shekɨpɨt uje sentii õr ɨle. 15Nehech ele ahle uje õr ler erze hute uje Moisés chichewkite ich shɨ ɨtso uje ese shekɨpɨt shiyeru õr ɨle par uje ye odɨrehepe. 16Per uje yeẽk ye lotiis eyok Ɨrhĩch ich shɨ ɨtso uje chiyuhu ese shekɨpɨt uje sentii ɨr ɨle. 17Eyok Ɨrhĩch wɨchɨ shɨ ɨchɨbich heke kɨmɨjɨ eyok Ɨrhĩch ɨr Ɨchɨbich chɨhɨ yeẽk ehet ich ye erze ley uje Moisés chichewkite tɨbey ɨrpe. 18Nos wɨr eyok uje eyok Porrosht aabo ich ye ese uje ɨtso shekɨpɨt nentii eyok ɨlepe. Eyok shɨ eyok ɨtso pejta uje shuu oso oteychɨm Cristo ɨr ɨluu. Uje yeẽk teychɨm eyok ɨluu ich chɨraha eyok Ɨrhĩch ɨr ɨluu pork eyok ɨluu ɨler tokole saraãshi ɨre hn ele ahle masaha uje ich shɨ ɨtso Cristo ɨr ɨluu. Eyok Ɨrhĩch wɨchɨ uje shuu eyok ɨluu kɨnẽhe pork wɨchɨ shɨ ɨchɨbich.

will be added

X\