2 CORINTIOS 2

1Tɨbɨte uje tekɨrɨhɨ olakpo ich ye tahmũrpe uje tuu olak dosdarak. 2Kɨmɨjɨ tuu olak dosdarak ¿ich yeniipo uje oshuu yok ayla? Shɨ olak per kɨmɨjɨ tuu olak dosdarak ich ye olak pwele uje uhulo yok ayla. 3Heke tichew asa hutɨtani hn tokosɨm olak par uje tekɨrɨhɨ olak nehe hn ye uhulo yok dosdarak pork shɨ olak uje uhulo yok ayla heke ich nos olak ayla shɨ olak ɨtso yok. 4Uje tichew asa hutɨtani hn tokosɨm olak ich yok dosdarakpa. Tukuuna nehech tɨkiyerh pork ye tahmũr petɨkni uje tichew titɨm olak par uje tuu olak dosdarak. Tichew asa hutɨta par uje tuu erahalo uje ich tahmũr pɨshɨ olak. 5Titɨm olak. Kɨmɨjɨ yeẽk duhu yewo õr dosdarakni ich shuu yok dosdarak, hn nos wɨr olak toy. 6Olak kɨhniya uje eyuhulo ese hnakɨrbich iglesya ehet pork shiyokõr uje ich mɨhnĩ̵kni. Ele ahle ich iim erze mɨhnũwo heke uhulo olak aho kɨɨsɨhɨ ɨrpo. 7Ele ahle ich tyenɨj olak perdonar hn akashɨmlo ɨre par uje ye wɨchɨ dosdarakpa. 8Heke titɨm olak par uje uhulo ɨmeheeych uje ahmũrlo ɨre. 9Heke tichew asa hutɨtani hn tokosɨm olak par uje tɨkɨraha kɨmɨjɨ nos ahakõrlo uje titɨm olak. 10Uje olak perdonar yeẽk ich yok perdonar ɨre toy. Kɨmɨjɨ yok perdonar yeẽkni ich yok perdonar ɨre hn Cristo chɨraha uje ich ũru uje yok perdonar wɨchɨ par uje tuu olak aho kɨɨs. 11Yok perdonar ɨre par uje ye Satanás derz eyok yeẽk. Nos yɨraha wɨr kuche uje Satanás shiyokõr pork sehe nehnyẽr eyok. 12Sehe titɨm olak. Uje takaachĩ̵hɨ ese dɨt Troasni ich tanɨmɨrãha Porrosht ahwoso titɨm õr uje Cristo ɨshɨ õr hnɨtewɨhɨ Porrosht ahɨrkite. Eyok Ɨrhĩch takashɨm yok heke ich okɨhniya uje sehe otẽr ɨr ahwoso 13per ye pehet kɨɨspe pork ye tish pɨshɨbich Titope. Heke tokoym uje takɨt õr hn titɨm õr uje ich takaha hn tɨtĩ̵r hnɨmich Macedonia. 14Titɨm olak uje ich tɨkɨnshɨp Porrosht pork shish shuu Cristo serz Satanás hn eyok yukwiĩya Cristo. Porrosht ɨshɨm eyok par uje yanɨmɨrãha ɨr ahwoso yitɨm erze oso uje ode lekɨtiyo uje Cristo ɨshɨ õr hnɨtewɨhɨ Porrosht ahɨr. Erze ahwoso ich shɨ ɨtso uje aat tokole chish lekɨtiyo. 15Par Porrosht ich erze ahwoso uje yitɨm õr Cristo ich shɨ ɨtso aat ehmuuj. Erze uje sehe omasaha par Porrosht aabo hn erze uje omasahani ochunt ese aat. Erze uje otĩ̵r urhuta bahluta ehet nehe ochunt toy. 16Par erze uje otĩ̵r urhuta bahluta ehet nehe ese aat ich shɨ ɨtso topo õr aat, per par erze uje õr ɨkɨrĩt de Porrosht ahɨr ese aat ich aat ehmuuj. ¿Yeẽk pwele shiyokõr erze obiyo par otatɨm õr Cristo? Shɨ ese uje Porrosht takashɨm ɨre. 17Õryok uje oyanɨmɨrãha Porrosht ahwoso ich ye õryok ɨlo erze yewope uje otsanɨmɨrãha shɨ par uje otserz hnote. Porrosht ɨshɨm õryok erze obiyo par uje oyanɨmɨrãha ɨr ahwoso. Ich ye õryok aho yũhɨrshpe. Oyitɨm õr Cristo Porrosht ɨle ɨkɨch.

will be added

X\