2 CORINTIOS 11

1Sehe tuu hap enthɨlo yok uje titɨm olak. Shɨ yok ɨtso totihlo uje titɨm olak. Hap enthɨlo yok. 2Ich yok ajɨrmɨk pork tarhãk olak, hn uje yok ajɨrmɨk shɨ tãra Porrosht. Yok tuu amsahaloni par Porrosht aabo heke shɨ olak ɨtso tɨmcharrza phãrrza pork ye ahakõrlope uje mĩ̵hnɨk hn tokosɨm olak hnakɨrbich nohmet shɨ ɨtso olak abich. Wɨchɨ hnakɨrbich Cristo. 3Ese echeẽt uje sehnyẽr Evakite ich eykdeyo. Tɨkɨtɨla uje shɨ ɨtso uje ɨre sehnyẽr Evakite ich yeẽk sehnyẽr olak nehe shuu olak eyuwo kɨnãho par uje ye eeychãhalo pɨshɨ Cristo. 4Kɨmɨjɨ yeẽk taachĩ̵hɨ olak ahɨr hn sanɨmɨrãha Jesús tatɨm olak per shuu kɨnaha ye ɨlo uje oyitɨm olak petɨkni, o kɨmɨjɨ nanɨmɨrãha tatɨm olak ɨchɨbich kɨnaha ye ɨlo uu Porrosht Ɨchɨbichpe uje masaha olak ahoni ich ahmũrlo õr ahwoso, o kɨmɨjɨ tatɨm olak kuchẽrk uje kɨnaha uje ɨshɨ olak hnɨtewɨhɨ Porrosht ahɨr ye ɨlope uje oyitɨm olak uje Cristo ɨshɨ olak hnɨtewɨhɨ Porrosht ahɨrkite heke ich ahmũrlo õr. 5Erze uje otsehnyẽr olak ich ochii ɨr apostolehe hn ochɨbɨte uje õr ma dɨtuwo je yok. Per ye tɨbɨtpe uje õr ɨre ma dɨtuwo je yok. 6Kɨmɨjɨ ye tɨkɨrahapa uje tiipuhut per ich ma tɨkɨraha Porrosht ahwoso. Ich nos oyuhu ɨmeheeychɨhɨ olak ɨkɨch uje oyɨraha Porrosht ɨr ɨluu. 7Tanɨmɨrãha Porrosht ahwoso titɨm olak uje Jesús ɨshɨ olak hnɨtewɨhɨ Porrosht ahɨrkite heke amsahaloni par olak Porrosht aabo. Ye tapur olak kuchepe par uje tuu asɨmlo yok. Shɨ tishew obiyo par uje tɨkiya uje nihyokĩ̵hɨ pahɨr. ¿Je tiyokõr mĩ̵hnɨk uje tishew obiyo tuu ɨtsorz? 8Erze Porrosht aabo yewo uje oshɨm yok ɨr hnote par tanɨmɨrãha Porrosht ahwoso titɨm olak ich shɨ ɨtso uje tokorha õr hnote per ye tokorhape. 9Uje yok de olak ahɨrni hn yok nesita kuche ich ye tɨrok olakpe par uje tuu akashɨmlo yok. Shɨ Porrosht aabo uje otãra wahacha hnɨmich Macedonia otekɨrɨhɨ yok wɨr uje oshɨm yok uje yok nesita. Heke ye tɨrok olak petɨkni par uje tuu asɨmlo yok kuche uje nihyokĩ̵hɨ pahɨr hnii ele ahle ich ye tapur olak par asɨmlo yok uje yok nesita hnii pɨkaap. 10Tɨkɨraha uje Cristo ɨr ahwoso ich ũru uje tanɨmɨrãha, hn ich ũru toy uje ye latɨk pwele sontew yok par uje ye titɨm orĩ̵hɨ wahacha hnɨmich Acaya uje olak de uje Cristo ɨshɨ õr hnɨtewɨhɨ Porrosht ahɨrkite. 11¿Ɨnaapo heke tiipuhut tuu ɨtsorz? ¿Je tiipuhut tuu ɨtsorz pork ye tahmũr olakpe? Porrosht chɨraha uje tahmũr olak. 12Shish tanɨmɨrãha Porrosht ahwoso hn ye tokoympe. Shish tanɨmɨrãha par uje tuu ɨmeheeych uje shɨ õr ukushiĩ uje onarim ɨre hn otata uje õr ɨbiyo ɨtso pɨbiyo. 13Erze hnakɨrbo wɨr ye õr apostolpe. Shɨ sehe onehnyẽr oso odii ɨr Cristo apostolehe per ye Cristo ɨr apostolpe. 14Heke ye as olak ɨbe pork wɨr oshiyokõr oshuu ɨre ɨtso Satanás pork Satanás chii ɨre Porrosht anjelehe. 15Heke ye erahaklo. Erze uje õr Satanás ɨbiyo oshiyokõr ɨtso ɨre hn ochii ɨr Porrosht ɨbiyoho. Õr ɨbiyo ich mɨhnũwo heke tyenɨj mĩ̵hnɨk tĩ̵r õr nehe. 16Titɨm olakpo. Ye ompe uje yeẽk chɨbɨte uje yok totihla. Per kɨmɨjɨ eylo yok totihlaha ich shɨ titɨm olak par uje enthɨlo yok uje yok narim yok pɨkaap. 17Erze uje tyenɨj titɨm olak ye Porrosht tatɨm yokpe. Uje titɨm olak ich shɨ yok narim yok ɨtso uje yok totihla. 18Ich okɨhniya uje onarim ɨre otata uje oshiyokorĩ̵hɨ kuche nãhu ĩ̵rmo heke yok narim yok toy. 19Olak ebɨtlo uje ich olak eykdeyo per ahmũrlo ẽrlo wɨr õr ahwoso erze uje õr totihlo uje õr ahwoso ye ompe. 20Ich uhu olak ɨtso totihlo pork uje wɨr ochii olak deloho, o kɨmɨjɨ ohnoy olak kuche, o kɨmɨjɨ onehnyẽr olak, o kɨmɨjɨ onarim ɨre, o kɨmɨjɨ oniyokõr mɨhnɨkĩ̵hɨ olak ich shish olak ewenta heke uhu olak ɨtso totihlo toy. 21Kɨmɨjɨ tiyokõr tuu yok ɨlo erze uje shɨ otsehnyẽr olak ich tɨkɨpookpa. Ich shɨ ɨtso uje ye õryok ukũrbɨrsh par oyiyokõr oyuhu õryok ɨtso õr. Per erze uje otsehnyẽr olak ich otsahmũr uje onarim ɨre heke yok narim yok toy. Uje yok narim yok ich shɨ yok ɨtso totihla. 22Erze uje otsehnyẽr olak ¿je wɨr hebreo yewo? Ich yok ɨtspo. ¿Je wɨr israel yewo? Yok ɨtspo. ¿Je wɨr otãra ɨr porokkite Abraham? Yok ɨtspo. 23¿Je wɨr Cristo ɨbiyo? Yok Cristo ɨr ɨbɨk uje tiyokõr ma obiyo je õr ɨre. Uje titɨm olak tuu ɨtsorz ich shɨ ɨtso uje yok totihla. Yok ma tiyokõr obiyo je õr ɨre, hn ma ochɨmchaha yok karsel ehet je õr ɨre, hn ich ma otsepyẽr yok je õr ɨre, hn shish kuche mɨhnũwo tĩ̵r yok par uje sehe duhu tɨkɨtɨ per ye tɨkɨtpe. 24Ich sinko bese uje israel oso ochishew yok hn oshuu yok ochĩ̵ra yok shɨkote oshuu otɨskẽr nehech treynta y nueve bese, 25hn tre bese uje ochishew yok oshuu yok ochĩ̵ra yok phich, hn deeych yet oshuu yok ochĩ̵ra yok kojano po par uje oshuu tɨkɨtɨ, hn ich pohɨr tre uje tokonãha hn kara hn yaka. Dɨhlich sohmɨra hn deeych sohmɨra uje yok dechɨ onoota bahluta ehet pork pohorrza yaka. 26Shish takaha tɨtĩ̵r lekɨtiyo, hn ich yarhak uje tɨkãha onoota waa je uushɨ, hn ich yarhak uje echɨko ochishew yokɨhɨ dehet pehet, hn ich yarhak pork sehe pɨhnapso israel oso oduhu yok, hn ich yarhak toy uje sehe dihipo kɨnãho oduhu yok, hn ich yarhak uje yeẽk shuu yokɨhɨ dɨt pehet, hn ich yarhak uje yeẽk shuu yokɨhɨ hnɨmich uje ɨsa, hn ich yarhak toy uje yok hmartɨhɨ onoota bahluta ehet, hn ich yarhak uje erze uje ochii ɨr Porrosht aaboho sehe oduhu yok. 27Shish tishew obiyo ich kɨhniya nehech tɨrmtsɨr, hn ich dɨhle kɨhniya uje ye yok pwele tukumpe, hn daalo de uje piyuwo sẽhi yok hn piich sẽhi yok toy pork nĩhyok ye pobɨsĩ̵rsh, hn hmemɨt sẽhi yok toy, hn nĩhyok pɨshuwo uje ich om. 28Kuche mɨhnũwo yewo tĩ̵r yok toy. Ye shɨ erzepe per kal deeych ich nos wɨr kuche mɨhnũwo uje tĩ̵r Porrosht aabo lekɨtiyo ich tukuuna toy. 29Uje kuche mɨhnũwo tĩ̵r Porrosht aabo yeẽk hn chuuna uje ye pwele ewentpe ich yok ɨtspo tukuuna uje mɨhnũwo tĩ̵r ɨre. Kɨmɨjɨ yeẽk duhu yet niyokõr uje mĩ̵hnɨk ich tiis puulo par ese uje shuu eyok leshɨbich shiyokõr uje mĩ̵hnɨk. 30Erze uje otsehnyẽr olak ich oshuu yok narim yok heke tyenɨj titɨm olak kuche par tuu ɨmeheeych uje yok ye pukũrbɨrsh. 31Porrosht uu eyok Ɨrhĩch Jesucristo ɨr Deych wɨchɨ uje shish nos yeeychãhalo. Wɨchɨ chɨraha uje ye tiita pukushiĩpe. 32Uje yok dechɨ dɨt Damasconi hn ese rey Aretas ɨr gobernador uje dechɨ shuu ohyerptoso oyehe ese moraylt uhur uje de lekɨtiyo uje chɨpeẽsa dɨt par uje ochishew yok, 33per ode uje ochɨmchaha yok kanasta ehet hn oshuu tɨkãha mɨntanta waa je de moraylt hn ochɨrmas yokɨhɨchɨs pɨt heke tɨkɨtokolɨhɨ wɨchɨ gobernador hme.

will be added

X\