2 CORINTIOS 10

1Yok Pablo. Sehe titɨm olak kuchẽrk. Erahalo uje Cristo ɨle om heke shish shiyokõr uje ich om. Ode uje otata uje yok de olak ahɨr ich tɨkɨtɨloho uje titɨm olak per uje yok de dukuhla ich tobɨter olak. 2Uje takaha tɨtĩ̵r olak nehe ich ye ahakõrlo mɨhnũwo uhulo tobɨter olak. Tɨkɨraha uje olak yewo ode. Otata uje tiyokõr ɨtso erze ĩ̵rmo oso oshiyokõr. Wɨr uje tyenɨj tobɨter õr nehe. 3Ich ũru uje yebuhulo nãhu ĩ̵rmo per eyok ɨmãho kɨnãho, ye ɨlo erze ĩ̵rmo oso õr ɨmãhope. 4Erze kuche uje ĩ̵rmo oso ochĩ̵rye par oteye wɨr ye jukur par eyok. Shɨ Porrosht ukurbo de par uje yĩ̵rlo eyok ɨmãho heke pwele yɨhna erze uje sehe onontew Porrosht ahwoso. 5Uje yitɨm oso Porrosht ahwoso hn oshiyokos eyok ich yɨnta õr yɨkitkẽr õr nehech õr aho kɨɨs hn ye yuhu jukur erze õr ahwoso uje otata uje sontew õr ye duhu odɨraha Porroshtpe, hn yuhu õr eyuwo tɨsĩ̵r erze uje ich om par uje oshiyokõr uje Cristo sahmũr. 6Uje nos ahakõrlo uje Cristo sahmũr ich oyɨmɨt õryok par uje oyobɨter erze Porrosht aabo yewo uje ode olak ahɨr uje yesh oshiyokõr uje ich mɨhnũwo. 7Olak shɨ eychɨmlo oso õr eeyo hn ebɨtlo uje õr ɨluu ich om. Kɨmɨjɨ yeẽk dɨbɨte uje ich ũru uje ye lotiis Cristope ich tyenɨj chɨraha uje õryok ɨtspo, ye oyotiispe ɨtso ɨre. 8Eyok Ɨrhĩch ɨshɨm õryok ukurbo par uje oyakashɨm olak oyuhu olak ɨluu ma ɨtso Cristo ɨr ɨluu. Ye dosɨm õryok ukurbo par uje oyiyokõr mɨhnɨkĩ̵hɨ olakpe. Kɨmɨjɨ yok narim yok tuu iyuwe pɨkaap ich ye tiyokõr mɨhnĩ̵kpe pork ɨshɨm õryok erze ukurbo. Nĩhyok yeẽk pwele tata uje tehnyẽr olak hn shuu tɨkɨpook. 9Uje tichew erze hute hn tokosɨm olak ich ye tahmũrpe uje tuu as olak ɨbe 10pork yewo otata otsɨɨ: —Pablo ɨr ahwoso ich ɨhnpa uje chichew chɨbɨte hute mahn uje wɨchɨ de olak ahɨr ich ɨr ahwoso ye ɨhnpe. Uje chiilehet ich shɨ ɨtso uje ye ɨr ukũrbɨrsh.— 11Erze uje otata oshuu ɨtsorz ich sehe tuu odɨraha erze pahwoso uje tichew tɨbɨte erze hute ich shɨ ɨtso uje yok de olak ahɨr hn titɨm olak. 12Õryok ye õryok narim oryõkpe oyuhu ɨlo erze yewo uje shɨ onarim ɨre pork uje wɨr oteychɨm yewo õr ɨbiyo par uje ochɨraha kɨmɨjɨ õr ɨbiyo ich ma om je erze yewo õr ɨbiyo ich oshiyokõr ɨtso uje ye õr eyuwĩ̵rsh. Kɨmɨjɨ oteychɨm yewo par ochɨraha kɨmɨjɨ õr ɨluu ich ma om je erze yewo õr ɨluu ich oshiyokõr ɨtso uje ye õr eyuwĩ̵rsh. 13Mahn õryok ye õryok narim oryõkpe oyuhu sowe erze uje Porrosht chɨbɨte par uje oyiyokõr ɨr ɨbiyo. Porrosht ɨshɨm õryok par uje oyanɨmɨrãha ɨr ahwoso nehech oyaachĩ̵hɨ ese dɨt Corinto uje olak de. 14Heke ye oyiyuwepe uje Porrosht ɨshɨm õryok par oyiyokõr uje oyaachĩ̵hɨ olak ahɨrni. Õryok webich oso uje oyãra dukuhla nehech oyaachĩ̵hɨ olak ahɨr par oyitɨm olak uje Cristo ɨshɨ olak hnɨtewɨhɨ Porrosht ahɨrkite. 15Ye õryok narim oryõkpe erze obiyo uje yewo oshiyokõr pork wɨr ye õryok ɨbiyope, per shish sehe oyuhu olak ma ye otiislo Cristo par uje õryok pwele oyuko oyɨtĩ̵r ma dukuhla. 16Sehe oyɨtĩ̵r erze hnɨmo uje de olak pɨt hn oyanɨmɨrãha Porrosht ahwoso oyitɨm oso uje Cristo ɨshɨ õr hnɨtewɨhɨ Porrosht ahɨrkite hn ye õryok narim oryõkpe erze obiyo uje yewo oshiyokõrni. 17Uje yeẽk sehe narim ɨre ich ma om tyenɨj narim eyok Ɨrhĩch. 18Kɨmɨjɨ hnakɨrbich narim ɨre ich ye jukur per kɨmɨjɨ eyok Ɨrhĩch narim wɨchɨ ich om.

will be added

X\