2 CORINTIOS 1

1Yok Pablo. Porrosht chiihla yok shuu tomsaha par Jesucristo ɨr apóstol. Eyok leshɨbich Timoteo de pahɨr. Oyichew ana hutɨta par oyosɨm erze Porrosht aabo uje otakɨsho lawichɨhɨ wahacha dɨt Corinto uje dechɨ hnɨmich Acaya hn par nos wɨr Porrosht aabo yewo uje ode lekɨtiyo wahacha hnɨmich Acaya. 2Sehe tuu eyok Deych Porrosht hn eyok Ɨrhĩch Jesucristo odosɨr olak hn oduhu olak aho kɨɨs. 3Titɨm olak uje oyeeychãha Porrosht uu eyok Ɨrhĩch Jesucristo ɨr Deych. Ɨr Deych wɨchɨ uje chuuna uje oso õr losuhlaabo hn takashɨm õr hn shuu õr aho kɨɨs. 4Uje nos wɨr kuche mɨhnũwo tĩ̵r õryok ich Porrosht shuu õryok aho kɨɨs par uje õryok pwele oyuhu wɨr õr aho kɨɨs toy erze uje kuche mɨhnũwo tĩ̵r õr. Heke õryok pwele oyuhu õr aho kɨɨs shɨ ɨtso uje Porrosht shuu õryok aho kɨɨs. 5Uje kuche mɨhnũwo kɨhniya tĩ̵r õryok shɨ ɨtso uje tĩ̵r Cristoni ich Cristo shuu õryok aho kɨɨs pork ye oyotiis ɨrpe. 6Uje kuche mɨhnũwo tĩ̵r õryok ich shɨ tĩ̵r õryok pork oyanɨmɨrãha Porrosht ahwoso oyitɨm olak, heke oyuhu amsahalo par ɨr aabo hn oyuhu olak aho kɨɨs. Uje Porrosht shuu õryok aho kɨɨs ich shuu olak aho kɨɨs toy par uje olak ewenta erze kuche mɨhnũwo uje tĩ̵r olak shɨ ɨtso uje tĩ̵r õryok. 7Oyɨraha uje erze kuche mɨhnũwo sehe duhu moymlo Cristo per ye moymlope pork oyɨraha uje erze kuche mɨhnũwo uje tĩ̵r olak wɨr shish tĩ̵r õryok toy heke Porrosht tyenɨj shuu olak aho kɨɨs shɨ ɨtso uje shuu õryok aho kɨɨs. 8Pɨshɨbo watsaklo, tahmũr uje erahalo erze kuche mɨhnũwo uje tĩ̵r oryõkni uje õryok dechɨ hnɨmich Asia. Erze kuche mɨhnũwo uje oshiyokorĩ̵hɨ õryok ich dospa nehech ye õryok pwele õryok ewentpe. Shuu õryok eyuwo tɨsĩ̵r uje tyenɨj oyɨtɨ. 9Oyuuna shɨ ɨtso uje jwe tatɨm õryok par uje shuu oshuu õryok oshuu oyɨtɨ. Erze mɨhnũwo tĩ̵r õryok par uje oyɨraha uje ye õryok ukũrbɨrsh par uje oyitokolɨhɨ erze kuche mɨhnũwo. Shɨ tyenɨj oyiyem Porrosht par uje wɨchɨ takashɨm õryok pork wɨchɨ ɨr ukurbo de. Wɨchɨ uje shuu topo õr ɨkpo. 10Porrosht chiyuhu oryokĩ̵hɨ erze uje ich mɨhnũwo pisho uje sehe duhu õryok duhu oyɨtɨni, heke oyɨraha uje wɨchɨ tyenɨj chiyuhu oryokĩ̵hɨ erze kuche mɨhnũwo uje tĩ̵r õryok toy nehe. 11Olak tyenɨj olak orar apurlo Porrosht par uje takashɨm õryok. Heke okɨhniya tyenɨj onɨna Porrosht nehe uje takashɨm õryok pork olak orar toy ɨtso õr uje õr orar otsapur Porrosht par õryok. 12Sehe titɨm olak uje õryok aho kɨɨs pork ye oyiyokõr mɨhnuwõho osope, hn yelɨj oyehnyẽr olak. Shɨ oyiyokõr uje Porrosht sahmũr. Ye õryok aho yũhɨrshpe uje oyakashɨm olak hn ye shɨ tãra õryok eyuwope ɨlo uu ĩ̵rmo oso uje otsakɨt yewo. Porrosht wɨchɨ uje takashɨm õryok. 13Nos wɨr hute uje oyichew hn oyosɨm olak wɨr par uje olak ler hn erahalo uje tata. Sehe tuu nos erahalpa uje titɨm olak 14pork olak yẽrɨj erahalo. Heke uje eyok Ɨrhĩch Jesús cheeshpo nehe ich olak aylpa hn ahmũrlo uje oyitɨm olakni ɨtso uje õryok aylpa uje olak dechɨ eyok Ɨrhĩch Jesús ahɨr toy. 15Tɨkɨraha uje ahmũrlo yok ɨtsorz heke sehe takaha tekɨrɨhɨ olak tuu do bese. 16Tuu peyuwo tɨsĩ̵r uje sehe tekɨrɨhɨ olak wap uje takaha tɨtĩ̵r hnɨmich Macedonia hn sehe tɨtĩ̵r olakpo uje tɨkɨtokolɨhɨ Macedonia. Uje tɨkɨtokolɨhɨ olak ahɨr nehe ich sehe tuu akashɨmlo yok uje tɨtĩ̵r hnɨmich Judea. 17¿Je yok kushĩyak uje sehe tiyokõr tuu ɨlorz? ¿Je olak eyuwo tɨsĩ̵r uje yok ɨtso erze ĩ̵rmo oso uje otata otsɨɨ: —Ẽhe— per ye oniyokõrpe uje otata? 18Ich ũru uje Porrosht shish shuu lahwoso yakaha hn ich ũru toy uje erze ahwoso uje oyitɨm olak ye oyuhu ɨlorzpe: —Ẽhe— hn oyehnyẽr olak. 19Yok hn Silvano hn Timoteo oyitɨm olak Jesucristo uu Porrosht Ijɨt. Oyitɨm olak uje ich ũru heke tyenɨj yakaha. Ye oyehnyẽr olakpe. Shish yakaha uje Jesús tata. 20Nos wɨr ahwoso uje Porrosht chɨbɨtkite ich Jesús shuu yakaha. Heke ich oyahmũr uje Cristo shiyokõr hn oyiita uje yehe wɨchɨ. Uje oyiita oyuhu ɨtsorz ich oyuhu Porrosht ich dich. 21Porrosht wɨchɨ uje takashɨm õryok hn takashɨm olak par uje ma ye yotiislo Cristo. Porrosht wɨchɨ uje chiihla õryok par uje oyiyokõr ɨr ɨbiyo. 22Wɨchɨ chɨbɨte eyok yarta pork wɨchɨ uu eyok yɨnsɨrc. Ɨr yarta wɨchɨ uu ɨr Ɨchɨbich uje chɨbɨte eyok aho, heke ich ũru uje eyok owich de Porrosht ahɨr. 23Porrosht chɨraha uje ye tɨtĩ̵r olakɨhɨ wahacha Corinto petɨkni shɨ pork ye tahmũrpe uje tyenɨj titɨm olak pahwoso uje ich ɨhne. 24Ye oyɨrok olakpe oyuhu ye otiislo Cristo. Shɨ sehe oyakashɨm olak oyuhu olak ma ayla hn ye olak koswãha eyok Ɨrhĩch.

will be added

X\