1 TIMOTEO 6

1Titɨm owa. Erze Porrosht aabo uje õr yɨlo tyenɨj otola nensɨro par uje ye wɨr oso oninehnɨm Porrosht hn par uje ye oninehnɨm erze ahwoso uje yiyokorãha õr. 2Uje õr yɨnsɨro ode uje wɨr Porrosht aabo toy ye ompe uje ye otola õr shɨ pork wɨr Porrosht aabo toy. Tyenɨj otola õr ma. Ich ma om uje oshiyokõr õr ɨbiyo ich oshuu ɨhĩ̵rtso pork wɨr õr leshɨbo. Porrosht sahmũr õr toy. Ahnũwo pahwoso uje tichew titɨm owaka wɨr uje tyenɨj ahakorãha õr hn uhu oshiyokõr. 3Titɨm owa uje yeẽk chɨhɨ uje sanɨmɨrãha ahwoso uje ye ũrpe, hn ye nahmũrpe erze ahwoso uje eyok Ɨrhĩch Jesucristo shiyokorãha oso uje shuu oso oshiyokõr uje Porrosht sahmũr. 4Wɨchɨ shɨ sehe duhu ɨre ma dich je erze leshɨbo. Ye dɨraha latɨk. Wɨchɨ shɨ sahmũr uje shiyokos oso. Ɨr ahwoso shɨ shuu oso opota ɨre, hn shish shuu oso oshiyokosye, hn ochinehnɨmye, hn shuu õr pyensa uje erze yewo oshiyokõr uje mɨhnũwo. 5Erze hnakɨrbo uje otsanɨmɨrãha ahwoso uje ye ũrpe hn erze hnakɨrbo uje õr eyuwo mɨhnũwo shish oteye hn ochɨkey uje Porrosht ahwoso ich ũru. Wɨr õr eyuwo pyensa uje oteeychãha Porrosht shɨ par uje otserz hnote. 6Ich ũru. Erze uje oteeychãha Porrosht hn ich õr aho kɨɨs ich ma om par õr ɨre. 7Uje eyok shurẽhe nãhu ɨrmõni ɨchii ye kuche chɨhɨ eyok ahɨrpe, hn uje yɨtɨ ich ye eyok pwele yukwii eyok kushjãrope. 8Kɨmɨjɨ eyok poso de uje yahu hn eyok ɨshuwo de uje par yonãha ich om. Yuhu eyok aho kɨɨs. 9Erze uje sehe oduhu ɨre ɨhĩ̵r deyo ich shish kuche kɨhniya tĩ̵r õr par uje sehe duhu oniyokõr uje mɨhnũwo. Wɨr õr eyuwo shɨ ɨtso trampta uje dechɨ par chishew õr. Shuu oshiyokõr ɨtso uje ye õr eyuwĩ̵rsh. Shuu oshiyokõr erze uje ye ompe par õr ɨre. Ye duhu õr kushjãro jukur nehech uhurc erze mɨhnũwo uje oshiyokõr ich sɨhna õr ɨre. 10Shɨ otsɨhna ɨre pork nos wɨr oso uje opota hnote ich ochɨbɨte ɨre par uje oshiyokõr nos wɨr kuche mɨhnũwo. Oso ode uje opota hnote oshuu ɨtsorz nehech uhurc ich oym Porrosht hn ich õr dosdarakpa. 11Timoteo, owa shish eeychãha Porrosht. Aham nos wɨr kuche uje ich mɨhnũwo hn ahakõr uje Porrosht sahmũr. Eeychãha ɨre hn shish ye otiis ɨre. Ahmũr Porrosht aabo toy. Owa ewenta erze mɨhnũwo uje oso oshiyokorĩ̵hɨ owa. Ye uhu ehet duhlu. 12Uhu owa duurapo par ahakõr erze obiyo uje Porrosht ɨshɨm owa pork owa ye otiis Jesucristope. Porrosht chiihla owa par uje ɨshɨm owa ese ɨkɨrĩt uje yelɨj nɨhna ɨre. Abeyshɨp owa par uje ye moym ese ɨkɨrĩt. Uje atɨm erze oso erze ahwoso om uhu ɨtsorzni on: —Ye tokotiis Jesuspe,— heke ɨmeheeych uje Porrosht chiihla owani par uje ɨshɨm owa ese ɨkɨrĩt. 13Porrosht sahmũr uje titɨm owa uje wɨchɨ uje nos ɨshɨm kuche ɨkɨrĩt hn Jesucristo sahmũr toy uje titɨm owa. Wɨchɨ uje tata lahwoso omoho Poncio Pilato ɨle ɨkɨch. Titɨm owa par uje 14ahakõr erze uje tichew hn ye eymehiĩ par uje nĩhyok yet pwele tata uje ahakõr mĩ̵hnɨk nehech terɨhɨ uje eyok Ɨrhĩch Jesucristo cheeshpo nehe. 15Porrosht chɨbɨte Cristo ɨshɨrĩt par uje cheeshpo nehe. Porrosht wɨchɨ uje yeeychãhalo hn nĩhyok uje ɨtso ɨre. Wɨchɨ uje shuu õr aho kɨɨs. Wɨchɨ uu rey õr bahlut pisht hn wɨchɨ uu ɨrhẽ õr bahlut pisht. 16Wɨchɨ shɨ sohmɨra uje shish ɨka hn debuhu luu ehet. Nĩhyok yeẽk pwele tĩ̵r asa luu pork yokõrt jwertpa. Ye latɨk chɨhɨ uje umo ɨrni, hn ye latɨk pwele nomo ɨre. Sehe shish tuu oso otola ɨre hn oduhu ɨre dich. Ich om oshuu ɨtsorz. 17Titɨm owa par uje atɨm erze Porrosht aabo uje ode lɨka hnɨmich uje õr ɨhĩ̵r deyo par uje ye onarim ɨre. Hn ye ompe uje erze ɨhĩ̵r deyo õr aho otsɨɨ: —Õryok hnote de ich kɨhniya. Oyiyokõr uje oyahmũr. Ye nesit yeẽk takashɨm õryok.— Ye ompe uje onarim ɨre shɨ pork õr hnote de. Erze õr hnote ich pwele sɨhna ɨre shɨchish. Atɨm erze ɨhĩ̵r deyo uje ich ma om uje shɨ ye olotiis Porrosht. Wɨchɨ nos ɨshɨm eyok kuche ich kɨhniya par uje shuu eyok aho kɨɨs. 18Atɨm õr par uje shish oniyokõr uje om. Shish tyenɨj oniyokõr debiyo ich kɨhniya uje om par erze yewo. Ye ompe uje otsarhak lasujãro. Shish tyenɨj ochɨmɨt ɨre par uje otakashɨm õr uje kuche nihyokĩ̵hɨ õr ahɨr. 19Uje oniyokõr oduhu ɨlorz ich ɨtso uje ochɨhmer õr kushjãro wahacha Porrosht ahɨr ich kɨhniya par ese õr ɨkɨrĩt uje de Porrosht ahɨr uje ich ɨhĩ̵rtpa. 20Timoteo, tyenɨj ahakõr uhu om erze obiyo uje Porrosht ɨshɨm owa. Ye ẽr erze õr ahwoso uje ye jukur. Ye tãra Porroshtpe. Hn ye ẽr erze uje otsotiis Porrosht ahwoso hn otata oshuu kɨnaha. Wɨr ochɨbɨte uje ochɨrahapa uje ich ũru per ye odɨrehepe. 21Ode uje ye olotiis Porroshtpe per uje otẽr erze õr ahwoso kɨnãho ich otsahmũr, heke ich uhurc ich otsotiis Porrosht. Sehe tuu Porrosht dosɨr olak.

will be added

X\