1 TIMOTEO 5

1Titɨm owa par uje ye atsɨrãha ahwoso erze hnakɨrbo ɨlaro. Tyenɨj akɨt õr uhu ɨtso uje wɨchɨ eych hn akɨtpo erze hnakɨrbite uhu õr ɨlo uje eshɨbo. 2Tyenɨj akɨt erze tɨmcher ɨler toy uhu õr ɨtso ata, hn erze pɨkɨhnin apɨbite tyenɨj akɨt õr uhu õr ɨtso uje anɨme hn shɨ ahakõr uje om par uje ye wɨr oso õr eyuwo dishew uje sehe ahakõr uje mĩ̵hnɨk. 3Erze poluu uje ye õr iisĩ̵rsh ich tyenɨj Porrosht aabo otakashɨm õr 4per poluuta uje ɨr aabo ode o kɨmɨjɨ ɨr ahnɨmo ode wɨr tyenɨj ochɨraha uje Porrosht ahwoso tata uje tyenɨj otɨbey ɨre heke otɨbey ɨre pork wate takashɨm õrni. Porrosht sahmũr uje otakashɨm deyso oshuu ɨtsorz. 5Porrosht aabo tyenɨj otakashɨm asa poluuta uje nĩhyok ye latɨk chɨhɨ par uje takashɨm ɨre. Wate shish iyem Porrosht par uje takashɨm ɨre. Deeych hn dɨhlak wate shish orar sapur Porrosht. 6Per poluuta uje sahmũr õr ahmyo hn sahmũr hnakɨrbo yewo wate par Porrosht ich shɨ ɨtso uje toy. Nĩhyok ɨr ɨkɨrĩt Porrosht ahɨr. 7Atɨm Porrosht aabo par uje otɨbey erze poluu uje nĩhyok ye õr iisĩ̵rsh uhu ɨtsorz par uje nĩhyok yeẽk pwele tata uje õr ɨre oshiyokõr uje mɨhnũwo. 8Uje yeẽk chɨhɨ hn ye takashɨm deeysope uje ye odebuhu ahɨrpe ich ye niyokõrpe uje Porrosht ahwoso tata hn ich shiyokõr uje mĩ̵hnɨk. Kɨmɨjɨ ye tɨbey deeysope uje odebuhu ɨr ihyuch wɨchɨ shiyokõr uje ma mĩ̵hnɨk pork shish dechɨ õr ahɨr. Oshuu ɨmeheeych uje õr ɨre otsotiis Porrosht. Wɨr oshiyokõr ma mɨhnũwo je erze yewo uje ye odɨraha Porroshtpe. 9Ochichew erze poluu õr iiyo uje oyuwe sesenta ãyo per kal sohmɨra shɨ shuu dabiitɨ sohmɨra. 10Nos ochɨraha uje wate shish shiyokõrni uje om, hn nɨshiishɨp daabo, hn sahmũr uje oso otekɨrɨhɨ ɨre. Shish takashɨm Porrosht aabo, hn shish takashɨm erze uje mɨhnũwo tĩ̵r õrni, hn shish sɨnaha ɨre par uje nos shiyokõr kuche uje om. 11Ye atsew ebɨte hutɨta erze poluu õr iiyo uje yahpaa oterɨhɨ sesenta ãyope. Wap wɨr ochɨbɨte lahwoso uje tyenɨj oshiyokõr Cristo ɨbiyo. Mahn oshuu deyuwo tɨsĩ̵r uje sehe odiilabe. 12Heke oym erze Cristo ɨr ɨbiyo uje ochɨbɨte lahwosni uje tyenɨj oshiyokõr. 13Ye shɨ erze uje oshiyokõr. Ich uhurc otokole uje ich õr towɨ hn shish otekɨrɨhɨ õr ihyuwo hn otata lare. Otokole toy uje ich otsahmũr uje odale kuche ɨkiyo, hn otata erze uje ye ompe per õr ɨre otata. 14Heke sehe tuu akɨt erze poluu uje yesh õr apɨbite par uje odii labeypo hn uje yesh õr aabo otãra õr, hn wɨr otɨbeyshɨp dahuwo. Kɨmɨjɨ wɨr oshiyokõr oshuu ɨtsorz ich erze uje ye odɨraha Porroshtpe ich ye õr pwelpe otata uje Porrosht aabo oshiyokõr uje mɨhnũwo. 15Poluu ode uje oym Porrosht hn oshiyokõr uje Satanás sahmũr. 16Uje yanak chɨhɨ uje wate Porrosht aap o kɨmɨjɨ yeẽk chɨhɨ uje ɨre Porrosht aap hn ɨr iitɨta poluu ich tyenɨj tɨbey hn ye duhu Porrosht aabo otɨbey. Heke Porrosht aabo õr pwele otakashɨm erze poluu uje nĩhyok õr iiso. 17Erze Porrosht aabo õr bahluwo õr iiyo otsɨɨ anciano. Uje otɨbey byen Porrosht aabo ich wɨr tyenɨj oshɨm õr kuche ma kɨhniya je erze bahluwo yewo. Erze uje õr ɨbiyo shɨ par uje otsanɨmɨrãha Porrosht ahwoso otatɨm õr hn oshiyokorãha õr, kɨmɨjɨ oshiyokõr debiyo om, heke ɨshɨm õr ma kɨhniya. 18Porrosht ahwoso tata ɨm: —Uje wey chish obiyo par shuu trigo yũhɨr tokole ich ye emchaha bosalt wey ahwo par uje pwele taak.— Hn tatpo ɨm: —Hnakɨrbich uje chishew obiyo tyenɨj ɨr yɨnsɨrc ɨshɨ uje serz.— 19Titɨm owa par uje ye ẽr uje yeẽk tata ɨm: —Ese Porrosht aabo õr bahlut uje iich otsɨɨ anciano shiyokõr uje mĩ̵hnɨk,— per kɨmɨjɨ õr osiyer o kɨmɨjɨ õr tre uje otata oshuu ɨtsorz ich om par ẽr. 20Uje Porrosht aabo uu õr bahlut nohmet shish shiyokõr uje mĩ̵hnɨk ich tyenɨj atɨmɨhɨ erze Porrosht aabo õr ɨkɨch par uje iim uje shiyokõr uje mĩ̵hnɨk par uje erze yewo otola hn ye oniyokõr uje mɨhnĩ̵k toy. 21Ana hutɨta uje tichew titɨm owa wate Porrosht sahmũr, hn Jesucristo sahmũr, hn erze ɨr anjele uje Porrosht chiihla õrni otsahmũr toy. Ahakõr uje de asa hutɨta uje tichew. Uje uhu Porrosht aabo oshiyokõr uje tichew tɨbɨte ana hutɨta ich ye ahakõr uhu kɨnaha par yet hn kɨnaha par ese yet. Nos uhu õr ɨlye. 22Ye ebɨte ahme õr hu eeyo shɨchish par uje uhu omasaha par Porrosht aabo õr bahluwo. Tyenɨj uhu eyuwo tɨsĩ̵r wap kɨmɨjɨ oniyokõr uje mĩ̵hnɨk o kɨmɨjɨ ye oniyokõrpe par uje ye erze mɨhnũwo deeshɨ hn tĩ̵r owa. Abeyshɨp owa par uje ye ahakõr uje mĩ̵hnɨk. 23Ye shɨ ehe awɨt. Tyenɨj ehe wint pɨkaabɨtpo par emɨsht pork ehet doso hn shish owa permo. 24Ode uje oshiyokõr mɨhnũwo ich nos oso ochɨraha hn ochɨraha uje deeych yet nehe hn tyenɨj oshɨ dabahat. Per ode uje oshiyokõr uje mɨhnũwo hn otsakɨs ɨre ich ye ɨmeheeych nehech uhurc ich ochɨraha. 25Shɨ ɨtso erze uje oshiyokõr uje om, nos ochɨraha. Per ode uje yelɨj onomo õr uje oshiyokõr uje om heke je deeych yet nehe hn ochɨraha.

will be added

X\